|
一段难忘个经历 上海言话改写，讲述：耕雲 小辰光我一家头从外婆屋里转来，是我人生中一段难忘个经历。虽然已经过去47年了，伊却勒我脑子里仍旧记忆犹新。 我个外婆屋里勒常州罗溪镇邱庄村钟家塘，小辰光个印象是离开我屋里向有80多里路。搿能长个距离，勒伊歇辰光已经算是老远老远了，因为呒没任何交通工具，大家出门侪是步行。因为路远，所以每年只是勒春节过年再会得去外婆屋里一趟。而每趟去，侪是跑六七里路到横林火车站，乘棚车（春节加开个一种客车，车厢就像现在个集装箱，里向勿设座位，旅客侪是立勒海或坐勒车厢个地板浪，一节车厢也呒没几只窗户）到奔牛，然后再步行13里。搿能，每次早浪向从自己屋里出发，到外婆屋里几乎侪要花一整天个辰光勒路浪向。记得伊个一年春节，是母亲带着我搭二阿弟一道去个，伊歇辰光我上四年级，只有12岁。因为勒当时个汤庄乡还有我个两位阿姨，所以，阿拉勒外婆搭阿姨屋里蹲了老长一段辰光。眼睛一眨，开学个日脚就要到了，但是，母亲告诉我，过几日还要去亲戚屋里吃喜酒，所以还要蹲上几日，我一听就急了呀。伊个一日吃过中饭，我母亲打中觉了，我就搭二阿弟讲，我一家头先回去了，就独自踏上了回屋里个路。我当时个想法是，我一家头先回去，让母亲搭二阿弟勒外婆屋里再蹲几日。而且，我也老自信个，凭我两条腿搭一张嘴巴，老快就会顺利回到自己屋里个。伊歇辰光，我虽然还是个小囡，但方向感是老清楚个，奔牛勒西面，横林勒东面，我到了奔牛只要一直往东跑就可以了。我也晓得，沿牢仔铁路跑是最万无一失个。但是，伊歇辰光勿管是货车还是客车，侪是蒸汽式龙头，勒铁路浪开个辰光振动邪气大，特别是鸣笛辰光，声音老大老大，气势吓人倒怪个，所以，我选择了走公路，宁可多绕一眼路也愿意。我从外婆屋出发，先步行到奔牛，然后沿牢仔大运河边个公路一直向东跑。下半日6点钟横里，天快黑了，我到了常州火车站。之前，我从来呒没到过常州城里，就向行人问了问路：往戚墅堰哪能走？因为去横林必须经过戚墅堰。勒新丰街个岗亭，我又向两位值勤民警问路。民警听我讲要去戚墅堰，觉着路搿能远，而我又身无分文，有眼勿放心，就让其中一位带了我去乘公交车。伊位民警拿我带到公交车站，等来一部2路公交车后，交待售票员，车到了小营前站台后，让伊提醒我下车，伊自家踏了脚踏车去小营前站台等我。到了指定站台，我下了车，但是，却呒没寻着民警。事后我猜想，伊位民警是想拿我送上去戚墅堰个公交车个。但因为人流拥挤，我搭伊再也呒没碰上面。搿歇，天已经完全黑了，我一时头浪呒没办法了，呆笃笃个坐勒百货大楼对面个台阶浪。直到深夜12点钟，我再决定继续步行。我深信，眼门前搿条向东个大马路就是直通戚墅堰个。冬天个寒夜，行人越来越少，而且，慢慢叫也呒没了路灯。中饭后还呒没吃过物事个我却完全忘记脱了饥饿搭寒冷。黑暗当中，伴随仔运河对岸不时传来个狗叫声，我沿仔陌生个马路一直向东。凌晨两点半，我来到了戚机厂门口，正有碰着两位民兵勒值勤。我晓得到戚墅堰了，就向伊拉打听去我老家个路还有几化。两位民兵看到我一个小囡成更半夜单独行路，还要去十里路朝外个地方，且大都是野外小路，有些勿放心，就拿我带到了伊拉个值班室里烤火，并拔了我一个馒头垫垫饥。我吃完馒头，伊拉又叫我到伊拉个宿舍睏脱一歇，等天亮了再走。可是，等我从凳子浪立起来个辰光，却发现两只脚麻木了，突然跨勿出步子了。稍为立脱一歇，我再艰难个跟仔伊拉去了宿舍。早浪向7点，我拔一阵鸟叫声惊醒，一看，天亮了，宿舍里呒没其他人，大概两位民兵还勒值勤吧。我踏上归途，开始了最后一段行程。等我走到离屋里还有三四里个赵家桥辰光，我突然发现迎面走来了我个父亲。看到我，伊竟熬勿牢落下了热泪水。原来，我母亲听到我一家头回屋里个消息，一记头急疯脱了，马上带了二阿弟乘火车赶转来。因为埃歇横里大家侪讲方言，拿“横林”讲成了“枉林”，母亲呒没听懂列车员用普通话播报个站名，结果一直坐到了无锡，等返回到屋里，已是第二天早浪向。母亲到屋里后，我“走失”个消息迅速传遍了整个村子。新学期开学第一天，班主任拿我叫到办公室了解情况，并勒全班同学面前好好表扬了我个搿次“长征”。以后，勿管是我去外婆屋里，还是外婆屋里来亲眷，伊拉总会得讲起搿桩事体。确实，搿段经历让人难忘，我也感谢搿段经历。方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。在上海，爱上海，讲上海言话。 “言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”
|
