|
沪语朗读：仝康民
感恩 来源：新民晚报 作者：孔曦 沪语改写：荣梅 朗读：仝康民 交关年数前个一个夏天，我勒屋里向吃中饭，一盘糖醋黄瓜当小菜。因为伊个辰光正好黄瓜片吸收了恰到好处个盐分搭仔糖分，味道邪气赞。 吃饭个辰光，有只缥缈个念头冒了出来：我为啥是我呢？曾经读到过一种讲法：每个人生出来就是赢家。是勿是要晓得感恩！？ 感恩拨了阿拉生命个父母。勿管伊拉是勿是有准备，也勿管伊拉是满怀希望还是万般无奈，是伊拉迎接了阿拉个出生。更加要感激伊拉个抚养之恩。勿管父母是倾力而为，还是有另外啥个想法。 成年以后，有一段辰光我私底下埋怨过父亲。假使勒我小个辰光，伊可以让我学琴，而勿是拿出工资个一大半负担乡下头伯伯一家门个生活，而且还去张罗几个堂阿哥个婚事，我现在有可能已经成为一个演奏家了。 廿岁大学毕业以后，经过社会大学个打磨，小青年磨成了老头子，甜酸苦辣各种各样个事体，侪值得感恩。帮助我个，我要谢谢伊个扶持提醒；阻挠我个，我要谢谢伊让我拥有了现在个生活。有辰光，善因会结出劣果，恶念反倒成就了好个果实。拥有一颗知足感恩个平常心，人生就勿会得觉着忒苦。 前几日，搭几位朋友、还有一对带了囡儿搭儿子个夫妻同游。路浪向，稍许帮忙照看了一歇歇两个小囡。休息个辰光，大人轧勒一道吃茶、嘎山河、看风景，伊个七八岁个女小囡，勿声勿响勒旁边剥香瓜子。一歇歇功夫，伊静静叫个走到我个身边，笑嘻嘻个让我摊开手掌，拿七八粒瓜子肉摆勒我个手心浪。我邪气惊喜，连声搭伊讲谢谢！谢谢！伊淡淡个笑了笑，也勿讲啥，转身回到自家个座位浪继续剥瓜子。搿趟，挨到了另外一位朋友。然后是第三个，第四个。大家侪讲：“优优老乖个，侬剥瓜子介辛苦，自家吃呀！”伊还是勿响，继续剥，又开始下一轮。 看牢优优明亮清澈个眼晴，我勒心里回想自家，勿禁生出了疑问——交关年数以来，对交关人个善意，我是否有清清爽爽去感恩？交关人、交关事体个警醒搭仔鞭策，我是否记牢了呢？ 电影《银河补习班》最打动我个台词是迭个两句：“对勿起，我是第一次学习做爷。”“对勿起，我也是第一次学习做儿子。”特别想对伊眼曾经拨我忽略脱个人讲一声：“对勿起，我也是老晏再晓得感恩。” 阿拉看看优优小朋友，伊介小就晓得感恩，多少幸运呀！仔细想想看，搿勿是偶然个。伊个七十几岁个外公，每日上半天搭仔下半天勿停个奔波勒去太外公屋里搭仔太外婆住个养老院个路浪向，去照顾自家个爷娘。优优听勒耳朵里，看勒眼睛里，伊个举动，一定是邪气自然个。 讲得明白点，人生在世，呒没人欠阿拉啥物事。勿管是父母、子女，还是伴侣。只要对方履行了义务，阿拉就呒没资格抱怨。记牢人家对自家一点一滴个好，有机会回报个辰光，一定勿要忘记脱。 几乎每一个时代个文人，侪会得感叹人心勿古。我相信，只要有优优搿种小朋友，只要伊拉个眼晴一直明亮清澈，迭个世界就一定会变得更美好。 
方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 / 编辑：渺渺
|
