|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情
复兴路浪寻勿着 大忙人费加罗 来源：老周望野眼 作者：周力 改写、诵读：郭健 指导、推荐：丁迪蒙 编辑：王乙其 罗西尼个歌剧《塞尔维亚个理发师》开场，主人费加罗一亮相，有段唱叫《快点搭大忙人让路》：“啦啦啦，啦啦啦，我来了，㑚统统搭我让开！大清老早我就去搭人家剃头，豪扫！我活得真是开心，因为我迭个理发师实在是高明！好家伙费加罗，是个运气最好个人。我每日天日里夜里东奔西忙，做个勿停，大家对我侪老尊敬个。我是塞维利亚城个大忙人，人人侪离勿开我费加罗。”
快要过年了，剃头店生意来得个好，今年特别好。上海人过年讲究“清清爽爽”，侪要剃只头淴把浴，顶好么再搓搓背，一年个晦气就侪消散了。正月里是勿兴勒身浪动刀动剪刀个，考究点个要等到“二月二龙抬头”再肯去剃头店，勿讲究个朋友，也起码要等到正月半，因为勒上海从事剃头沐浴行业个，大多数是“老扬州小扬州”，伊拉回老家了，正月里即使想剪头发，也呒没店家开。 今年剃头生意特别好，有眼师傅一年呒没赚到啥钞票，提早回去了。交关店关门落锁，到人人需要剪头发个辰光，再发现剃头店少了，店里向个人多了，想要勒年前剪头发，蛮难个了。即使侬有心付眼小费拨“老扬州小扬州”表表心意，也要等人家有得空。前两日乘24路电车路过复兴中路吉安路，等红灯个辰光看到几个字：“复兴理发店”。心里就勒想：假使搿一带还没动迁，搿家人家搿个辰光应该是忙得来不亦乐乎。可惜，搿搭里老里八早就呒没居民了，自然也勿会得有人来剃头。
回转去翻阅了相关资料，发现我拍个复兴中路84号搿家店面，民国时代就是剃头店，当时名字叫“华安”。老上海南京路曾经有家华安美发厅，现在仍就勒南京西路金门大酒店隔壁头开勒海。勿晓得复兴中路个搿家“华安”搭南京路华安有啥关系伐，或许是分店，或许是盗用名字个冒牌货，总之，后首来伊成为了“复兴理发店”，我猜测，小业主变成功了单位员工。 改革开放之后，搿家店面还是搭“头”有关，有段日脚叫“山木美发厅”，再后首来调老板了，名字叫“G.H美发沙龙”，一直到收到一纸征收令，只剩下来某个年代留下来个几个字迹，过段辰光也要消失了。我勿曾勒搿搭剪过头发，但是，我猜想勒搿段复兴中路吉安路生活过个朋友，应该对搿家店勿陌生个。
搭理发店同命运个，还有隔壁个紫阳里、成业里、永安里，对面个三瑞里，还有老“大肠面”所在个羊尾弄……曾经热闹一时，最终侪消失了。不过复兴中路浪向费加罗呒没了，上海人过年前头总归要剪只头发淴把浴个习俗，仍旧顽强个存在勒海。
作者：周力
诵读：郭健 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“启迪心田沪语”公众号 我知道你在看哟~ |
|
|
