|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 到底哪能算“中刀”？ 来源：新民周刊 原创：姜浩峰 沪语改写：丁曙立 讲述：王邦基 审核、推荐：丁迪蒙 编辑：王乙其 （上） 近抢把，看到位朋友发了篇文章讲：“老半斋十只刀鱼馄饨吃下去之后，我中刀了”。 勿得勿讲，迭篇微信公众号文章，读起来邪气爽快。 “猪肉糜控股，刀鱼腥弥漫，48块洋钿一碗，血淋嗒渧”，原文就是迭能个，㑚讲读起来爽伐？
齐巧，最近自家到老半斋吃过一顿。吃饭过程当中，也耳闻目睹了一眼情况。我个感觉，比起有眼老字号餐厅来，老半斋并呒没哪能勿好，不过“中刀”朋友所讲个，也并勿是呒没依据。总体来讲，老字号想要继续生存、发展，确实有需要改进个地方。 先讲讲我勒老半斋个一眼见闻伐。搭迭位仁兄一样，到了老半斋，总归想着刀鱼面应该上市了。不过我想了想，大约摸十年前，有亲眷从北京来，火车大清老早到上海。刚好是春天，我直接出租车送两位到福州路老半斋吃早点。当时点个是刀鱼汁面。自家吃下来，好像味精摆多了眼，吃好之后嘴巴干。不过亲眷是赞不绝口，觉着是正宗个淮扬点心了。
我是欢喜吃“满口菜”个，迭次索介也勿点刀鱼汁面了，是否来碗刀鱼小馄饨呢？一看价钿勿算贵。想想外头交关饭店个纯肉小馄饨一碗也要十块左右了，搿刀鱼小馄饨是否邪气佮算个呢？ 又想想是爷两家头吃，索介到里向雅座点菜。儿子要吃鳝丝，搿就点响油鳝丝伐；再点了韭黄炒蛏子、虾饼，一碗刀鱼小馄饨，一碗肴肉煨面。 点好菜再觉着勿对头——侪讲小暑黄鳝赛人参。现在是正月，点鳝丝是勿是洋盘呢？过脱交关辰光，鳝丝上来了，呒没听到响油声。估计迭个响声，是由厨房间个厨师代我听过了。
想想中国早勒宋朝就有得“看菜”个讲法。也就是讲有个菜勿见得是吃个，只是用来供耳目个享受罢了。迭个当然是地主阶级个浪费。不过吃只菜，享受享受色香味俱全个感觉，总归也是勿错个伐。譬如淮扬菜里有道“平地一声雷”，端上来辰光，服务员一只手托一盘金黄松脆个锅巴，另外一只手端一碗踏踏滚个虾仁鲜汤，当仔客人个面摆勒台子浪，浇上去“吱啦”一声。迭道菜，曾经勒抗战时期个重庆，有人起名叫“轰炸东京”。 言归正传，搿响油鳝丝呒没响声，像煞缺了点啥。不过，总算炒得勿错。想想现在物产丰富，勿见得非要到小暑再有得好黄鳝，人工养殖，啥个季节侪有得优质个黄鳝。 至于韭黄炒蛏子，个人感觉算是时令菜。毕竟，“夜雨剪春韭”嘛。韭黄更加是辞旧迎新辰光个佳品。 老半斋上菜个时间点倒也卡得蛮准个。炒菜差勿多要吃光个辰光，小馄饨搭面再端上来。
只不过，搿刀鱼小馄饨，主要是猪肉馅头个——搿当然也无伤大雅。毕竟，大家侪晓得现在刀鱼邪气贵。哪怕是人工养殖个没人会得指望馅头侪是刀鱼肉个。不过一口咬下去，确实有股腥气味道喷出来。是勿是鱼肉勿新鲜呢？最近几年，我也勒别个店家吃到过邪气好个刀鱼馄饨，确实勿是迭个味道。 至于肴肉煨面，是老半斋真正个看家招牌面。雅座自然有得吃，点心部来讲，顾客十有六七是看勒迭碗面去个。呒没闲话讲，赞！ 现在流行一只称呼——小姐姐。老半斋个服务员，清一色勿是小姐姐，而是老阿姐。有意思个是，雅座顾客点菜辰光，往往手一挥，“阿姐，来！”上海闲话喊出去，蛮轧劲个。
迭搭呒没现在一眼小饭店已经成为标配个扫码点餐，阿姐长阿姐短之间，单已经下好了。 凭良心讲，迭个就比另外家老牌餐饮王家沙好交关了。
讲述：王邦基 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“启迪心田沪语”公众号 |
|
|
