【沪语悦读】模子（2）

常熟老李jlr5mr 2023-09-23

展开全文

阿拉老底子每天呈送精彩文章一组

打开尘封的记忆，寻觅往昔的岁月

叙老底子事 忆老底子人

诉老底子情

作者：朱建

改写：朱枫

讲述：王邦基

文字、语音审核：丁迪蒙

编辑：王乙其

前文回读：

（1）

（2）

老叶搭我伲讲述了伊父亲关于英语个一段心酸并传奇个往事。50年代，伊父亲拨打成右派，从上海发配到新疆，勒工厂子弟学堂当老师。“文运”开始后，圣约翰毕业个右派，理所当然成为了抄家个对象。革命群众勒屋里抄出英文书籍搭英文信件。乖乖隆地咚，搿还得了！勒革命群众人人争当“英雄”、想捉“特务”个政治年代。斗争警惕臆想无限，勒伊拉个“火眼金睛”个瞳孔里，英文就是该死个美帝文字！英文信件里囥勒海世人看勿懂个密电码！铁证如山！老叶个阿伯，就拨迭个天下最离奇、最莫须有个“铁证”，打成了“现行反革命”。、就迭能，伊个父亲成为了右派+现行反革命“双料”敌人。伊个癫狂个年代，子弟学堂个一些革命师生对“现行反革命”老叶个阿伯义愤填膺，恨得咬牙切齿。勒“对敌人就要残酷斗争搭打击”个正义旗帜下头，同事搭学生，一个比一个手条子辣。最后，拿父亲个脚打断脱了。

1969年，工厂个一部进口机器个主机坏脱了，生产线侪趴勒海勿动了。当时个产品是向国庆20周年献礼个战备产品。

驻厂“支左”军代表是野战部队个团长。搿记，团长急得火烧眉毛。但是进口设备个说明书、工作手册、安全手册、检修手册、技术参数资料侪是英文个。革命群众是大老粗，中文也勿认得几个，覅讲英文了！伊歇辰光，光芒万丈个革命精神，照亮勿了面对英文“睁眼瞎”个困境！

革命群众勿认得英文，趴勒海个进口主机哪能修复？有人讲，“现行反革命”叶老师懂个。军代表一听，马上命令派工人拿叶老师寻得来。四个工人照军代表命令，拿了副担架，要拿脚断脱个父亲抬走。母亲吓煞脱了，让老叶也跟得去，关照儿子要搭阿伯寸步勿离。工人拿父亲抬到车间。看见父亲个断脚石膏还打勒海，军代表起了恻隐之心。伊叫工人搬了只大台子，让父亲靠仔墙，坐勒大台子浪。又让警卫员拿了张老大个山羊皮，垫勒脚下头。

军代表邪气严肃、认真个讲，搿些翻译材料关系到战备产品个生产，关系到国庆献礼，是项重要个政治任务。假使译得快、译得好，任务完成了。伊会得建议工厂“革委会”搭拿脱“现行反革命”个帽子。

军代表下达个政治任务，每个字侪重于天山！面对辣末生头来个任务，只提出一只要求：脚断脱，写字勿便当。为了提高翻译速度，请派两个人来记录，伊现场当众直接口译！现场当众直接口译？君子一言，驷马难追！父亲呒没拨自家留回转个余地！当父亲拿到第一本英文手册个辰光，伊拿脱近视眼镜，揩揩镜片，老叶看见父亲个眼睛里竟然含了眼泪水。

父亲晓得迭个勿是一般翻译，搿是伊“政治”生命个生死大考，也是伊挣脱“现行反革命”政治枷锁个唯一机会！父亲勒“政治”烈火当中，能够涅槃重生伐？现场个人，侪拿目光聚焦到了父亲身浪向。勒一个特殊个年代，会英文是政治大忌。所以，老叶从来就呒没听到过父亲读英文。伊也紧张煞了，真个为父亲捏仔把汗。现场空气像煞凝固了，迭个辰光，父亲开口了。一开口，阿里像勒翻译，完全就是拿了本中文书，勒抑扬顿挫个朗诵，当中间呒没一眼停顿、思索、犹豫。父亲个大脑，就像是装了中英文电子同步翻译器，出口成章！现场个人侪呆脱了。记录个人，眼睛拨瞪拨瞪望牢仔父亲，手里个笔也忘记脱记了录。