甜美个大杂院

天童老僧 2024-04-27 发布于上海

展开全文

作者：吴翼民

沪语改写：荣梅

讲述：王宇洲

文字、语音审核：丁迪蒙

编辑：王乙其

讲起大杂院，总归觉着是搭杂乱无序连勒一道个。大家勿晓得，我曾经蹲过个伊只大杂院虽然也是杂乱无序个，但还是有眼甜搭仔美个！

伊日天，我到农贸市场去购物，眼门前突然飘过个人影，是个有点年纪个女个身影，我马上到记忆深处去快速搜索，噢，想起来了——伊是大杂院里个邻居呀，勒一爿卤菜店做生活个阿妹呀！分开几十年没看到了，面孔老了勿少，但还是邪气漂亮，风韵勒海个呀。

相互也认出来了，就打了招呼，想勿到，伊第一句闲话就讲“请侬到我屋里来吃饭！”挨下来讲：“店里向老早有名个酱排骨，我也会得烧个，勿比店里向推板，特别是伊个卤汁……”我老开心个答应了，本来还想再讲两句，可惜人造造反反，拿阿拉冲散脱了，伊回过头又讲了句：“来吃酱排骨，酱排骨个卤汁呀……”随后，就拨人潮卷脱了。

我没去追，自家想，人搭人就像萍搭萍，水个流动偶然拿两只萍漂浮勒一道，随后又漂浮离开，真是蛮奇特个。伊刚刚讲请我到伊屋里去吃饭，一半敷衍、一半认真伐，既然请我去，却连得地址搭联系方式也呒没讲呀，但是。我相信伊是真诚个，交关年前头，阿拉侪勒大杂院生活，低头勿见抬头见，邪气熟个。

大热天，交关人家勒院子里吃“风凉夜饭”，伊端仔饭碗，也会热情个讲：“哎，来尝尝我自家烧个。”我谢绝了，伊还会得讲：“想吃酱排骨，就到大桥堍大三珍来寻我噢。”搿句闲话钻进我耳朵，也没从另外只耳朵溜脱。

“想吃酱排骨，就到大桥堍大三珍来找我呀。”记得辰光勿长我真个去了。有趟，勒馋老虫个勾诱下，我带仔只盖碗到大三珍去了。哟，大三珍门面普通来西，但上阿妹立勒海，就生色勿少，真是个风韵十足个少妇，还有袅袅飘出个排骨个香味道，“食、色”俱全呀，吸引得交关人停下来去买。伊看见立勒外头个我，就招手让我靠近，老快个拿我只碗拿过去装，称好，用大调羹狠狠叫舀几调羹卤汁，再报价付款。

我拿好碗老快个离开，走了一段路，再拿盖头拿脱看，艳浓个卤汁几乎要从碗里向潽出来了。伊日天伊下班，还特意到我屋里讲：“排骨分量勿好多，卤汁好多摆眼，勿违规个。搿卤汁随便摆勒啥个菜里侪老好吃个。以后再来买噢。”我穷谢伊了，伊个原则性、灵活性把握得侪蛮好，让我占大便宜唻。搿让我联想起小辰光有关酱汁肉搭百叶结个往事。

伊个辰光，故乡苏州春季最诱人个，就是各家卤菜店个时令美味酱汁肉了，但家境比较差，小人老少有搿种享受个，偶然去买一趟，娘总归关照要让掌刀师傅多加点酱汁，汁覅钞票，但味道搭肉一样。我照此而行，掂好脚尖头颈伸长，望牢师傅勒碗里向夹肉添汁，添汁用个是把小刷帚，就只有搿能一刷，薄薄个一层。后来有抢酱汁肉买勿起，就去买酱汁百叶结，味道要比酱汁肉推板交关，但比呒没要好呀。奇怪个是，师傅反倒会得多蘸酱汁拿刷子多刷几趟，酱汁多了勿少，搿能再晓得，掌刀师傅还是有照顾穷人家个善心个。

酱汁浇勒菜里或者用来拌饭真是好吃……就像阿妹讲个，酱排骨个搭老早酱汁肉个酱汁一样好，拌饭勿管浇到阿里只菜里味道侪好个。偶而勒单位里讲起，同事也有欲望了，侪叫我代买。我勿好推辞，同事关系邪气重要，平常辰光也常庄得到关照，搿种顺水人情来点也蛮好。阿妹讲“以后来买好唻”。所以常庄会得去代同事买，每趟排骨量准足，卤汁拍拍满，同事侪欢喜得勿得了，搿勒物质还邪气匮乏个年代绝对是桩美事呀。就搿能，蛮长段辰光，我搭同事享受仔搿爿店滋润个卤汁，日脚邪气美，迭个是要感谢老邻居阿妹，感谢甜美个大杂院个。