|
拨勒称为“苏州人葛狂欢节”葛“轧神仙”日脚来哉！ “轧神仙”该桩事体，老苏州侪晓得阴历四月十四是“八仙”里厢葛吕纯阳葛生日，据说葛一日吕纯阳会得化身讨饭叫化子、做生意葛商人或者读书相公到凡间来度人，于是满苏州葛老百姓侪一窝蜂拥到阊门下塘福济观（神仙庙）门前，巴望勒浪人“轧”人当中“轧”着吕纯阳，“轧”出一个仙缘。红男绿女摩肩接踵，倒比观里葛神仙还多三分鲜活气。 该个“轧”字用得相当妙，既有人“轧”人葛实相，又蕴含嗞碰着运机葛虚指，正是苏州闲话当中虚实相生葛趣味。 老底子神仙庙香火鼎盛，倒比文庙祭孔更加体现得出苏州人葛真正性情：士绅捧嗞檀香匣子，搭挑担卖茉莉花葛老好婆轧勒一道；绸缎庄葛伙计偷空来讨个彩头，隔壁画舫浪葛船娘也缚嗞红头绳来卜姻缘。顶结棍葛还是卖神仙糕葛摊头，雪白米糕点上胭脂红，倒比观里葛塑像更加惹人拜——苏州人葛信仰，不必端坐莲台，可以拿块糕团，随手拿起摊头葛茶水，咬一口神仙糕，吃一口碧螺春，解渴充饥，就是好菩萨…… 我廿岁之前，“轧神仙”作为“四旧”，勒浪苏州城消失哉。上世纪八十年代中期，有一日嗞嗒下班踏脚踏车路过阊门里厢皋桥，看见桥西堍吴趋坊石桑头里冒出来不少摊头，基本浪侪是郊区乡下人拿自家挖葛、种葛花卉盆景来卖，还有点卖老卜丝饼、针头针脚葛小百货摊……一打听，讲是勒浪扎神仙，因为神仙庙拆脱哉，就只好借离俚不远葛地方来借借仙气。 吴趋坊“轧神仙”轧嗞呒不两年，因为人越轧越多，容不下哉，就亦拿“轧神仙”葛地方移到嗞中街路。地方大哉，范围大哉，商业味道也更加浓哉……再后来苏州行政区划调整，金阊区管葛地方一路西扩，原来归俚管葛护城河里厢葛地方分拨勒平江、沧浪两区。为嗞拿“轧神仙”葛节目搭经济效益留勒金阊区，就勒嗨改造南浩街葛辰光，勒浪南谁街黄金地段重新造嗞一只神仙庙，开启嗞新一轮葛苏州人葛狂欢——“轧神仙”。 到现在，金门、阊门商厦林立，神仙庙缩勒护城河边浪厢楼宇缝隙里，倒是愈发显出苏州人葛执拗。后生笃举起手机拍短视频，老太太仍旧嗑头烧香往功德箱里厾铜钿………新旧交叠葛光景，穷像拙政园里葛棵株明朝文徵明手植紫藤，老根上开出新花，到底不舍得厾脱根本…… 苏州人葛信仰，原本不勒浪云里雾里，而是沉浸勒嗨一城碧水、满街烟火、万家灯火里厢…… 原创:钓雪 语四禅公众号 25.5.9 |
|
|
