鸭蛋状元

龙舟作者（顺德龙江）叶勇洪2010.9修改

鸭蛋状元
龙舟鼓响卜卜撑
今日听我唱边一单
？
呢，就唱我地物华天宝、人杰地灵嘅杏坛。

杏坛嘅历史已有二千多年时间，
勤劳嘅祖先栽桑养蚕，仲把鱼塘耕，
勤奋读诗书，养成乡风
好习惯，
搏求功名回报社会衣锦还。

唱到旧时杏坛嘅功名人士，多到一担担，
呢祠堂前面嘅旗杆夹，记载住一单单，
仲有黄士俊和梁耀枢
，
两位状元高中好儿男。

单表状元黄士俊，
佢嘅家乡就在杏坛右滩，
呢度西江源远流长，风水生猛，
藏龙卧虎飞出大鹏。

右滩系好
地方胜迹无限，
西边就挨住甘竹滩，
滩墟繁华渔舟唱晚，
江面上穿梭如鲫顺风帆。

士俊细时经常到此玩，
穿波逐浪剥光衫，
（白：旧
时穷家嘅细路仔落滩
玩水吖嘛，就系剥光猪嘅啦。）
惊涛骇浪里练就一身胆，
练就佢不畏艰辛不畏难。

士俊出身系书香门槛，
但家道中
落已难支撑，
经常系有得朝来唔顾得晚，
粗茶淡饭好平凡。

佢双亲日日磨豆腐把钱赚，
（白：士俊知道，父母日挨夜挨咁辛苦，
都是为
维持家计，同埋供佢读书啫。）
为咗报答父母恩重如大山，
过年个阵写咗副挥春表心意，
（白：一肩挑日月，两手磨乾坤。写得好！）
世人
都乐道称赞，冇得弹。

士俊读书够勤奋，
仲时时识俭又知悭，
佢响地下写字执条木炭，
（白：用嚟做笔写字，唔使钱呀。）
笔走龙蛇
唔去耍顽。

佢话考取功名并非梦幻，
除咗有学识仲要挨得苦艰，
世上从来都冇免费晏，
奋斗不息就系成功嘅摇篮。

呢就话个年上京去
会考，
翻箱倒栊仲扥（抄）埋个钱罂，
点点埋埋水脚都仲唔够码，
只好搵外父借钱埋去杏坛。

外父刚好招呼客人用紧美馔，
睇见个女婿
一身褴褛，无件好衣衫，
仲话嚟借钱就好冷淡，
即时乸埋个面无笑颜。

佢话你已经卅几嘞，身世十足似落难，
仲去考乜功名，同人竞争，

需知全国科举嘅士子，成千上万，
（白：睇你个样咁冇出息，悭番啦。）
你若然高中，我就倒转头行。

士俊话外父此言太过分，
为人立
志要做大事业一番，
你唔好将人睇低，生对白鸽眼，
阻滞我去会考，仲诸多留难。

（白：外父话，哀哉咯，算我唔带眼，）
千拣万拣得你
呢盏烂灯盏，
（白：我若借钱畀你，）
咁唔系惨过氽钱落甘竹滩！
顺手执过两只咸鸭蛋，
（白：嗱，呢啲畀你咯。即刻闩埋道门，）
以后
你都唔好再嚟搵麻烦。

（白：点解佢外父畀咸鸭蛋？
士俊家穷，有咸鸭蛋餸饭就唔使油盐咯，
仲有就系睇死佢，考试得只蛋！）
侧边嘅家
仆睇得唔顺眼，
话做外父唔应搵鸭蛋嚟搪塞一番，
呢，我地都有啲碎银星星散，
不如就畀你上京一路顺风帆。

士俊话多谢照应，真系如雨
中送伞，
（白：外父嘅鸭蛋？我都领受。）
用佢磨砺我经受社会嘅苦和艰，
世态炎凉人情暖和冷，
（白：我就算系穷到乞食，）
都要把功
名考回还。

果然一路考试把关闯，
殿试钦点皇榜颁，
新科状元系黄士俊，
圣旨飞马报杏坛。

四乡都知道人人羡赞，
金榜题名描朱丹
。
外父嬲到掟晒个啲咸鸭蛋，
（白：为乜？眼火爆咯，
后悔当初将女婿睇低!）
心里边又噎气来又愧惭。

士俊清廉为官宦，
为人刚直
不畏权奸，
忧国为民从不偷懒，
直到告老回乡返杏坛。

家乡后人都敬重佢，
（白：将黄氏大祠堂翻新过晒，）
建成状元博物馆一间。

弘扬奋斗不息、为国争光嘅状元文化，
毋忘鸭蛋状元挨过嘅艰苦与酸咸。

嗱，而家个啲后生话唔惯，
奋斗何必要咁苦艰，
老豆仲有大把任
我叹，
呢，成间大别墅，仲装修埋花岗岩。

（白：后生哥，唔系咁睇啵。）
状元奋斗精神，值得我地铭鉴，
状元成功登顶，引领我地登攀
，
寄语后生哥，定好目标千祈咪懒散，
千祈咪懒散，
望你地个个状元高中，
美好人生如春花绽放，五彩斑斓。