庄则栋两个两样生哥哥
今年二月去世个乒乓球三届世界冠军庄则栋有两个哥哥，大哥叫庄则敬，二哥叫庄则忠，两家头过去侪辣安福路上海人民艺术剧院工作，大哥是导演、演员，二哥是搞舞台美术个。我老早仔住辣安福路西头最末脚一条弄堂，人艺就辣海阿拉弄堂个斜对面；我读个黎明中学也辣安福路浪，人艺呢是搿所中学埃头个斜对过，所以，“文革”期间71到75年读中学个辰光，路浪向三日两头会碰到庄则栋搿两个阿哥个。
“文革”期间，八个样板戏撑了全部市面，话剧好像基本浪向呒没伊拉啥个事体。走出来个演员交关侪卖相老好，风度翩翩，明星派头十足，就是大家大多勿晓得伊拉叫啥名字，做啥事体，演过点哪能样子个戏。庄则栋两个阿哥就勿一样了，因为大名鼎鼎弟弟个缘故，搿条勿长个马路浪向居住脱工作个人，侪认得伊拉两兄弟个，名字、辣剧院做啥生活，全部搞了清清爽爽。
当时搞勿大清爽个是，为啥庄则栋辣北京，伊拉两个末辣上海；大哥庄则敬一副外国人面孔，二哥庄则忠末是中国人面孔，长得跟庄则栋倒是老像个。不晓得伊拉一家门到底是哪能桩事体。
现在再晓得，原来庄则栋兄弟几个名义浪向个外公就是旧上海著名个犹太人巨富哈同。哈同呒没儿女，伊拿养女嫁拨了庄惕深。养女看来是外国血统，庄则敬就是哈同养女告庄惕深生个。后来庄惕深又辣外头跟一个中国女子生了庄则忠、庄则栋。当时要弄清爽是搿能介回事体，想来肯定会老轰动个。
也因为搿能两个血统勿一样个娘养个关系，再有儿子像娘多，庄则敬跟庄则忠、庄则栋搿两个弟弟真是一眼眼也勿像个。而且性格也大勿一样。
印象当中，庄则忠辣路浪总是走得快快个，碰到同事、熟人不但会打招呼，还常常要起劲攀谈，是个精力看上去过剩个人。大概是搞舞美个原因，伊常常是两头跑，隔开两百米个青年话剧团也会有生活叫伊去做。
庄则敬上班总是骑了一部“老坦克”，因为身板厚，模子大，又踏了慢，总让人担心搿部“老坦克”阿会吃勿消。伊一般勿大会主动跟别人搭讪，人看上去老稳重个。伊个头特别大，五官也大、厚实，别个中外混血会让人家有一半一半个感觉，但伊真个看勿大出有一半汉族人个遗传，告咾后来改革开放后，拍电影需要外国人角色，好几部电影就直接让庄则敬来演了。
我一直纳闷个是，学生时代碰到过伊拉无数趟，居然从来呒没一趟看到兄弟两家头辣路浪向结伴一道走个。我现在猜想，或许是伊拉兄弟两人勿想太引人注目，特特为为搿能回避个，尤其是大哥庄则敬。要是兄弟两家头辣一道走，拨交关学生撞着，学生子肯定会觉得更加好白相了。
搿当然是八卦心态，读中学个学生子还控制勿了，就是大人也常常避免勿脱。举个例子，中学三年级搿年三夏学农，一天夜里向寝室睏觉前，同学道里茄山河，勿晓得哪能茄到了庄则栋搿两个阿哥，一向严肃个班主任吴老师听见仔，也一下子兴奋起来。伊跟阿拉讲起，有一次辣乌鲁木齐中路红光点心店吃点心，齐巧庄则敬也进来吃，两个人一样要了一客小馄饨。老师讲，庄则敬个比伊上了晏，但拿到馄饨伊三口两口一歇歇就消灭光了。等老师吃好出来，庄则敬人已经勿晓得走到啥地方了。想想也是，一只三号碗，里向盛了一两半一客个小馄饨，阿拉吃吃也算了，庄则敬介大模子介大个嘴巴吃，有点滑稽，老师看了受惊，我想原因是搿吃个气势看上去，肯定是赛过鲸吞了啦。
|
|
