搿枪学讲上海话人多了
有段辰光我心里向老殟【wek】塞个。一趟子去超市买电烤鸡，店家论只买个，我指着一只个头比较大个电烤鸡对营业员讲“告我拿【ne】搿只”，勿晓得伊睬也勿睬我，我又讲了一遍，竟拔迭个外地人“训斥”：“讲普通话！你讲上海话我不卖给你，我们听不懂上海话！”。还有一趟，听到隔壁上幼儿园个男小囡回到屋里向教训伊拉外公：“我们老师说，要讲普通话，外公，你再讲上海话我就不理你，我告诉老师去！”。垃拉单位里，新进个大学生是外地人多于上海本地人，勿要讲开会个辰光清一色讲普通话，就是平常个交流也是普通话，讲上海闲话个简直成了“少数民族”了，乃末苦煞我迭个的的刮刮个老上海。我接个电话，上海普通话末疙疙瘩瘩勿连贯，还走调，上海同事听了要发笑；讲上海话呢，是顺畅了，意思也表达清楚了，可电话对方却讲勿晓得我讲啥，要我讲普通话。真为难我啊！侬讲殟塞！
搿抢电视浪、报纸浪侪辣海讲，“上海小囡勿会讲上海闲话了”，“讲上海闲话个播音员阿富根寻勿着接班人了”，“电台、电视浪讲上海闲话个节目呒没挺几只了”，我还发现东方网原来有个“学讲上海话”栏目也呒没了，让我迭个老上海急煞，上海闲话哪能了？难道真要断种了？上海闲话有伊个地域特征，形神兼备内涵丰富，是普通话勿能替代个，是勿应该也是勿会断种个，不过传承上海闲话勿便当，是“任重而道远”，要靠方方面面齐努力。
“海纳百川”，上海敞开大门欢迎全国各地同胞，以致外地来沪人口逼近上海本地。但“入乡随俗”，到上海讲上海话必然无可非议，就像到美国需讲英语一样。来沪个外地同胞学眼上海话，听懂上海话，迭个也无妨，也便于伊拉真正融入上海。上海个机关、企事业、学校等部门勿应阻止而且可以创造上海话个学习、交流个条件，电台、电视、报纸等媒体可以而且应该辟出专门个栏目传播上海话，造成上海话个生存、发杨、传承个良好环境，迭能样子上海闲话个传承是指日可待个。
|
|
