“装胡羊”个火锅店
羊肉也弄出假个故事出来了。公安部门已经查实了拿狐狸肉、水貂肉、甚至老虫（鼠）肉来冒充羊肉个安件。事件是出辣山东个阳信，但是搿些假羊肉却早就跑到了阿拉上海人个餐桌上。报纸讲，掺假羊肉甚至流入了傣妹、小肥羊、谭火锅、品尚豆捞、澳门豆捞等等知名个火锅店。厥倒。昏过去。掗【ok】啦勿出个难过。因为以上个搿些火锅店我侪是常客，而羊肉是我必点个一道菜肴。
上海人欢喜吃羊肉。去吃一顿涮羊肉，老早最有名气个是洪长兴。洪长兴个老店是开辣连云路、延安中路口子浪。埃个辰光，伊搭里是叫做新城隆庙。洪长兴老店个一大特色是吃“大锅饭”——几个素不相识个客人围辣一口大火锅边来涮羊肉。当然，锅内是分隔了好几个区域。大家各涮各个，相安无事。后来洪常兴搬走了。再后来，京城里个东来顺也登陆上海滩了，辣思南路、淮海中路口。又后来，东来顺也搬掉了。这京沪两爿羊肉馆子有点“躲猫猫”个意思，一直辣市区里东躲西藏。侬呒没点追踪盯梢个本事，真难以解决尝鲜羊肉火锅个馋痨。呵呵。
羊肉弄假，是发展了欧洲人牛肉弄假个故事。欧洲奸商是以马肉混入牛肉，挂牛头，卖马肉。现在，挂了羊头，卖了杂七杂八个啥个肉，是叫质检部门侪要举手投降个。搿使我想起一句老个上海闲话：装胡羊。装胡羊要拿普通话来解释，就是装糊涂、装作勿晓得。要考证装胡羊个出典，或许还呒没公论。我揣摩，当初以品质低下个羊来冒充名气响亮个浙江湖州产个绵羊，即可称得上装了一记胡羊。现在眼门前个胡羊变成了假冒个新西兰羔羊，胡羊真个变成了外国羊。
千万勿要来说白，讲啥个交关火锅店老板分勿清真羊、假羊、湖羊、胡羊。伊拉个锐利目光只盯牢了阿拉顾客们个口袋。建议拨搿些商家设立统一品牌——装胡羊火锅店。以后上馆子真要练就孙悟空个火眼金睛才来三了。如果呒没搿点真功夫，葛末保险起见，还是去寻上海滩老牌子个洪长兴、北京城老牌子个东来顺。只有搿样才可以饱吃一顿羊肉之后喜洋洋哉。
|
|
