“皇帝”勿准“太监”急
节目开了已经有年把辰光了，每个礼拜五中浪，我垃东方都市广播做一档电台直播节目，叫“和谐一家门”。听众勿少，而且打电话进来个听众也勿少，讲个总归是屋里向点勿顺心个事体。有蛮多一部分打进来个电话，侪是同一个问题：子女勿结婚哪能办？勿轧朋友哪能办？每一趟我侪会得劝解一番，我甚至还会讲，婚姻自由包括三大自由：结婚自由，离婚自由，还有一个自由常常被忽略，就是勿结婚自由。当然搿能讲法是有点隔靴搔痒，要是我小囡年龄大了勿轧朋友勿结婚，一直蹲垃屋里，我心里也会得急。
我当然也呒没办法，一个人哪能挡得牢一个社会个现象？我有个朋友跟我讲过，伊囡儿三十立而勿婚，拨爷娘催得勿耐烦，下了最后通牒：下趟我个生活问题免谈，否则会勿开心个。可怜天下父母心啊！我朋友有辰光好勿容易拿话题一点点介兜进去，赛过像从外环线要兜到内环线，还没兜到正题，囡儿就一面孔严肃：又来了又来了！口气像煞是大人垃拉教育小囡一样。我朋友只好乖乖缩回去，罪过啊！老早讲皇帝勿急急太监，现在皇帝勿急还勿让太监急。老早讲船到桥头自然直，现在船根本就勿想到桥头，笃定泰山垃拉太平洋里抛锚。
搿能介事体老多老多，真个是变成一种社会现象了，外加蛮严重。有人讲，结婚率越来越低，是全世界个普遍现象，所以阿拉也勿要心烦了。各种讲法忽略了一点，西方人勿结婚勿等于呒没生活伴侣，也勿等于呒没爱情，中国人，就讲上海人个大多数，勿结婚就等于没生活伴侣，就等于朋友呒没轧成功，只好一直孵垃爷娘屋里。至少也是辜负了老天爷创造女人男人个一片真心。
是勿是老痛苦呢？就像周杰伦《菊花台》里唱的“独留我孤单在湖面神伤”？心里肯定勿愿意迭能，也呒没办法。剩男剩女产生原因交关复杂，写一本一百万字个社会调查报告恐怕也写勿清爽，勿过有一个原因，交关人呒没想到，我想到了：几乎所有个剩男剩女，家境侪是蛮好个，大部分是双亲，而且爷娘还可能是知识分子，勿打勿骂讲道理，家庭气氛温馨，屋里房间好几间，子女一定有一家头独用个卧室；垃拉屋里，子女用勿着交生活费，用勿着付水煤电房，用勿着买菜烧饭，用勿着汏碗扫地叠被头……介好过个日脚，只有垃拉爷娘边浪再会有。如果一旦结了婚，精力，物力，财力，要承担个责任交关交关，还要做交关交关家务，吓也吓煞人了。爷娘屋里条件太好，使得子女想结婚个动力越来越小。要是反过来，一个年轻人，爷娘下岗拿协保工资，每天为了油盐酱醋吵相骂，三个人轧垃一间朝北亭子间，或者爷娘当中还有一个继父继母，关系冷淡……子女就一天也勿想蹲垃屋里，恨不得早一点寻个男朋友或者女朋友……勿妨去看看剩男剩女个家庭结构，大多数条件勿错。古人讲：生于忧患，死于安乐；我拿伊改一改：婚于忧患，剩于安乐。
哪能办呢？总归勿见得要爷娘装出一副晚【me】爷晚娘个凶相赶伊拉跑，装也装勿出个。从小辰光个小皇帝到大年龄个剩男剩女，似乎有眼必然关系个。哪能办？慢慢来，只好迭能介，子女个事体让子女自家去处理仔！马尚龙
|
|
