|
上转说到四马路浪格女人，分为几等几样，有勿勿少少格档次得来，哪么到底有几花式样呢？听倪一点点来说拨耐听。 先来说说“野鸡”，“野鸡”格书面语言叫“雉”，该格字么中国老历八早就有了，《尚书大传》中说“雉者，野鸟。”，而《说文》中亦有“雉有十四种”格说法。野鸡羽毛鲜艳、漂亮非常，戏里厢格武生、武旦穿大靠辰光插勒头浪格翎子，就是用野鸡尾巴做格。 最早格辰光，“野鸡”并勿是贬义词，就连著名格刘四老爷（刘邦）格家小亦叫“雉”，俚哚家姓“吕”，所以名字亦叫“吕雉”。该个女人么，实头是格“女强人”，刘四老爷格天下么，但有有一半要归功拨俚格嗫。不过该篇文章说格是“弱女子”，就勿起谈俚哉。 说到上海滩格野鸡么，就勿对哉，呒没漂漂亮亮格意思，只剩点讨惹厌哉。“野鸡”迭个词勒上海闲话里么，一向勿是啥好么事，经常用来指“勿正宗”格推扳货。譬如有种专门让考勿取大学格人读格学堂，收费么巨来西，教么亦勿教点啥，文凭倒是好混一张，该格学堂么上海闲话就叫做“野鸡大学”。再譬如有种货色，来路勿明、质量搭僵，该种么事就拨人家叫做“野鸡货”。 关歇辰光格上海，已经有了新式格市政管理，各行各业全要捐仔照会么再好做生意，有点黄包车分（未）领照会私下拉客么，就被叫“野鸡车”，就是该歇“差头”格“黑车”，有辰光依然被叫做“野鸡车”。 还有种野鸡更加推扳，清光绪初刊印格《沪游杂记》中有实梗格记载：“有无业游民持扁担绳索立十字街口，为人挑行李。稍一疏忽，即至远飙，俗名‘野鸡’。近来小车盛行，野鸡之肩挑者较少，惟轮船码头尚有此辈……或猝遇野鸡，要当心，随处留心，言明挑值，庶不受需索之患耳。”该种“野鸡生意”么现在车站、码头还有，大家一定要当心。 上海开埠后，租界允许妓女开业，前提是要领仔照会么再好接客，于是关点呒没领过照会的妓女，亦被叫做“野鸡”，而嫖野鸡，则被叫做“打野鸡”。《淞隐漫录》中有记载：“近有所谓‘打野鸡者’，抹粉涂脂，奇形怪状，花街柳陌，扶婢闲行，往往借一榻之烟霞，订三更之云雨；客意既属，则遥指红楼是妾家，不难寻踪而至，较女堂倌之恶习，殆有甚焉。为人上者，奈何竟充耳不闻哉!” 野鸡呒没照会，勿能挂牌营业，别人勿晓得么，野鸡只好自家到马路浪拉人哉啘。每天夜到天一黑么，四马路浪就立仔交关野鸡，该点野鸡实头是勿票标志咯，要是标致仔么亦不用去野鸡，大可以摆仔房间做“长三”或是“么二”勒。实头呒没办法，只好粉么塌得厚点，眉毛么画得弯点，还好夜到看勿清爽，骗骗人么是啦哉。 交关野鸡，或者自家，或者屋里人欠仔债还勿出，就拿该人女人卖拨仔老鸨，野鸡拉勿着客，老鸨就呒拨铜钿，格么就打野鸡，野鸡怕打，只好卖力拉客。作孽是实头作孽格嗫，勿管刮风落雨，三九天落大雪，三伏天起台风，一到夜里么，野鸡就要立勒马路浪拉客。野鸡拉客，独剩拉点乡下人，说关格辰光，有点乡下人被野鸡拖到仔弄堂里么，三五格人一淘上，硬仔仔拿个乡下人拖到窑子里，就算勿哪么，也定其要搞落两钿才能脱身。 勿单实梗，该点野鸡还要“实行抬乡下人的麻糕，以引起男子的性欲狂”（汪仲贤《上海俗语图说》），耐看阿有实梗格穷凶极恶，丑态百出。 野鸡档次低，俚哚格客人亦是呒啥铜钿格“乡下人”，外地来格小商人和贩夫走卒，稍微有点身份格人，怕“失落仔自家格身价”，是万万看勿上野鸡格。而且野鸡亦勿会去拉衣裳挺刮一看就铜钿格人。作啥？该里有格道理格，有铜钿人“懂经”，野鸡拉俚哚，俚哚勿会跟仔进弄堂，只会朝马路当中一走喊外国巡捕。外国巡捕看到去野鸡是要用橡皮警棍打格，所以野鸡勿拉有铜钿人，弄得勿好铜钿呒没赚着还要吃生活得咧。 一直说野鸡推扳，格么到底推扳得哪哼呢？野鸡到底啥价钿呢？勒浪1932年格辰光，是“一炮”一块，“包夜”七块，关格辰光用格是银洋钿，一块银洋钿折库平银子七钱二分，老秤一斤十六两，一两就是31.25克，七钱二分么大约为22.5克，照仔该歇格万国银价么一盎司七块美金勿到点算，一块银洋钿终割着该歇人民币四十块出头。 但是当时辰光格收呒没现在好，所以银子要比该歇实实值铜钿嗫。三四十年代时，工人平均工资是十六块，女工是十二块，关个有名格蓝萍，就是后来做仔“国母”格江青搭仔明星秦怡么，亦只有六十块一个月。关格辰光，一块洋钿好买八斤肉，的确要比现在格四十元人民值铜钿。 说到收入，让倪想起鲁迅来，大家只晓得俚是无产阶级知识分子，争晓得俚是有铜钿得勿得了。俚当时格辰光，1931年收入8909块，1932年是4788块，1933年则有10300块，算是有铜钿得勿得了，俚从1924年到1936年格十二年里，收入折算到现在要有437万得勒，耐说阿算无产阶级格嗫？ 关歇工人四口之家，每月格开销约莫40块，照实梗算来野鸡的确赚得勿多。根据1948年对500名各阶层妓女格调查，平均每月“做工”十趟到三十趟，有的甚至说有六十趟，但总格来说么，实头呒拨多少。关歇胡适每千字三元，郭沫若每千字四块，而梁启超更有每千字廿块得咧。实梗看来，读书人的确是不屑于嫖野鸡格，还是因为该个缘故么，关歇格读书独剩写点“长三”、“么二”格事体，关点流传至令格作品、资料中，对野鸡的描写实头呒没多少，只好从零星格资料里，得窥一斑了。 野鸡已经算得推扳了，啥晓得还有加二推扳格，下转再说吧。 |
|
|
