今朝起分幾隻章節介紹吳越史，時間跨度爲吳越爭霸時代到近代上海个崛起。感謝微信公眾號【吳語】个供稿，小編本著吳越本位个立場擔原文略作修改並使用吳語書面體。由於小編個人水平搭經歷有限，本系列文將來還會得弗斷擴充史料、弗短修訂，貤歡迎大家踴躍投稿、討論多多建言獻策。原文（簡體普通話版）鏈接請撳左下角【閱讀原文】。
原創/guoguo 改編/吳川佐衛門
春秋時期个江南歷史，就是吳國搭越國个興亡史。西元前6世紀，當時个江南還嘞嘞“斷髮文身，祼以爲飾”，根本就是中原人眼裡“豈禮也哉”个蠻夷之邦。但就是嘞此地，吳、越兩個強國突然登上吇歷史舞臺，渠拉个武功震動了中原大地，然後，又突然湮沒無聞，驟興驟亡，真猶如流星一般。
吳、越个興盛，搭闔閭交勾踐个名字密弗可分。
【春秋爭霸圖】，請看吳、越个範圍，基本搭今朝北部吳語區完全一致。（吳越南部地區當時相對人煙稀少）
吳王闔閭，嘞西元前506年，以後世聞名个《孫子兵法》个作者孫武爲將，以區區6萬兵，挑戰強大个楚國，柏舉之戰，五戰五捷，大敗楚軍20萬，僅10日天即進入楚國國都郢（今湖北省江陵西北），創造吇春秋時期攻佔大國都城个先例，乃末吳國威震中原。
繼闔閭之後个吳王，便是伊位任用奸佞伯嚭，殺害忠良伍子胥，寵倖西施个夫差，闔閭離世僅20餘年（西元前473年），吳國便畀“臥薪嚐膽”、“十年生聚，十年教訓”个昔日手下敗將越國滅脫。
越王勾踐滅吳以後，隨即乘勝率兵北渡淮水，會中原齊、晉等諸侯於徐州（今山東滕縣南），向周元王致貢。周元王命使臣賜勾踐胙（送來祭肉），封勾踐爲“侯伯”，晉伯位。自此，越軍橫行江淮一帶，諸侯盡來朝賀，越國个國勢達到了頂峰。
弗過，話起來，箇有如寇仇个吳、越，其實倒是一家人。而且，古人，甚至是春秋戰國時个古人，也明白寔一點。《呂氏春秋》記載了伍子胥話“夫吳之與越也，接土鄰境，壤交通屬，習俗同，言語通”，漢代个趙曄在《吳越春秋·夫差內傳》也寫道：“且吳與越，同音共律，上合星宿，下共一理。” 至於專門記錄越國歷史个《越絕書》更加是直截了當个話：“吳越二邦，同氣共俗”。
從遠古氏族上追溯，吳越本是一脈相承，難分彼此。從錢塘江南岸余姚个河姆渡文化到上海青浦个崧澤文化，嘞寔眼新石器文化遺址中出土个農耕、漁獵工具，陶器搭原居住建築遺址，無弗顯示著共同點，生動个展現吇五、六千多年前，吳越个先民飯稻羹魚、臨水而居个生活格局。從湖州錢三漾出土个古老个絲帛殘片，到吳江梅堰原始陶器上漆繪个春蠶，揭示著一隻共同个信息：東亞絲綢，恰恰就是嘞吳越之地閃爍出頂早个曙光。
史籍流傳个吳越相似个地名人名，諸如：“于越、于陵、於菇、句章、句容、句餘、句無、句注山、句盧山、句繹、姑蘇、姑熊夷、姑蔑、始末、夫椒、烏程、烏傷、余杭、余暨、余姚、餘幹、蕪湖、無池、無錫”、“句踐、句直、余善、余祭、餘昧、無餘、無壬、無疆”貤揭示了當時个兩國人民，同操著百越語言，彼此嘸沒交流障礙。顏師古注《漢書·地理志》曰：“句，音鉤。夷俗語之發聲也亦猶越爲於越也。”故咾“句吳”就是“吳”“於越”就是“越”。其它冠首詞个發語詞性質類似。寔排地名用漢字記錄下來之後，原義漸至湮沒，後世弗知其所由來，往往望文生義，妄加解釋。如以爲“無錫”其地本來產錫，至漢代錫已采盡，故名。或說：“後漢有客於山（指錫山）得銘雲‘有錫兵，天下爭，無錫寧，天下清’。”皆無稽之淡。
由於吳地交越地文化个生成基礎搭文化形態極度一致，尤其經過大規模戰爭等整合，渠拉个文化則更加水乳交融，難以區分，以至於當時渠拉就是以吳越文化一隻整體而存在个。彼此个戰爭，並無礙於文化个整體統一。
勾踐滅吳以後，一度擔越國國都遷到離齊國弗遠个山東琅琊，擺出了逐鹿中原个架勢。弗過越國終究是根基忒淺，講穿吇就是一暴發戶，勾踐死後嘸沒幾許年數就嘞琅琊混弗下去了，故咾又擔國都遷回了江南。
別過，寔趟越國嘸沒撤回到老根據地，也就是現在个紹興，而是擔新个首都建嘞嘞當年仇敵吳國个故都，外加索假擔名字就叫“吳”了。寔個“吳”縣，穿過吇悠悠个歷史歲月，歷時2400年，朆改過歇名，也朆遷過歇地方，一直到廿世紀，渠个中心析出建市，幾十年後又變成吇寔隻市个區爲止。寔個縣个中心，弗用話也曉得了，就是大名鼎鼎个蘇州。
就從伊個辰光起，蘇州變成了江南个首邑，嘞經濟文化哴，引領著江南各地，直到另一座江南城市——上海个興起。
大約模嘞西元前333年，當時个越王無疆又想重現先祖勾踐个輝煌，乃末興兵伐楚。有道是歷史會出現兩趟，第一趟是喜劇，第二趟是悲劇，寔趟，江南人馬畀楚軍打得落花流水，無疆畀殺脫，楚軍趁勢反攻，一直打到吇錢塘江。勾踐以來个努力付諸東流，越人又退化成了各個部落，並臣服於楚國。嘞楚國个統治時期，蘇州曾變成戰國四公子之一个春申君黃歇个封地（西元前248年）。有人話渠个封地就是上海，故咾上海別稱“申”是紀念黃歇个，實在頗爲無稽，因爲上海市區嘞嘞春秋戰國个辰光，尚在海底。
又過吇一百多年，秦王嬴政滅脫六國，尊號秦始皇，擔天下分作36郡。江南劃入吇會稽郡，寔個名字个來源自然是紹興个會稽山了，而郡治仍舊是吳縣（蘇州），寔兩隻名稱，作興反映吇吳越一體个思想。
在秦个會稽郡所轄个26縣裡，有些縣名一直使用到現在，比如丹徒、諸暨、鄞縣、海鹽、余杭，當然，其他一排縣名還是陌生个，比如陽羨（今朝个宜興）、由拳（今朝个嘉興）、烏程（今朝个湖州）、烏傷（義烏）等。此後个歲月裡，伴隨著經濟个發展，縣會越來越多，名字越會越來越爲今朝个人們所熟悉。
江南嘞楚國統治時期畀稱作“東楚”，至於民風，依舊繼承吇當年吳越个勇悍，（一直到漢朝，還畀稱作“吳、會稽輕悍”），所以才有得楚國貴族後裔个項羽嘞蘇州起事反抗“暴秦”，帶領八千江東子弟兵，橫行中原之舉。
項羽嘞吳郡長大，起事於江東。末腳兵敗無顏見江東父老，自刎於烏江
楚漢相爭，終於鹿死“漢”手，劉邦嘞長安登基，建立煌煌四百年个大漢王朝。江南依舊是會稽郡，郡治依舊是吳縣。 就嘞漢朝个辰光，又一隻熟悉个地名，畀歷史記錄下來，箇就是“揚州”。
相傳大禹治水後，分天下爲九州，揚州即其中之一。《爾雅·釋地篇第九》寫著：“江南曰揚州。”“江”即長江。按照東晉郭璞个《爾雅注》，寔個“揚州”个範圍是：“自江南至海”。即是話長江以南到南海以北是揚州，大約模今江蘇、安徽長江以南部分，上海、浙江、福建全部，江西、廣東个一部分。
但大禹个九州，畢竟衹是一隻傳說，“揚州”真正有吇確切个地域劃分，要到漢武帝分天下爲十三區，置刺史，稱“十三刺史部”，簡稱“十三部”。因爲其中十一部沿用个是《尚書·禹貢》搭《周禮·職方》个“九州”名號，故咾習慣上又稱“十三州”，“揚州”也是其中之一，全稱揚州刺史部，轄區相當於今安徽淮河以南部分，江蘇長江以南部分，上海、江西、浙江、福建全部，湖北、河南部分地區。
要註意个是，今朝个揚州市弗屬於揚州刺史部，而屬於另外一個刺史部——徐州刺史部，搭當時个“揚州”一點關係都嘸沒。揚州從江南搬到江北，要到800年以後个唐朝，而伊個辰光个“州”，已經遍佈各地，大體搭秦漢个“郡”相當，早已弗復當年九州之一个殊榮。
寔歇，由於揚州嘞兩漢个大部分辰光裡向並弗是行政區而衹是監察區，故咾其治所（如曆陽，今朝个安徽和縣）弗是真正意義上哴行政中心，貤弗是經濟、文化中心。兩漢辰光个揚州頂發達个城市交政治、經濟、文化中心搭漢朝以前一樣依舊是吳縣（蘇州）。
·未完待續·
微信號：intersoutheast
投稿郵箱：intersoutheast@outlook.com
掃一掃或到頁面最上方可關注本公眾號
|
