難得有一日假期,貌似好難決定去邊好,一陣拗拗吓都天黑。如果你又想睇古蹟,又想睇自然風景,最緊要係行得舒服又唔難去的話,鶴咀可能啱你。
鶴咀有一個好特別嘅英文名(Cape D’Aguilar),係用嚟紀念當年曾任駐港英軍總司令同第一任副港督嘅德忌笠少將(Sir George Charles D'Aguilar, 1784-1855)。鶴咀喺港島南石澳附近,最方便前往嘅方法係喺筲箕灣巴士站搭9號巴士去到鶴咀巴士站落車,再一直沿住鶴咀道行入去。
鶴咀有好多值得欣賞嘅景色,依家等小編帶大家沿住鶴咀道一路行介紹各個景點啦。
繼續行經過職員宿舍就會見到鶴咀燈塔。鶴咀燈塔喺1875年落成,係香港現存最古老嘅燈塔,仲於2006年列入香港法定古蹟,極具歷史價值。當年香港啱啱成為英國殖民地,貨物來往開始增加,為咗應付日益繁忙嘅水上交通,港英政府決定喺香港島東南嘅一個海角-鶴咀興建燈塔(點解唔喺遠啲嘅離島起?因為當年未拎到九龍同新界囉),後來鶴咀燈塔嘅功能畀橫瀾島燈塔取代咗之後亦都停止運作。不過喺1975年鶴咀燈塔改為自動化操作後,已經重新投入服務。
沿路會見到一個入口,沿住樓梯行落雷音洞。雷音洞其實一條好大嘅裂縫,可以直接望到海,可能係因為喺入面聽海浪聲量之大而得到雷音洞喱個名。
去完雷音洞之後就可以繼續向前行往蟹洞進發,沿路會見到香港大學太古海洋科學研究所。
經過鯨魚骨會見到隔嚟有一條樓梯,沿住下落去之後轉左一直行就會見到蟹洞喇。
小編建議大家太陽落山前好走喇,因為入夜後鶴咀道就會漆黑一片燈都冇幾盞,黑媽媽一路行番出巴士站仲要聽到狗吠聲都咪話唔驚。
以上嘅路綫係最容易行嘅,基本上全部都係石屎路。但如果你唔驚辛苦想睇多少少野嘅,小編推介多兩個景點畀你。
喺未行到去鶴咀村之前,會見到一個梅菜園。喱度嘅石澳梅菜好出名?。 梅菜園嘅對面會見到一條小路。樹枝上都有前人綁結提示。
沿路都會見到好多結提醒大家行邊個方向,多謝之前綁低個結嘅人啊! (小編覺得嘅)恐怖山路(一) (小編覺得嘅)恐怖山路(二)
睇地圖會見到鶴咀半島總共有三條村:鶴咀村、鶴咀下村、芽菜坑村。鶴咀村同芽菜坑村頭先都已經提及,咁剩低一條喺邊呢? 沿路行到咁上去就會見到有啲廢棄咗嘅屋,喱度其實就係已荒廢嘅鶴咀下村。 屋入面嘅環境。
終於見到海邊喇!沿海嘅一段路比較陡峭,要小心啊。(不過都係有前人綁嘅繩輔助嘅,再一次多謝前人!)
去到海邊你會見到一座機槍堡。喱座機槍堡係鶴咀炮台嘅一部分,喺二戰嘅時候興建用作抵抗日軍,後來戰綫後退至赤柱嘅時候守軍奉命破壞喱度,就係現時見到嘅模樣。可能政府都知會有人嚟,所以都有清理過啲瓦礫,同埋樹立咗一個解說嘅牌係隔嚟。鶴咀炮台現時獲評為二級歷史建築。
遠望機槍堡。 冇錯,對面岸就係赤柱喇。(其實睇地圖都會知haha)相片入面係見到美利樓?。 喺機槍堡入面眺望,可以想像吓當時守軍嘅情況。 從另一個角度望機槍堡。 睇完之後就要由海邊行番上山喇。圖係小編終於行到番小路入口嘅時候影嘅。
最後有一啲小小嘅提醒:
雖然網上嘅資訊話9號巴士淨係假日先經過鶴咀巴士站,但小編喺平日搭9號都有經過,上巴士之前可以先問吓司機大佬。
鶴咀係香港唯一一個海岸保護區,名義上都係一個禁區,漁農署唔建議大家前往,入面亦都冇公眾廁所,要去廁所嘅就要事前去定喇。
仲有,雖然都講到爛,但大家遊覽嘅時候都要謹記愛護大自然,小編行山路嘅時候都見到有好多垃圾。容許小編做一個噚氣嘅啊叔再同大家講一次,千祈千祈千祈,記住記住記住,唔好亂拋垃圾啊,同埋唔好改變當地嘅環境,例如喺廢村執走一啲廢棄嘅用品,參觀鶴咀村嘅時候都盡量唔好大聲喧嘩。希望大家睇每一個地方除咗覺得好靚之外,仲可以同時細味吓喱個屬於香港嘅一小段歷史啦。
撰文:Kevin@EHK編輯組
|
|