|
一讲到寻根，好多人都觉得呢个係退休人士做嘅事。又或者你睇电视会见到一啲海外华侨翻中国寻根嘅报道，认为只有海外华侨先会做嘅事。但其实寻根唔係你想象中甘难、甘遥远噶。最简单嘅一个问题：你自己父亲嘅事就应该知道唔少啦，甘你知唔知道你阿爷係喺边度出世噶？佢喺上世纪嘅动荡经历又係点噶呢？大部分嘅人都应该知道自己阿爷叫咩名，但係如果问到太公叫咩名，就真系好多人唔知啦。
谂深一层，如果你连你太公个名都唔知，或者你阿爷一生做过乜又唔知，甘你自己将来嘅孙仔孙女都好有可能对你乜都唔知，甚至乎连你叫咩名都唔知。所以话，点解中国人喺历史上甘重视寻根问祖，而且家庭观念又甘强，就係因为呢个係一种文化嘅传承，亦都係一种对太公嘅“记忆”。
其实要开始寻根，需要嘅野唔多，有几个主要嘅“寻根要素”：
祖居地： 即係你太公同家族世代居住嘅地方。中国人正在经历一场大迁徙（城镇化！），但係以前嘅人係世代都住同一个地方，同一条村嘅。所以知道祖居地喺边度係最关键嘅。
始祖：始祖分两种嘅，第一种係搬去你条村住嘅开村始祖，第二种通常係搬去一个城市或省份嘅始祖。除咗佢嘅名之外，你要了解下佢有冇“字”、“号”，同埋佢嘅生活年代同平生事迹。佢係由边度搬黎噶？点解要搬黎嘅？通常係有啲历史原因噶。
祠堂：虽然话好多祠堂都已经喺上世纪俾人拆咗，但係广东地区保留嘅祠堂都仲有好多。就算拆咗都有人记得佢嘅位置，佢嘅名。仲有就係祠堂嘅“堂号”同埋“楹联”（即係祠堂门口两边嘅对联）。呢啲都係重要嘅寻根信息。
字辈：古代嘅家族基本上改名都要按字辈排，就算通用嘅名唔係按字辈排，族谱入面都会记载第二个名係按字辈排（又叫做“谱名”）。呢啲字辈通常係一首诗，就算你唔知道成首诗，知道几个字都係线索嚟噶！
族谱：呢个最简单啦，如果家族已经有族谱嘅话（不管係新修又好，或者旧又好），呢啲族谱就係你太公留俾你最好嘅寻根线索啦！
好啦~ 依家你知道有边几个寻根要素啦，甘究竟点开始呢？
问人咯！：就算你好少同屋企啲老人家倾偈，只要你肯问，老人家最钟意讲古老故事噶啦。你可以访问一下屋企嘅老人，记低佢地记忆中嘅信息。一定要尽快用照片、录音、录像嚟记低老人嘅手抄或口述资料，因为老人家一走就冇机会噶啦！（小编阿爷啱啱过身，但係小编好多年前就已经详细访问过啦，所以虽然好伤心，但係冇甘大遗憾~）
拜山睇墓碑：通常碑文上面有名、有年份、有配偶、有子孙等等嘅信息。可以用手抄方式嚟记低碑文。广东人避忌用相机影墓碑，但其实如果你个心係为咗寻根，祖先都会保佑你啦！
|
