|
有時候，就算入咗一間好公司，但係上司、同事只顧玩辦公室政治的話，工作環境一樣咁唔理想。打緊工嘅你，跟住以下 Checklist 睇下自己宜家有無跟啱人啦！ 一、除非你好高職位，
否則有個好上司重要過好老細作為食物鏈最低層，其實有個好嘅直屬上司重要過有個好老細。就算大老細領導高明，如果撞著個唔好嘅上司，你日子都好難過，更莫論個人成長。所以除咗睇大老細行事作風如何之外，直屬上司嘅價值觀都好值得留意。 二、敢於讓下屬犯錯嘅上司，方為好上司
一個開明、有助於你成長嘅上司，唔會以經驗嚟判斷下屬嘅能力。相反，好嘅上司會花心思發掘下屬潛力，比機會佢地嘗試、學習、成長。 好多時，一個 Task 如果由上司自己落手落腳做，比起教一個新人做，成效會更快更好。不過一個聰明嘅上司唔會為咗慳嗰初段嘅時間同耐性，而放棄培養一個日後幫到佢手嘅人才。 對於無咩經驗嘅職場小薯嚟講，跟呢類型上司做嘢，先有機會學到嘢。 三、有「自己生活」嘅上司，下屬先會有 Work-life Balance假如你嘅上司完全無其他愛好，生活只有得工作呢個重心，咁小編就真係恭喜你啊～ 你都唔使旨意有自己生活；就算放咗工，上司都會 Expect 你隨傳隨到，無時無刻都係以公司為上。 一個有良好生活習慣同業餘愛好嘅上司，會更加識得喺工作之餘調節壓力同情緒，通常 EQ 比較高，跟呢類型人做嘢唔需要咁心驚膽跳，亦無咁大機會比人當係小齒輪。 四、真正聰明嘅領袖，有功唔會自己領一個聰明嘅人，唔會為咗短期利益而放棄長線回報。將唔屬於自己嘅功勞歸比自己，係一種無自信嘅表現；呢類型嘅人心底裡其實好缺乏安全感，怕比人取代。 聰明嘅領袖會適時將功勞歸比做得嘢嘅下屬，甚至係老細面前為同事美言；因為佢地有足夠自信，唔會擔心人地做得好，就顯得自己唔好。同時亦明白，成績被表揚，只會更鼓勵下屬努力工作，對自己百利而無一害。 以上四點，教你睇清楚自己有無跟啱上司；有固然好，應該把握機會學盡上司好嘢，唔理係 Soft Skills 定 Hard Skills。假如跟著一個唔好嘅上司，都係盡快轉工好過。
|
