上海闲话哪能讲

2019年02月10日 星期日   

　　文 / 许德华

　　前几天，阿拉几个市老年大学个同学辣微信群里讨论上海闲话里个几个多音字应该哪能讲，譬如“梦”字既可以读作“mong”，又可以读作“mang”。有人问，《红楼梦》个“梦”用上海闲话应该哪能读？我因为听过滑稽戏演员钱程个讲座，晓得“梦”字辣搿搭应该“文读”，读作“mong”。“大”字上海话可以读作“da”，也可以读作“du”，例如：大（du）肚皮、大（da）饼。“耳”字上海话可以读作“er”，也可以读作“ni”，例如：耳（ni）朵、木耳（er）。还有“龚”字，上海话可读作“gong”，也可读作“jun”，用作姓氏个辰光，“龚”就读作“jun”。

　　讨论到搿搭，有同学感叹，阿拉搿点同学大多数侪是上海人，但是阿拉小囡只会讲普通话，实在可惜。另外一个男同学康乐也回忆起小辰光个事体，伊读小学个辰光，学堂里推广普通话，不仅要求课堂浪讲普通话，而且提倡回到屋里也要讲。伊按照要求回去讲普通话，结果伊拉姆妈不开心了，对伊讲:“好了，好了，弯舌头，难听煞了。到外头去！阿拉就是石刮铁硬个宁波闲话”。伊觉得，要求辣学堂里讲普通话还是蛮有好处嗰，毕竟汉语拼音侪是按普通话编写，推广普通话对学习拼音绝对是有利嗰。但是要求平常生活当中勿讲上海闲话也会带来副作用，结果就是交关小囡上海闲话讲勿来，“山楂片”讲成“三只屁”。现在伊就要求儿子辣屋里就要讲上海闲话。听了康乐个发言，群里向个人侪用张嘴大笑个表情包进行回复，虽然勿是视频，但是我好像看到老同学侪辣哈哈大笑。是啊，我就因为深有同感而感到好笑。

　　我爷娘侪是北方人，讲勿来上海话，但是我是辣上海出生嗰，从小搭仔左邻右舍个小朋友一道白相，一道读书，所以上海闲话就讲得交关好。小学5年级个辰光，学堂里开始推广普通闲话，要求辣学堂里不许讲包括上海闲话在内个各种方言。后来，我因为普通话讲得好，被推选为“推普员”，朗诵、喊口令，邪气风光！再后来，我当老师教语文，按当前要求普通话二级甲等。勿过，我上海闲话同样讲得好啊。啥人晓得现在上海小孩就讲勿好上海闲话了呢。进入新世纪以后，交关有识之士提议要保护上海方言，市政府也做了勿少工作。

　　搿歇想来，普通话当然要会讲，但是上海闲话也要会讲，就好像百花园里应该百花齐放。上海小囡爱家乡，就从会讲上海闲话做起来。我老早是“推普员”，迭歇我要成为“推沪员”，尽力传承发扬上海闲话，让周围邻居，特别是新上海人，也能脱口而出讲两句常用个上海闲话。