前两天,听说港新民夜报高头,登了一篇啥额文章,只戆棺材敢港阿拉上海闲话呒么文化一刚。真真好白相色特了,港啥额闲话,格桩事体跟文化有啥朗搭界啦? 吾是从小就欢喜吴语,港起来,插一句外头闲话,现在老多上海小宁,“吾”迭额字,发音不对头,应当是港“Ngu”,伐是“wu”,后头格发音,是江北宁港额,不正宗额。回过来港,小晨光,伐管是屋里厢额宁,外头买么事额宁,还是幼儿园学堂里厢额老师,除特上语文课读课文之外,统统港上海闲话。印象老深刻额,有一桩事体,上海闲话里厢,老尊重老师额,所有额老师,定规要叫“先生”额,记得初一额辰光,有一趟跑到老师办公室,看到台子郎厢一张调课通知,抬头就是“×××先生”,一记头就觉着,阿拉学堂,到底是教会学堂出身,迭种底蕴,迭种文化,真真呒闲话港了。 吾觉着,吴语区额方言,好比讲最最核心额苏州闲话,还有上海闲话、无锡闲话、等等迭种吴语区额闲话。 一方面从听觉来港,嗲,糯,笃悠悠,适宜,老早有一句闲话,叫“宁与苏州宁想骂,不与山东宁港话”,就是迭额意思。 另外一方面,从音律学来港,现在额普通闲话,一沓瓜子只有4声,老多古音里厢额字,用伊一读就伐对了,比方港阿拉小晨光学过额一首唐诗,里厢有一句“乌衣巷口夕阳斜”,此地额“斜”要读作xia,为啥,因为读成功xie就伐是古音了,就伐押韵了,但是侬用吴语一读,定规就是对额;再比方港古音里厢额“县”,是要读成功“悬”xuan额,侬再看阿拉吴语里厢,本身额读音就是"yuan"了,迭额跟“悬”额读音阿是一样额。 伐光是吴语,老多地方额方言,尤其是南方额方言,从音律学郎向来港,跟古汉语是统一额,从格点来港,普通闲话是不利额。 另外港到,此地,吾绝对呒么看不起外地闲话额地方,要晓得,沪语里厢额老多字,阿是从其他地区甚至于其他国家额闲话当中过来额。吾只是想港,伐管是阿里额地方额闲话,伊有的自家额历史,自家额文化。一个宁,有伐有文化,实在伐是从伊港啥额闲话高头可以港额。就比方港迭篇文章额开头,提到了新民夜报登额一篇文章,高头港陆家嘴额宁港普通闲话,个么,首先,陆家嘴额宁并伐代表就有文化,更何况,以吾勒陆家嘴老长辰光额实习来看,勒陆家嘴,上海闲话额覆盖面好好教要比普通闲话来得广。据吾晓得,写伊篇文章额赤佬,自家阿就是上师大中文系额,哦哟,阿伐看看自家啥额背景,就管港“文化”了,笑色特吾。 吾切死特上海,吾切死特上海闲话。最后,附一首歌词,恋爱上海: 长了上海,哪能勿爱 |
|