|
石库门男人 原创：俞浩卿 沪语改写：郭莉 朗读：小文（上海新闻广播） 推荐：丁迪蒙 （朗读者近照） 石库门男人 来自吳越小豬 00:00 07:18 上海男人名气蛮响，有一抢，连得日本女人也想嫁拨上海男人。侪晓得石库门代表上海个建筑风貌，其实石库门男人再是上海男人个风向标，当然也是石库门建筑个“顶梁柱”。 石库门里向邪气有名堂经：客堂间、前楼、后楼、东厢房、西厢房，还有灶披间、亭子间、晒台咾啥。石库门男人当然对迭眼了如指掌，还要勒里向拿浆糊淘得灵光。 一早浪向，拨女人摇醒个男人，还是睏痴懵懂，但是天经地义个，必须快点碌起来，问了几句女人要吃点啥，就要紧勿煞出去买小菜、买点心了。回来吃好早饭，又立马变了一个人：侬看伊头势清爽，衣裳笔挺，皮鞋锃亮，拎仔只皮包，像模像样出去上班了。 石库门男人样样会得做。我也好算是其中之一。从前有一抢流行自家做沙发，我也跟风学习，做了只双人沙发。大红个人造革面子，看上去弹眼落睛。隔壁邻舍看见搭我娘讲：“（亻那）阿四头蛮来三个。”我娘听了当然开心煞！不过沙发做好没享受几天，就拨要结婚个亲眷看中，一定要我卖拨伊，我当然是勿舍得个，我娘讲：“结婚是大事体，侬就拨伊吧，覅收伊铜钿，就算是送伊个结婚礼物。”我也只好听娘个言话，忍痛割爱。 后来我自家轧了一段辰光女朋友，总算预约到了“上门通行证”。丈母娘屋里住勒前楼，汏菜、汏衣裳侪要到楼下头个灶披间，跟人家佮用一只水斗，真是勿便当。我看丈母娘拉房门口有一小块扁扁长长个地方，正好可以装只水斗，就量好了尺寸，但是跑了大半只上海也寻勿到合适个，只好自家动手做。其实我从来也呒没做过迭个，哪能办？想想自家身份还是“毛脚”，丈母娘搿一关是邪气关键个，再难也要试试。就凭我石库门男人个“三脚猫”木匠功夫，寻了几块旧木板做模板，又用几根粗铅丝来代替细钢筋，做好弄好，过脱两天，让水泥达到一定个强度，再拿模板拆脱，又勒里向贴几块白瓷砖，样子终于出来了，蛮挺刮个。我一个人前后忙了一个多礼拜总算搞定，水龙头一开，水哗哗哗流下来，心里开心啊，晓得搿趟事体做得漂亮。再一看丈母娘面孔浪个笑容，我心里有数，自家“毛脚女婿”转正，已经呒没啥问题了。 石库门男人生活态度认真。除了自家会做生活，还对足球情有独钟。阿拉搿一代男人，啥人勿晓得申花？啥人叫勿出徐根宝、范志毅、谢晖？一到申花队比赛进球，弄堂里一片哇啦哇啦个叫声，“进了——！”迭个辰光男人也勿去管伊啥个女人开心勿开心了，电视机开得咣咣响，赤膊摇了蒲扇，手舞足蹈，只管自家发疯！ 有武个，当然也有文个。讲到石库门男人，总归也要讲讲腔调老浓个老克勒。老克勒一早跑到“德大”去报到，一边像真个一样吃咖啡，一边偏生用大饼油条来过。还要天南地北，国内国外吹一通。老克勒生活精致，勿关穿着、仪表、讲言话，一举一动侪显出与众不同。伊拉勿仅腔调好，还蛮有情调，对待女人总归温文尔雅，风度翩翩。不过言话是搿能讲，弄堂里一般男人看老克勒个眼光，总归还是有眼“怪”个。有一日我下班刚刚弯进小弄堂，突然看见“东厢房老克勒”背勒对过“亭子间老太”往弄堂口跑，我要紧跟到弄堂口，看到老克勒已经抱勒老太太上了出租车。回到弄堂里再晓得伊是送老太到医院里去。乃么我对身边个迭位老克勒肃然起敬，弄堂里别个男人也对伊有了好感。 石库门男人对女人侪老好，不过伊拉是勿讲“爱”个，叫“欢喜”，欢喜女人就对女人好。自家勒屋里是上得厅堂下得厨房，样样会做。个个男人侪懂得啥个是生活中个精致搭优雅，迭个就是石库门男人个标识度。 不过表面光光爽爽个石库门男人，其实内心深处还是有一种“压抑”个。搿种压抑，是克己奉公，是从善如流，是关爱他人。就是搿份拎得清个“克己”，再造就了石库门男人，迭个也是一代上海男人个社会美誉。 当然，石库门男人个迭眼小压抑，小伤痛，碰着仔石库门女人个一“作”一“嗲”，乃末好，顷刻之间侪化成了水，日脚就搿恁一天天流进时光长河了。 搿个，就是平衡，平衡就是万物生存个自然法则呀。 |
|
|
