|
册那小议 来自上海言话讲起来 00:00 05:56 沪语朗读：王震 作者：陈永生 沪语改写：丁迪蒙 上海闲话当中个“册那”，肯定是个龌龊词语，尤其是后头还带“娘”个伊钟五个字个动宾短语，则更加是骂人个闲话。 但是，有眼人却是常庄使用迭个“册那”，更加结棍个竟然到了呒沒迭个词就勿能开口个程度，一旦讲闲话，先出来“册那”，接下去勿断，直到闭牢嘴巴。 侬假使讲伊是勒骂人伐，真个是有眼冤枉伊了，因为伊讲闲话个对象侪是亲朋好友，就连得搭自家个父母、屋里人讲闲话个辰光也是搿能个，可见，“册那”已经是成为了伊个口头语了。所以，辰光长了，上海人对满嘴巴“册那、册那”个人也就见怪勿怪、呒没人在乎了。 从语言学个角度来看，既然迭个“册那”勿是骂人个，葛就说明伊已经虚化了，也就是讲勿再是个有词汇意义个实词了，而是一个已经退化成为只存有语法意义个虚词了。 虚词，也要分好几类，葛末，“册那”算是阿里一个种类呢？ 我觉着勒搿种语言环境里向，伊应该相当于一个语气词。讲句笑话，有点象古代汉语当中个句首发语词，譬如“夫”、“盖”咾啥，因为搿些词出现勒勒句首是呒没实在意义个，只不过是起发语个作用，表示接下来有闲话要讲、有议论要发表。而伊眼“册那”勿离口个人，勿是同样也是先来个“册那”，接下去再有下文个嘛？勒搿种情况下头，“册那”个发语作用就邪气明显了。 当然咾，“册那”也勿完全等同于句首发语词，因为发语词仅仅是“启下”而勿是“承上”个。“册那”就勿是搿能，伊既承前、又启后，好比是扑克牌当中个A，两头通。搿也就是讲，“册那”勒某些人个嘴巴里，只是表示停顿、表示衔接而已，伊会得周而复始个出现，勿断个“继往开来”。 仔细想想，觉着“册那”有点类似于现在个年轻人，勒讲普通话个辰光经常要用个伊个“然后”。沒讲几句就是一个“然后”，讲了几句又是一个“然后”，接连勿断，层出勿穷。其实，“然后”下头个闲话並勿一定是顺叙，插叙、倒叙侪是有可能个。 同样，搿种现象勒英语当中也有个，一些女青年讲闲话个辰时会得经常勿停个使用like，其实，搿种语境当中个like已经呒没“象”个词义，只是一种口气，表示承接。 “册那”除脱仔表示发语搭仔承接以外，有辰光还可以单独使用，表示感叹或者惊叹，勒搿种情况下头，伊就成为了一个叹词。 讲闲话带“册那”个上海人里向，从性别看，比较多个是男性，女性邪气少，一旦女人用了搿种词语，就显得有眼“口粗”或者是“男人腔”；从年龄上头看，一般是“爷叔”或者年纪更加大眼个，青少年相对要少。 搿搭要提一提个是，改革开放以后，交关外籍人进到上海来，辰光长了，其中有勿少人上海闲话讲得邪气好，有个甚至一时头里老难听得出伊是“新上海人”还是“老上海人”。不过，鉴别个办法好像还是有个，葛就是“新上海人”讲闲话一般是勿带“册那”个，反过来，闲话里带迭个词个，十有八九是“老上海人”。 搿搭需要说明一下个是，从形式逻辑个角度来看，“讲闲话带‘册那’个”搭仔“老上海人”是从属关系，所以，闲话千万勿可倒过来讲，搿就好比“猪猡是四只脚个”，但是侬勿好讲“四只脚个侪是猪猡”，因为还有牛、马，还有台子、椅子咾啥。 斗转星移，移风易俗，现在个上海年轻人讲闲话带搿种“标点符号”个逐渐少了，搿表明，“册那”也将随牢社会个进步而日薄西山、气息奄奄。 最后，小结一下，勒上海，一旦碰着嘴巴里向带“册那”个，侬千万勿要以为伊勒骂人，外地来个朋友勿要因此而引起误会了。 |
|
|
