山里面会不会住着精灵 离开贝尔格莱德,伲下一站是Mokra Gora,一个勒海塞尔维亚西面近山区个小山村。 从贝尔格莱德去Mokra Gora个车子来得个少,伲提前一日天认仔好路,买好仔隔日大清老早个车票。 很容易弄丢的大巴票 去Mokra Gora个路浪会经过一个稍微大一点个城市乌日策Uzice,可以先去乌日策,再转车,实梗能选择个车次多点。但不过伲为仔省力,就买仔早浪七点半个车票,直奔Mokra Gora。 山里的小城市——乌日策 Uzice 因为地方忒小,Mokra Gora是无不汽车站个。上车以前要搭司机讲一讲目的地,到辰光俚就会得提醒倷下车个。 下车个辰光伲两家头真个有点头脑子发胀,两眼发黑。伲晓得Mokra Gora小,朆壳张小成实梗样子。村里只有一只超市,一只餐厅,真真叫好体验一把隐居个生活哉。 往Mokra Gora路上的山村景色 伲住个也是当地有特色个木房子,离下车点倒弗远,走过一条小溪就到哉。 羊儿它还在山上吃草 迎接伲个是一个胖笃笃个塞尔维亚老伯伯,俚弗会得讲英语,一早端正好仔只手机做翻译,沟通倒也无啥障碍。 荒归荒,看见木房子个辰光我搭伲妹子侪熬弗牢尖叫哉。 我们住的小木屋,啊我死了 一大片草坪浪点缀仔几只尖尖顶,门前一条种满鲜花个小路,远远叫山浪向烟雾缭绕,真个有一种童话世界个感觉。 放脱行李,伲就上山寻火车站哉。千里迢迢到Mokra Gora为个就是乘一乘该个世界浪唯一一条狭轨小火车哉。 8字窄轨小火车 小火车个班次弗多,一日只有三四班,伲到个辰光一点半个票已经卖光哉。伲提前买四点半个票,朆壳张售票员弗会英语,鸡同鸭讲仔半日交流无果。 着生头里,伲想着仔房东老伯伯,豪燥下载仔个翻译器,总算买着仔票。 绿漆的火车头 Mokra Gora唯一个餐厅就勒海火车站边浪,菜式搭贝尔格莱德大推为,但味道还可以。 叫俚萨尔干8字小火车是因为从空中看,火车铁轨呈8字,勒海山里穿梭。 山里的萨尔干 勒海上个世纪初,南斯拉夫勒该搭修建仔贝尔格莱德——萨拉热窝狭轨铁路,被称为南斯拉夫生命线。后首来因为现代铁路个发展,该条铁路慢慢叫没落哉。 进山的古旧隧道 90年代初,当地村民重建仔该条8字型爬山铁路,现在也是Mokra Gora吸引大批游客个关键。 停站看风景 除脱绿皮车头,火车车身侪是木结构,车窗是搿种老式个火车窗,可以推上去个。一路浪转弯个辰光,终归能拍着探出车厢个笑脸。 木头车身里探出的笑脸,他们都是些小学生o.o 火车行程共总两个钟头弗到,路浪会停四五站拨大家下车拍照。 游客们的日常 假使要想看啥个惊艳个风景,该搭是无不个,最适合个就是听仔歌,勒海车厢里慢慢叫摇,静静叫放空。 《生活是个奇迹》拍摄场景之一 火车到站以后,伲本来还想去山上看一看木头城,搿个是塞尔维亚导演为仔拍《生活是个奇迹》造个,整个还原仔塞尔维亚传统山村个风格。 木头城,可惜没去成 但不过回程个辰光天已经有点阴则,伲怕落雨就朆再上山。 刚巧回到木房子里,一谢大雨就下来哉。 木屋听雨,别有一番意趣。还有两只避雨个小猫跑到仔伲个廊屋里,妹子就倒仔点牛奶拨俚笃吃。 避雨的小白和小花 大雨过后,空气里一阵一阵个青草香,但不过随之而来个就是跳水个温度。我还好,伲妹子只带仔热天个衣裳,冻得嗦嗦抖。 已经冻成蚕宝宝的妹子 为仔暖热点,伲决定烧点吃个,但不过村窠窠里,啥物事也无不,只好买仔两袋弗晓得啥个国家个方便面,啪仔两只蛋,切仔两只番茄当夜饭。 清汤寡水的晚饭 还好房间里个铺盖还比较暖热,伲拿衣裳侪拿出来盖勒身浪,度过仔小木屋里冷漓漓个一夜天。 再会 Mokra Gora 文 | 予安 版 | 予安 |
|