|
淮海中路法国领事馆与纺织大亨的故事 原创：薛理勇 来源：上海交大建筑遗产保护中心 2020.3.13 上海话改写：郭莉 朗读：俞颖 推荐：丁迪蒙 点击下方收听音频，时长11分43秒。 进入21世纪个第一年，香港纺织业巨擘、香港棉纺同业公会主席、香港工业总会主席、香港总商会副主席唐翔千先生再次来到上海，伊搿趟个目的之一，就是应法国驻上海总领事馆邀请，协商解决唐家勒勒上海个祖产——淮海中路1449号，就是现在法国驻上海总领事馆个房屋产权转让问题。迭个房产是1947年转到唐翔千个父亲唐君远名下个，迭个一年齐巧唐翔千到英国、美国去深造了，等到伊再有机会回到上海辰光，唐氏家族老早搬脱了，所以唐翔千呒没机会走进搿幢房子。 现在，让阿拉从头讲起吧。 1843年上海正式开埠，逐渐发展成“冒险家的乐园”。大约是20世纪初，有一个叫巴塞个西班牙修士，带了奥古斯丁会成员几个人到了上海。奥古斯丁会是跨国籍个托钵修士组织，根据教会章程，奥古斯丁会成员必须过集体修士生活，勿允许有私人财产。经过一段辰光观察，伊拉决定办一份叫做《宗教生活》个月刊。伊拉派人带相机到城市下层搭仔中国乡下，拍摄中国贫穷落后真相，想通过迭个告诉读者，中国穷人迫切希望西方教化，需要上帝拯救。 其实迭眼杂志只有少量运到了欧洲，大部分还是运到对中国、对上海邪气陌生个南美洲天主教国家。果然，交关海外天主教徒看到杂志，对处于水深火热之中个中国人民表示深切同情搭仔怜悯，也对上海奥古斯丁会工作表示肯定搭仔支持。乃末，每日天有交关捐款从欧洲、南美洲汇到上海奥古斯丁宗教团体名下。其实1920年，上海真正个西班牙奥古斯丁会修士只有六个人，为了继续收取海外捐款，伊拉就勒辣莫利哀路6号搭仔爱文义路1220弄2号兴建了“望德堂账房”，六个修士讲起来还算是过集体生活个。 西班牙远在欧洲，上海奥古斯丁会是一个完全单独行动个宗教团体，根本呒没领导伊拉个上级组织，所以伊拉收到源源勿断、又完全勿必担心查账个汇款以后，就拿搿眼汇款投资上海个不动产业，其中有邪气大个数目是投资上海房地产个。每年高额收入使得迭眼修士个意志、思想侪发生了变化，一个个侪以富商自居了。现在淮海中路1449号住宅就是奥古斯丁会投资兴建个，房产登记是“巴塞住宅”。房子占地面积十几亩；主建筑勒勒一大块草坪当中，是典型个西班牙风格。
西班牙奥古斯丁会勒勒上海敛财个行为，受到西班牙政府搭仔各国天主教会注意，三十年代，西班牙政府对伊拉进行了调查，没收了巴塞住宅。
西班牙是1858年跟中国正式建交个，西班牙驻上海领事馆1880年左右开设。早期西班牙驻上海领事一般侪是委托商人担任，办公室也跟牢担任领事个商人搬来搬去。到了1934年，经西班牙政府允许，被没收个巴塞住宅升起了西班牙共和国国旗，成了西班牙驻上海领事馆。但是，只过了几年，西班牙内战爆发，1937年2月22日，西班牙驻上海领事馆就拨中国政府关闭了。
西班牙总领事馆撤走离开，伊拉拿勒勒上海个西班牙政府产业转手。其中，准海中路1449号个西班牙驻上海总领事馆，就拨当时协兴毛纺织染厂老板唐君远买下来了。
唐君远是无锡人，年轻辰光勒勒上海交大个前身，叫做上海邮传部专科学校读书。1922年回到无锡，勒勒伊父亲唐骧廷创办个无锡丽新布厂做事体，后来担任厂长。1930年，伊到上海开办昌兴纺织印染总公司，还开设丽新上海一厂、二厂、三厂，1930年又勒勒无锡创办协兴毛纺织公司。
1945年抗日战争胜利后，唐家勒勒上海、无锡个工厂获得新生，由于管理得当，生产日益发展。1946年，原来西班牙领事馆个房产拨唐君远买下来，还重新装修。不过由于唐君远忙勒工厂管理，呒没精力来管新房子装修，所以装修工程进行得邪气慢。
到了1949年，人民政府反对资产阶级腐朽思想搭仔糜烂生活，提倡简朴生活作风，唐君远担心拨人家误会，所以也勿敢搬进新房子，仍旧住勒南昌路茂名路口个南昌公寓里向，结果搿幢洋房就稀里糊涂个拨勒房地产部门接管了。到了20世纪80年代，搿幢楼房又拨法国驻上海总领事馆租用，长期作为领事馆馆址。
唐翔千是唐君远长子，1937年跟父亲到上海，先勒勒大同附中，后来勒勒大同大学读书。大同大学毕业后就进了当时个“企业银行”。1945年抗战胜利，唐君远决定让儿子唐翔千离开上海，到外面世界去开开眼界。1947年，唐翔千就去了英国，后来又转到美国伊利诺伊州立大学攻读经济学硕士，1950年唐翔千毕业后回到了香港，先后创办印染厂，还积极参与社会公益活动，担任织布公会主席，拨香港政府授予“太平绅士”称号，还拨英皇颁授OBE勋衔。
1978年十一届三中全会以后，大陆工作重点转移到现代化建设，唐翔千以香港半岛针织有限公司名义，勒勒深圳投资600万港币，创办深圳半岛针织厂；1979年，又投资新疆乌鲁木齐，创办拥有4000名员工个“新疆天山毛纺厂”；1981年跟上海毛麻公司合资创建“上海联合毛纺织股份有限公司”，迭家公司1994年勒勒上海证券交易所挂牌，成为中国第一家上市个沪港合资企业。唐翔千先后勒勒大陆投资、合资个企业有靠廿家，伊还大量捐赠，发展中国教育事业。 前几年，法国驻上海总领事馆跟中国政府协商，想买下淮海中路1449号法国领事馆房子个产权，乃末房地产部门想办法好好较核查了一遍，再发现唐君远先生是迭幢房子个产权人，葛末就有了阿拉开头讲个，唐翔千到上海来处理房产个故事。
来源：“吳越小豬”微信公众号 |
|
|
