|
作者：周力 上海闲话是江浙多种方言融合个产物，总个来讲，上海本地闲话、宁波闲话搭仔苏州闲话个元素比较多。相比之下，苏北闲话对上海方言个影响，搭人口比例勿成正比。 譬如上海人讲“我”，正宗上海闲话就是“我”，有讲成“阿拉”个，迭个是宁波口音。也有人讲成“wu”，听上去就拨认为是苏北口音。有人偏要讲搿是上海闲话个“古音”，写成“吾”，迭能解释比较牵强。苏北闲话对上海闲话个影响主要表现勒口音浪向，勒词语方面个贡献勿大。一方面来上海个苏北人伊拉话语权勿够。另一方面苏北闲话属于北方语系，上海闲话属于吴语，两个系统交流起来老难个。 笔者小辰光看到过交关原籍苏北个朋友，到上海已经两三代了，出门侪是讲上海闲话，一回到自家屋里向，邻舍隔壁侪可以用苏北闲话来茄山河个。上海著名个方言广播剧《滑稽王小毛》，还有上海著名个草根脱口秀蔡嘎亮，伊拉讲个苏北闲话实际浪侪勿是正宗个，只好算带上海口音个苏北闲话，或者是带苏北口音个上海闲话。搿能介一交流一融合，祖籍勿是苏北个上海人讲起“我姓徐”，也会得变成功听上去像是蔡嘎亮乡下头个亲眷。 苏北闲话对上海闲话个贡献主要体现勒语音浪向，不过，有几句常用个苏北闲话倒成为了上海人口语当中个一部分。譬如：“辣块妈妈”。迭句闲话拨金庸写进《鹿鼎记》里个，是扬州堂子里长大个韦小宝先生个口头禅。其实，扬州人并勿讲“辣块妈妈”，“辣块”，是“伊搭块”个意思，“妈妈”就勿用讲了。“辣块”搭“妈妈”本来是勿摆了一道讲个，苏北人真个要骂人，一般讲“辣你妈妈”，或者直接就是“你妈妈”。迭得块个“辣”，相当于“日”。勿过因为“这块”、“辣块”搭“妈妈”侪是苏北闲话当中标志性个单词，摆勒一道邪气有爆破性个语言快感，交关夸张，所以就变成功上海人专属个苏北口语，还衍生出了“辣块妈妈不开花”搿能个全套粗口。 除脱“辣块妈妈”之外，“乖乖”也是上海人常用个口头语，表示惊讶。“乖乖”是简略版，全版是“乖乖隆地咚”。有人考证“隆地咚”到底是啥物事，其实勿用考证，只是扬州小调里模拟锣鼓声个谐音罢了。就像“杨柳叶子青啊呐，七打七打蓬呀呐……”侬讲“七打七打蓬”是啥个意思呢？也是象声词。“乖乖”，是对对方个昵称，“隆地咚”，是模仿锣鼓声响，再加一句“韭菜炒大葱”，就加深了印象。 “乖乖隆地咚，韭菜炒大葱”，迭句闲话拨上海人带到香港，再从香港飞向全球，的的刮刮变成了苏北人个标签。至于苏北人自家究竟讲勿讲搿句闲话，已经勿重要了。“乖乖”从心肝宝贝，变成一个感叹词，只有后首来来自港台个“哇！”可以搭伊一争高下。乖乖隆地咚，乖乖我的妈妈，乖乖不得了，乖乖不得命……苏州评弹里向有几段用苏北闲话表演个唱段，侪邪气诙谐幽默。譬如“江北夫妻相骂”搭仔“活捉张三郎”，还有一段杨乃武与小白菜当中个《法场祭子》，也交关有趣。杨乃武搭小白菜勒密室相会、吐露真情个大关子结束以后，真凶刘子和搭药店老板钱宝生判了死刑。到搿搭有一段刘子和个扬州姆妈到法场祭子个唱段。我呒没听过李伯康、严雪亭迭些前辈大师哪能唱个，但是我听过吴县评弹团老演员陈丽鸣八十年代个录音，调子用个是《无锡景》，唱词是用扬州闲话唱个，唱到最后一句：“到如今，你老子充军儿杀头，乖乖不得命啊，”真是乖乖，不得命啊，实在是吃勿消，笑痛我个肚皮了！ 朗读者李国琪 |
|
|
