|
拍拖、甩拖 拍拖咿嗰词本来系我哋广东地道嘅俚语，不过现时已经广传到全国范围，有好多讲普通话嘅朋友都识得用“拍拖”一词。男女之间谈恋爱点解会叫“拍拖”呢？分手又点解会叫“甩拖”呢？ 大家都知道，广东地区嘅水路运输系十分发达嘅，以前好多人出门都会坐船，而当时有一种船叫“花尾渡”，花尾渡最大嘅特点系船上面无乜嘢动力设备，系靠船前面嘅小火轮拖住行嘅，因为容量大，噪音细，非常受乘客欢迎，而“拍拖”系花尾渡进出港口时嘅一种操作方式。例如广州嘅长堤，因为河面复杂，船只又多，小火轮同花尾渡之间嘅缆绳绑紧船身，一大一细共同进退，咿嗰就系所谓嘅“拍拖”喇，咿种相依而行嘅情形睇上去就好似情侣牵手相伴噉，所以大家将情侣谈恋爱称之为“拍拖”喇。 而“拍拖”嘅两条船离开广州港口，去到比较宽阔嘅河道时，船员就会解开小火轮，继续用缆绳拖住花尾渡去目的地，而到达码头之后，小火轮就会同花尾渡分开，自己去搵地方停靠，噉就系所谓嘅“甩拖”喇，两只船各散东西，用嚟形容分手实在好贴切。 冇雷公咁远 喺粤语里面，形容一个地方好遥远、好偏僻，我哋通常会用“冇雷公咁远”嚟形容嘅，咿句话系点样嚟嘅呢？ 据说喺古代神话里面，雷公系专门惩治恶人嘅，边嗰犯咗恶都会被雷公追到，遭受天打雷劈嘅。而雷公系天神，应该系乜嘢地方都可以去到嘅。但系如果你可以走到去一个连雷公都管唔到嘅地方，噉咿嗰地方就真系好遥远好偏僻喇…… 而喺清朝屈大均嘅《广东新语》里面，有噉样一句话：“北方有无雷公之国，南方热，有无日不雷之境。”意思系话南方天气湿热，有啲地方成日打雷落雨，而喺遥远嘅北方，有啲地方是完全唔打雷嘅。所以对于我哋南方人嚟讲，唔打雷嘅地方，当然系好遥远喇。 |
|
|
