 作者：朱海洪 沪语改写：边秦翌 沪语讲述：李群 沿牢仔新昌路往北，走到凤阳路口，搿搭有只凤阳菜场，大清老早，此地人来人往就邪气闹猛了。凤阳菜场笡对过是“新中邨”，1930年造个，一共有得61幢房子。此地，一开始住个侪是老有“立升”个大人物，后首来，沿牢仔马路造了一排生个平房，夹杂了勿少个小商铺，增加了蛮多个烟火味道。我小辰光，我爸爸常庄会得带我去光顾其中个一只小酒馆，买一包花生米，来个二两红彤彤个五加皮，再来盆猪头肉。伊笃悠悠个自家老酒咪咪、猪头肉吃吃，我勒勒旁边吃吃花生米，嚼得也蛮扎劲个。 小酒馆个对过是一幢两层楼个比较“蹩脚”个小平房，平房前头搭出来一只棚棚，专门卖眼大饼、油条、豆浆、面食咾啥个，早浪向个生意是特别好呀。旁边呢，还有只剃头个摊头，好像专门为老头子搭仔小朋友服务个，小青年是从来勿来个。 再朝北去，就是北京西路了。北京西路勒勒老底子叫爱文义路，新闸救火会就勒北京西路295号。 穿过北京路，右手个转弯角子浪有一爿天乐食品店。五、六十年代，店门口有得一只鞋匠摊，搿是个撑拐杖个男人，只有一只脚。只要伊一揩皮鞋，旁边就有勿少小人呆呆叫立勒海看。鞋摊边浪个弄堂叫“道達里”，斜对过是“宝塔弄堂”，弄堂口个石牌坊浪立勒一座水泥宝塔，必过因为勿断受到风雨个侵蚀，顶浪向只剩下来半截了，看上去有眼作孽巴腊个样子。 走过“三成坊”、“松柏里”，就到了“承兴里”。阿拉屋里就住勒“承兴里”，开始辰光是住勒石库门个，到我读小学个辰光，就搬到新昌路街面房子个楼浪向去了。“松柏里”对过，就是我个母校——新昌路第一小学。 学堂搭仔屋里是我小辰光个活动天地。 “承兴里”对过是“三德里”，走过“三德里”、“厚德里”、“树德新邨”、“懋益里”就到山海关路了，勒转角个地方，一眼就可以看到墙壁浪向有一只老老大个字：“當”，迭条路就是“八仙菜场”，早浪向，声音吵得勿得了。 新昌路个尾巴是乌镇路桥，走到新闸路边望过去，桥个旁边有得一家邪气有派头个酱园坊，又阔又大个白墙高头，有得一个“酱”字，外头还画了一只神抖抖个圈圈，看上去像只老老大个句号，好像勒勒告诉侬：好了，新昌路到此为止了。 几十年呒没回过老房子了，故里个记忆，也好像是越来越淡漠了，差勿多侪忘记脱了。幸亏退休之后，老底子个一眼“着开裆裤个朋友”慢慢叫又侪联系着了，伊拉上门来邀请，让我重新回到老房子，去走走迭条马路。 人走来走去，显得嘈杂、热闹，市井商店个买进卖出，看上去是又熟悉、又亲切，搿眼侪像煞是昨日仔发生个事体，可惜个是，物是人非，熟悉个身影已经看勿大到了。 有趟，我突然之间看到一只熟面孔，是个老太太，但是我一眼就认出伊来了，伊，就是60多年之前关帝庙里向个埃个小尼姑。 关帝庙？里向哪能会得有尼姑呢？我自家也有眼模糊了。但是，仔细想想当年个场景，侪邪气清爽个勒我个眼面前呀。 历史搭仔宗教擦出来个火花，是我懵懂岁月当中闪过个第一道亮光。 “承兴里”，老底子是一条邪气有气派个弄堂，弄堂口口头有得两扇大个铁门，还有看门个人守门个。一到夜里向，看门人就变成功打更个了，勒弄堂里向敲更、巡逻：“笃、笃、笃”，“关-好-门-窗-啰～”“笃、笃、笃”，“平-安-无-事-喽～” 巡逻结束，铁门就关脱了，一个夜里安宁。大清老早，看门个再拿铁门开开来，让人进进出出，伊个派头像煞是官府个衙门。 当然咾，后首来搿扇大铁门就拨拆脱了。为啥要拿伊拆脱呢？呶，伊个辰光中国人开始勿淡定了呀，想跑步奔到共产主义去，乃末就大跃进唻，到处侪勒海搞小高炉炼钢铁，反正是，到勒勒末，大铁门个影子就呒没了，大约摸是送到小高炉里向去烧脱了伐。 朗读者 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
