 沪语朗读：黄燕琼 择校勿亚于择偶（二） 作者：胡伟立 沪语改写、朗读：黄燕琼 审核、推荐：丁迪蒙 勒上海选择学堂，勿亚于选择配偶。我认为，了解自家需要点啥，选对学堂，再是改变命运个助跑器。 我个青少年时代，侪勒勒上海西区一条小马路浪个学堂里向度过个，勒伊面读初中、高中，勒搿搭，完完全全改变了我个气质、格调。搿条小马路就是愚园路。 伊是一条远远叫躲开了都市繁华个小路，东端有只邪气有名个私家花园“愚园”，因而得名。路个两边有老大个梧桐树，枝叶相接。有交关各种风格个花园弄堂。搿眼弄堂大多数是二十世纪四十年代建造个，伊拉呒没华丽个大门，随便朝阿里条弄口走进去，侪会得看到一幢幢各种形态个别墅、洋楼，好象是到了异国他乡。 我个母校就勒勒愚园路个404号，邪气平常个校门口，挂勒块“市西中学”个牌子。当时辰光，我住勒铜仁路、南阳路口。每日天来来去去，用小人个脚步，路浪向至少要用一个半到两个钟头。虽然讲附近有其他学堂，但爷娘坚持要我考市西。 踏进市西个校门，随意个朝前头走，就会有得别有洞天个感觉。“园林佳胜，学府风光，弦歌震申江……”唱了几十年个校歌仍旧是余音缭绕。 今朝个市西校园，东面原来是外侨办个“西童学堂”，西面老底子是工部局女中，49年以后，此地块办过第一师范。 我向来性格内向，按照当时个阶级分析标准，爷娘拨看做是出身勿好个，再加上我爷毕业于以前个国防医学院（二军大前身），因此邪气自卑。用阿拉爷娘个讲法，是“迭个小人忒小家败气，搿能介下去要没出息个。” 刚进市西，觉着邪气好奇，教学大楼个走廊里挂勒一块匾额，高头是老校长赵传家请于右任先生题个四个大字——“好学力行”。 赵校长老底子就是搿只学堂个校长，市长陈毅重新任命伊当市西中学校长。伊是以前担任公立学堂校长个当中，唯一拨人民政府留任个。我想，搿个必定是伊教育思想个缘故，只不过我当初勿大懂。 我勒市西读了初中、高中，勿仅仅学知识，还参加交关课外活动：当过《市西日报》记者，做过话剧团演员，还是田径队个主力队员之一；还拨推选为班干部、团干部，勒各种大大小小个场合演讲，组织形形色色校内、校外个联谊活动。最重要个是，时时刻刻、每个地方侪能够体验到校长倡导个“三爱”——爱师如己、爱生如子、爱校如家个情感教育。…… 勒市西个伊些年数，让我完全脱胎换骨了，改变了消极、内向个性格，增强了自信心，还拨勒我一种“博爱”个情怀。 今朝，回想“好学力行”个校训，刚刚有眼明白，迭个留学美国科罗拉多州立师范大学，获得教育学搭仔行政管理学个硕士学位个赵校长，从《礼记·中庸》里寻出搿个几个字个用意。 精彩回放：
|
|
|
来自： 渺渺m69vnzsah9 > 《待分类》
