 沪语朗读：钱爱娟 朗读者 “万宝全书”烟纸店 来源：看懂上海 改编：郭 莉 朗读：钱爱娟 推荐：丁迪蒙 老上海烟纸店，勒北方可以叫做杂货铺个。一般侪是一开间个门面，小点个只有半只门面。烟纸店里卖点啥呢？呶，一份人家平常过日脚所需要个样样啥物事，伊侪有个。 肥皂、草纸、牙刷、牙膏，针针线线、宽紧带、橡皮筋，各种搭襻、大小揿钮，刀片、剪刀、长短钳子，灯油、蜡烛、自来火，纱绳、麻绳、皮鞋带、跑鞋带，木梳、头绳、生发油……用上海言话讲一遍，就想起姚慕双、周柏春个《新老法结婚》里向有名个顺口溜：“牙刷牙膏香肥皂，卫生草纸电灯泡，阿斯匹灵橡皮膏……” 从前辰光，交交关关个烟纸店，开勒弄堂过街楼个下头，好像从来就没起过啥个店名。大家侪习惯用位置来讲伊：“弄堂口爿烟纸店”“后弄堂爿烟纸店”；还有人用烟纸店老板、或者老板个“标志”来讲伊，“阿二头烟纸店”“小福林烟纸店”“麻皮店”“聋甏店”咾啥。 烟纸店里最好个生意当然是卖香烟了。香烟勿单单牌子品种齐全，还好拆开来零卖个。飞马牌香烟两角八分一包，劳动牌香烟呢，两角两分一包。侬假使摸出五分洋钿，就可以买到两根飞马、两根劳动牌。烟纸店老板个生意经侪是既精明又邪气活络，精明到一分一厘大家勿吃亏，活络到随意组合只要侬适意。 烟纸店侪是夫妻老婆店。前店后家，前头做小生意，后头住进一家门。一般早浪六点钟左右卸开排门板，到夜里九、十点再上排门板。为了方便居民夜里向个急需，老板还会勒排门板浪专门开扇小窗，居民假使急需要买灯泡、洋蜡烛、蚊香咾啥，只要敲敲小窗，就可以马上解决。所以讲，现在个廿四小时便利店，勒老上海是有传统个，烟纸店一年到头从年初一到年三十侪是开门大吉个。 小辰光住勒黄河路，前弄堂梅福里有爿烟纸店，后弄堂个平和里也有一爿，外婆每趟侪要关照：“到梅福里烟纸店去买”。原来，烟纸店老板一家搭邻舍道里混得熟，关系好，看见人老远就打招呼了。勒上海人看来，侬敬我一尺末，我一定要回敬侬一丈个，勿拍胸脯称兄弟，但是台面浪个事体清清爽爽，侪拨足对方面子。 到烟纸店来得顶多个，实际浪向倒是一眼中小学生。烟纸店里橡皮、铅笔、三角尺咾啥各种个文具，话梅、桃爿、盐津枣咾啥各种个零食，棒冰咾、雪糕咾、小冰砖等等各种个冷饮，要啥有啥，吸引搿眼小鬼头一趟一趟个跑烟纸店。还有香烟牌子，阿里一个男小囡呒没白相过？到了过年，烟纸店简直就是小朋友个“天堂”，大大小小炮仗、各种各样个烟火、“火药枪”、刀、枪、剑咾啥各种古代个“十八般兵器”，小小店堂里摆勿落了，就到弄堂口去搭出只临时个摊头，有常时，还会得拉只电灯泡来“挑灯夜战”。 当年上海个公用电话，一般也是设置勒烟纸店里个，乃末，烟纸店又多了一项服务内容。店门个上头侪钉好一块铁皮，画只手拿着电话听筒个标志，附近人家有得电话来，烟纸店还负责传呼，传呼费呢，一次三分洋钿。勒过街楼下头，总归可以听到老板勒叫:“1号三楼亭子间，张家伯伯电话”“7号二楼，王家姆妈电话”，迭个也应该是大上海市井个一种风景伐。 现在，一爿爿烟纸店侪呒没了，就算是替换成廿四小时营业个“好德”，葛末，伊真个是勿是“便利”，也就讲勿清爽了！ 要晓得，作为老上海市井生活个标志，烟纸店卖个勿仅仅是小商品，迭个实际浪是可以替代个，但是烟纸店所代表个浓浓个、最接地气个上海气息，迭个，现在可以到啥地方去寻呢？ 精彩回放：
|
|
|
来自： 渺渺m69vnzsah9 > 《待分类》
