 沪语朗读：渺渺 朗读者 春天里个三叶草 作者：沈嘉禄 沪语改写：丁迪蒙 朗读：渺渺 细雨初霁，春风轻拂，田里向个草头刷刷齐倒到了一边，摇曳生姿，碧波荡漾。 草头个学名叫苜蓿，勒上海郊区又叫伊金花菜，因为草头开花个辰光是金黄颜色个。更加具有古意个叫法是“盘歧头”，苜蓿个叶子大多歧生。 苜蓿来自于西域，西汉开始大面积种植。一开始，苜蓿是用来喂马个，或者用来沤肥沃土。《史记·大宛列传》：“大宛在匈奴西南，其土著耕田，田稻麦。有蒲陶酒，富人藏酒至万余石，久者数十岁不败。俗嗜酒，马嗜苜蓿。汉使取其实来，于是天子始种苜蓿、蒲陶肥饶地。及天马多，外国使来众，则离宫别观旁尽种蒲陶、苜蓿极望。”汉武帝从大宛国获得了能够长途奔袭个“天马”以后，军事力量大大提升，最终拿匈奴赶到了狼居胥山以远。 后首来，勒中国种植个苜蓿一般分为紫苜蓿搭仔南苜蓿两种，紫苜蓿比较多个生长勒北方个旷野搭仔田间，至今还是作为家畜饲料搭仔肥料。南苜蓿生长于长江以南，本帮菜当中个生煸草头、草头圈子、草头春笋、草头河蚌咾啥侪是一时之鲜。 勒欧洲，苜蓿又拨称作三叶草，是爱尔兰个国花。当地人相信假使寻到长有四片叶子个三叶草，就可以得到幸福。上海虹桥国际会展中心个主体建筑就是以四叶草为原形个，但愿幸运可以时时降临魔都。 是个，草头顶端个叶片轻薄而水嫩，易熟，烹饪过程简直搭打仗一样，讲究速战速决，稍一迟缓，全盘皆输，所以勿少煮妇视生煸草头为畏途。我是搿能操作个：草头摘嫩叶，假使特别需要讲究个就只取顶端个一茎三叶，汏清爽沥干以后备用，勒草头浪向事先撒适量个盐、糖。拿一只碗，里向倒进去两调羹好个白酒，等油温升高以后拿草头搭仔调味一道倒进去，快速翻炒几下以后就拿白酒喷进去，镬子边缘起火也勿要慌，接下去关火，让镬子里向个余温拿草头催熟。草头装进浅盆里向，当中要稍稍拨开一眼，防止拨焐老。整个过程只需要十几秒钟个辰光。有人认为，生煸草头一定要摆油，搿是有道理个，但是白酒也是一定要摆个，因此，生煸草头也叫做酒香草头。 上海郊区农民屋里还有一种方法，镬子里向烧开水，倒眼菜籽油进去，让伊浮勒水面浪，再拿草头倒进去，然后加调味，再用筷子稍稍拨个几记就可以盛起来了，同样是鲜嫩美味，碧绿生青个。 …… 草头搨饼相传起源于浦东个新场镇，明初年间已经有了。我勒新场、川沙以及江苏同里、吴江、南浔等等地方吃过几次草头搨饼，清香扑鼻，吃口软糯，回味隽永。同里个草头饼是油煎后浇糖油上桌个。勿久之前搭太太一道到西塘去白相，看到河边有一老太太勒现做现卖草头搨饼，蛮厚实，还包了豆沙馅头，只卖一元一只。阿拉吃了一只，没走几步又回头去买了一只。 我还勒江苏太仓吃到了糟香草头饼，拿草头切碎，加少许太仓糟油提鲜增香作馅头，包勒八成粳米粉搭仔二成糯米粉揉出来个饼皮里向，做成圆饼状以后再勒四周滚眼白芝麻，铺勒煎锅里向慢慢叫煎熟。趁热上桌，一口咬破皮子，糟香夹勒草头本身个清香，啥人也挡勿牢了。勒咀嚼个过程当中，还有无数粒饱满个芝麻勿断个拿脆香味道输送到鼻头里去，实在是令人愉悦。郑和六下西洋是从太仓个浏河港出发个，随船个厨师曾经拿草头饼带到南洋个一眼国家，至今传为美谈。 浦东个农民还会得腌金花菜，先拿金花菜汏清爽，摊开来晾干水分以后摆到干净个甏里向，撒盐拌匀，腌个四五天以后捞出来，勒太阳下头晒到少许有眼干了。乃末，另外拿只小甏，汏清爽揩干。勒小甏里铺一层金花菜，撒一眼炒香个花椒搭仔茴香，再铺一层金花菜，再撒一眼花椒、茴香，一直到拿金花菜塞得严严实实，用干净个稻草或者是麦秸塞牢甏口。挨下来，拿小甏倒立勒一只大一圈个瓦缸里向，缸内加眼清水，进行水封，大约摸廿天以后就可以取食了。用筷子夹出来个辰光一定要当心，勿好让水进到甏里，否则末，金花菜就会得变质了。 金花菜呈现出诱人个金黄颜色，有股幽幽个清香。空口吃回甘悠长，做冷盆佐酒也邪气赞个。也好烧菜饭，因为金花菜有眼微酸，浦东人叫伊“咸酸饭”，乡味实在是好呀。腌金花菜勒江苏也叫咸秧草，吃酒吃粥两相宜。有一趟，我勒一爿酒店点了道腌金花菜当作冷碟，同桌有几位白领小姐从来呒没吃过，勿敢下筷子，后来有人试了一筷，情勿自禁尖叫起来了。 往期回顾： 图片来自网络 |
|
|
来自： 渺渺m69vnzsah9 > 《待分类》
