 沪语朗读：王维杰 可敬可亲个丈母娘 作者：陈党耀 上海话改写：郭莉 诵读：王维杰 沪语指导：丁迪蒙 我个丈母娘属鸡，90岁唻。自从十几年前老丈人过世，丈母娘就一家头住勒市中心一幢老公房里。丈母娘看上去就是个普通个老太太，不过我是越来越觉着伊了勿起。 丈母娘幼年丧母，勿满10岁就拨亲眷从宁波乡下带到上海来，勒一家电器店里打杂。小小个年纪每日天要烧十几个人个饭。后首来到亚明灯泡厂做工，高温、粉尘、有毒有害，啥个苦伊侪吃过…… 三年自然灾害辰光，我丈人刚刚30出头，就检查出肝硬化腹水加黄疸，医生要家属准备后事。丈母娘变卖了屋里向所有值铜钿个物事，用尽了偏方，历经数年，硬劲救活了我个丈人。2010年6月，过好80岁生日个老丈人平静个离开人世。亲朋好友侪讲：呒没老太太，老先生老早就殁了。 丈母娘小辰光呒没读过一天书，解放以后读过一抢扫盲班，但是电视里播放个越剧、沪剧，屏幕下头滚动个戏文唱词，丈母娘会得一个字爷勿错个读出来。 每年阿拉会得接丈母娘到屋里来住一抢。看见我大冷天还赤膊锻炼，伊就一边用干毛巾搭我揩背，一边催：快点去着好衣裳，侬想生毛病啊！ 廿多年前，有趟单位聚会，我逞能多吃了几杯酒，酒痴糊涂扶牢墙壁回到屋里向。丈母娘第二天早浪起来，狠狠叫个拿我训脱一顿，伊讲，侬迭个女婿是我半个儿子，晚年个依靠，哪能可以搿能勿爱惜身体个！从此以后，我再也呒没贪杯吃醉过。我女儿出嫁辰光，丈母娘搭我讲：侬是我几十年个老女婿了，现在侬自家也有女婿了。不过要是看到有啥勿对，我照样会得毫勿留情讲出来个。 廿多年前，丈母娘个娘家侄女满16岁，按政策回到上海，但是居无定所，丈母娘毫勿犹豫收留伊，直到伊拉自家买了房子。老丈人最后个日脚里，迭家亲眷特地住过来，帮忙照顾老丈人，迭个就是丈母娘个好心有了好个回报。 天气好个辰光，丈母娘到附近襄阳公园或者文化广场个绿地活动活动。伊戴仔副近视眼镜，搭各种勿同年龄个朋友嘎嘎山湖，还主动担起“老娘舅”个责任，帮人打开心结，渡人自渡。交关老朋友侪尊称伊吴老师，尽管丈母娘自嘲自家是大字也勿识几个个。 丈母娘尽管每日天侪忙，但是伊安排好家务，还常庄去跳跳交谊舞，探戈、伦巴，就连转得老快个快三步，一圈一圈侪跳得起劲得来。伊个衣裳、鞋子侪老时髦个。丈母娘讲：佛要金装，人要衣装，年纪大了穿得邋遢，就会得讨惹厌个。 伊妹儿、微信迭眼新名词刚刚出炉，丈母娘就会讲出搿种词语来。平常辰光，更是俚语、俗语张口就来，啥个“摆渡摆到江边，送佛送到西天”；啥个“好花勿常开，好景勿常在”；啥个“勿怕勿识货，只怕货比货”；还有啥个“笨到底、犟到死”，一套一套，针对性强得来！ 丈母娘从来勿过生日，想勿到伊个80大寿是勒万米高空过个。阿拉乘了从海南回上海个飞机，东航空姐跑过来献生日贺卡。就勒搿天早浪送机个大巴士浪向，导游搭仔一整车个游伴，已经为老太太鼓掌、祝贺过一趟生日了。 丈母娘经常讲，做人勿好“船头怕赤佬，船尾怕强盗”。 退休以后，丈母娘身背小外孙，双手拎两只大包，乘火车到深圳，拿小外孙送到香港，又带回上海。半年一趟，坚持了好几年。一路浪，外孙是又作又刁，撒尿撒污，丈母娘吃尽苦头。现在已经是一家国际知名航运公司部门副经理个外孙，勒自家婚礼浪感谢善良个外婆，大家侪激动个为老人鼓掌。 现在，丈母娘除脱仔血压有眼勿稳定，其他呒啥大问题，买汏烧基本自理。伊搿搭就成为了大家个信息交流中心，四个子女基本每日天侪要电话请安，报告家务事，孙子辈也经常有得电话来。重孙子个一句奶声奶气个“阿太，侬勒勒做啥？”老太太听得是眉花眼笑呀。但是要是听小辈讨论个话题，是伊呒没掌握个内容，伊会觉着失落：迭个事体我哪能勿晓得个呢？ 丈母娘是个平凡人，但是伊是有善心待人、乐观平静个勿平凡。有搿能一个健康、有趣个长辈陪牢阿拉，亲眷朋友侪邪气羡慕，阿拉自家也觉着实在是忒幸运了呀！ 推上海言话叙身边事体 究吴侬细语吟诗词歌赋 往期回顾： 图片来自网络 |
|
|
来自： 渺渺m69vnzsah9 > 《待分类》
