 来源：新民晚报 作者：叶世荪 沪语改写：丁迪蒙 “来三”是上海人经常摆在嘴巴边头讲个词，表示行、可以、能干；加上否定词“勿”就是相反意思：不行、不能、不可以。 “来三”搿个词语的出次，坊间有各种传说。清代《吴下谚联》里向，有源自科举作弊个“来字三号”说；1999年出版个《上海掌故辞典》当中，有源自士族衣着个“襕衫身份”说，以及源自山上有寺个“来山来寺”说，等等。笔者认为，源头应该就勒搿个“来”字浪，其余个搭配侪只不过是口语带出、慢慢叫固化了个词尾后缀。理由有四： 一是“来三”并呒没固定搭配。除脱“来三”个写法之外，清代弹词《合欢图》写作“杀”脱个“杀”：“果然话不虚传，祝枝山实在来杀朵。”清代小说《负曝闲谈》写作“煞”车个“煞”：“念到十三四岁，更是来煞了”。更加有写成功“事体”个“事”搭仔数字“四”，含义也基本相同。可见围绕搿个词根“来”，搭配完全可以勿固定。 两，上海闲话当中有直接用勿带词缀个“来”或者“勿来”，表示“行”或“不行”个现象。上海郊区至今有些地方还可以听到搿能介个讲法。2013年出版个《莘庄方言》里，注释“来”个第四种用法，就是“行、能、会”，并列举俗语：“手里勿来脚里来”，意为手浪向呒没能耐，用脚去躲避、逃跑个本事倒是有个。 三，勒现代汉语里向，“来”作为趋向动词跟“得”或者“不”连用个辰光，就表示有能力或呒没能力、可能或勿可能。搿搭上海闲话里个“来三”个用法相当接近。譬如：“来得及”“来不及”“来不得”“做不来”，搿些词语里个“来”，侪搭“过来”“往来”个“来”勿同，分别表示“可以赶上”“勿能赶上”“勿可以有”“没能力做”等。 四，“来”，搿种用法勒古汉语文献当中也可以寻着相关例证。汉代《左传·文公七年》：“若吾子之德莫可歌也，其谁来之？”意思是：像侬（赵宣子）搿能个德行还勿加以颂扬个闲话，可以去颂扬啥人呢？“来”解释为值得、能够、可以。元代杂剧《气英布》：“这英布手脚好生来得。”“来得”表示能干。明代小说《二刻拍案惊奇》卷十：“不要说后边输了，就是赢得来，算一算费用过的财物已自合不来了。”卷七：“孟沂支吾不来。”两处个“来”分别表示“可能”搭仔“不可能”。还有清代小说《海上花列传》：“㑚几家头打我一家头，勿来，我一定要告诉㑚爷娘”。“勿来”就是不行、不可以。 往期回顾：  图：网络 / 编辑：渺渺
|
|
|
来自： 渺渺m69vnzsah9 > 《待分类》
