|
作者：读史老张 沪语改写、讲述：王邦基 推荐：丁迪蒙 编辑：王乙其  （上） 点击下方收听音频，时长09分24秒。 雨天，路过武康路。忽然想起史学大师顾颉刚先生就曾住过搿搭，便弯进去找顾颉刚旧居。一幢三层楼洋房，墙面米灰色相间，貌不惊人。据顾颉刚描述，搿幢房子原本“前有草地”，“庭院颇大”，但我左看右看，看勿到草地，也没感觉伊有多少大。 顾颉刚于1948年初抵沪，原来住勒山阴路兴业坊。1949年3月，伊迁到武康路280弄9号。9号个主人姓袁，伊歇辰光已经远赴台湾。经人介绍，顾颉刚一家人家租住到袁宅底楼，一直住到1954年夏迁往北京。迭一时期，顾颉刚任大中国图书局个总经理，后来又出任上海市文物管理委员会委员，并先后勒诚明文学院、震旦大学搭仔复旦大学兼任教授。《顾颉刚日记》个卷六、卷七，记录了伊勒搿搭五年多个生活，鲜活生动。其中有关武康路浪个人与事，读来饶有兴趣。 勒日记里，顾颉刚并未正面描述武康路。对于上海个道路里弄，伊好像并勿在意，伊讲“千篇一律，极不易认，我辈所以能认者，以记得阿拉伯数字之门牌耳”。但从字里行间，我还是闻到了武康路个市井味。譬如，顾颉刚多次写“到武康路口”：买书、买玩具、买蚊香、买糖、买连环图画、刷鞋、吃馄饨、吃牛肉汤、存款取款、看游行队伍……搿个“路口”，应该就是武康路搭淮海路、兴国路交界处，可见当年迭搭市口好，生意兴隆。偶尔，伊也会从武康路出发，到华山路买鞋子，到徐家汇配中药，到思南路寄信，或者搭妻子张静秋一道，到国泰大戏院看电影，到静安寺百乐商场买物事。至于伊幢诺曼底公寓，就是现在叫武康大楼个，无论今朝哪能名闻遐迩，顾颉刚却只字未提——最接近个记录，是写伊多次去紫罗兰理发店“剃头”“修面”，迭个“紫罗兰”，就勒诺曼底公寓楼下。另外有一趟，一个老家来个女佣人勒伊屋里个厨房间搭人幽会，拨别人家碰到，羞愧交加，离宅“逃走”。顾颉刚搭张静秋正好到武康路口去“调钞票”，发现迭个女佣人刚好“徘徊于大街之廊，周身遭大雨湿透矣”，乃末“领伊回转”。搿搭个“大街之廊”，应该就是指诺曼底公寓底楼个长廊。 顾颉刚当年入住武康路，图个是清静。武康路远僻、落乡，却使伊感到“安心”，迁居后感觉勿错，“自移家武康路，十分舒适”，“夜中极静，睡眠甚好”，“有安乐之乐……复得写作，竟不思动矣”。然而勿久，烦恼接踵而来，“楼上王家天天邀人客打牌，仅抽头每日可得到十余万洋钿，除饮食茶烟外侪拨了工人，因此工人极高兴”。迭个却是让顾颉刚高兴勿起来，后来，伊另外寻地方读书写作，大概根源勒搿搭。另外，大中国图书局勒北四川路，离武康路蛮远个，顾颉刚每去一趟，“需时一小时许，来回便耗三小时，而车费亦须五百元之谱。一月合计实一大支出也”。迭一点，也让伊有点心中勿爽，难怪伊后来多次请假延期到复旦任教，理由蛮充分：“住居徐家汇区，离江湾太远。”在诚明文学院，顾颉刚任教时间最长，诚明勒南市民国路，就是现在个人民路老北门，离武康路也勿近。有一天下课回去，伊想到霞飞路，就是现在个淮海路去为囡儿买物事，为了节省400元电车费，伊沿牢民国路向西步行，勿晓得民国路是条弧线，走啊走啊，竟然走到了肇周路，“近黄浦江矣，只好雇车到霞飞路，反而花了一千五百元”。还有一趟，伊乘三轮车到重庆南路浪个震旦大学上课，震旦伊日天却因故停课，迭个让伊邪气愤愤勿平：“学校停课，也应打电话来通知一声……害得我白跑一趟，花去两千元车钿，抛脱半日天工夫。”更要命个是，一到落雨天，武康路一带即积水成河，“浅者数寸，深者尺许，店铺多闭门”。有天落雨，“出门，无电车，十分惊讶”，走到霞飞路再发现，“积水甚深……车轴也浸了水里，竟成浩荡长河”。 （下） 点击下方收听音频，时长10分24秒。 对于武康路个市井生活，顾颉刚有切身个体会。刚迁入辰光物价飞涨、生活清苦，伊拉一家门有辰光也买豆腐渣吃，有人吃惊，问：搿是喂猪猡个，哪能好吃呢？顾颉刚慨叹个讲：“假使勿吃迭个，还有啥好吃个呢?”袁宅主人离沪之后，留下来几个佣工看房。有个女佣叫张妈，“头脑太旧，负责又过分，规矩吓多”，伊对顾颉刚一家人限制得勿得了，譬如汏衣裳“勿许在浴盆里向汏”，汏痰盂“勿许勒马桶里向”，还写信搭勒台湾个主人告状，“嫌比我家里人多，嫌比我家工人毁坏伊个器物”，以致对方来信指责。对此，顾颉刚记道：“寄人篱下，痛苦若此！”武康路原本治安差，偷盗猖獗。某日夜里向，“有贼骨头从后园篱笆进入，偷脱屋里面粉两袋，又进入东边邻舍屋里，偷脱伊拉自行车一辆”。隔了两日天，“贼骨头又来了，从后园进入，偷脱鸡二只，摔开锁，从大门出去。可见伊个胆子愈来愈大”。还有一次，“对门一家调主人个辰光，脱空一天，窗浪个铜链侪拨偷脱。静秋入市买菜，伊亲眼看见一个人菜篮也拨抢脱”。 顾颉刚开始迁居武康路个辰光，国民党政权正值风雨飘摇中。国民党个挣扎搭仔溃败，伊曾经亲眼目睹。1949年4月26日，国民党军警勒全市高校大搜捕，进步师生“被捕者数百人”，顾颉刚个老友、同济教授郭绍虞也拨列入黑名单，复旦教授周谷城被捕。当天日记里，伊写道：“不期途穷日暮，又复倒行逆施。”5月16日，国民党军队勒“武康路浪堆沙袋”，张静秋听见一个士兵嘀嘀咕咕：“迭个有啥用呢?”顾颉刚又评论道：“军心如此，而乃期其守乎！”5月19日，武康路浪筑起了栅栏，国民党保甲长挨家挨户前来收款，“所索数甚大，必非我力所可任”，迭个让顾颉刚“不胜其扰”。5月20日，伊上街买菜，发现肉铺老板拿肉“囥勒内室或抽屉当中”，原来，肉铺进货，“一块银洋钿买勿到二斤”；而国民党军队前来买肉，“则一元硬劲要买四斤”。肉铺老板哀叹：“明朝仔预备关门矣。”几天之后，各商铺就频现“脱货求现”“惊人牺牲”招贴，顾颉刚感慨：“商人之苦，即此可知。”5月24日起，伊个日记进入了上海解放个节奏：“晚间炮声及机关枪声甚近且密，静秋不敢睡床上，与之同卧地板，以此遂失眠。”5月25日，伊一碌起来，就听闻人民解放军已从清晨4时进入市区，“共军由兴国路进，国军由武康路退”，“解放矣！……上街，看新标语已贴出，电车已停，商铺开门者极少，外国人行动受阻”。5月27日，伊写下迭能一行字：“看报，上海全部解放。” 上海解放之后，武康路个治理走上正轨。1953年1月，武康路居民委员会成立，临时办事处设勤武康路270号。张静秋因工作积极，当选为居委会副主任，四处奔忙。对此，顾颉刚看在眼里：“静秋为里弄就业工作，日夜开会，今朝夜里至十一时方归”；“静秋近日为彻底贯彻婚姻法，呒没一日无会，有会必到夜里，十分疲乏，夜半作冷发抖，致和衣而眠”……伊心疼妻子：“勿知伊个身体吃得消否？”后来，张静秋果然吃力得生毛病了，顾颉刚还亲自出手，“为静秋写居民会信”。读到搿搭，我就想，勿晓得搿封“居民会信”现在何处？倘能保存至今，无疑是武康路浪重要个历史文物，十分珍贵。 ……勿知勿觉当中，我已经踱步到了武康路口。勒顾颉刚笔下头，当年搿搭有肉铺、菜市、银号、馄饨店，还有修鞋匠、烧香客、剃头师傅搭摆连环画摊个书贩，既勿小资，也勿时尚，却是烟火气十足。今朝，武康路口已成为“网红”打卡个地方，虽然是落雨天，武康大楼个长廊下，依然是人来人往。各类海报招贴浪写：武康路是“可阅读”个马路、武康大楼是“可阅读”个建筑——勒我看来，所谓“可阅读”，终归还是要回归到阅读历史文化个。因此，勒“阅读”武康路搭仔武康大楼辰光，像《顾颉刚日记》搿类历史文献，倒勿妨读一读。 诵读者：王邦基 丁迪蒙 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。 来源：“海上梦叠”公众号 |
|
|
