|
搭足球有缘个德义大楼 作者：惜珍 来源：岁月静安 沪语改写：边秦翌 沪语讲述：刘时医 审阅、推荐：丁迪蒙 编辑：王乙其 点击下方收听音频，时长18分00秒。 南京西路是老上海十里洋场个朝西延伸段，海上繁华梦勒迭个一带以低调高贵个面貌呈现。此地以经营高档商品为主个公共建筑，搭仔富有特色个住宅建筑为风貌特征。如今，搿些老建筑迓迓叫个囥勒现代化大厦旁个绿荫当中，静静叫个讲上海摩登个故事。 南京西路是上海早期公寓最集中个地带，从石门二路开始，一垯路浪侪是建于20世纪三四十年代个公寓建筑。勒南京西路北侧，靠近石门二路转角个南京西路770—790号，有得一幢楼叫做德义大楼，里向还包括石门二路15弄弄口个街面房子。 搿是一幢10层楼个公寓大楼，由当年号称“中国哈同”“中国地皮大王”个房地产大业主程谨轩投资建造，英商克明洋行设计，丹麦康益洋行承建，1930年建成功个，可以讲是近代上海公寓大楼个经典作品。德义大楼沿牢仔南京西路呈弧形状，伊个辰光齐巧是装饰艺术派勒工业搭仔建筑设计当中最流行个阶段，建筑具有现代建筑兼近代西欧装饰艺术个风格。外立面采用勿同个泰山毛面砖镶贴拼成功几何图案；底层搭2层之间有得花岗石环饰，2层转角处窗洞上方作局部花岗石饰带处理；沿街部分窗间墙凸出，形成功立面竖线条构图；沿街3层窗间墙搿搭有凸出来个石雕花座，其中4只像台浪，原来有得4座希腊女神石雕立像，现在已经呒没了。 建筑平面为周边式，底层是商铺，二层以上是公寓。公寓由3只内廊式住宅单元搭仔1只内廊式宿舍单元组成，是上海比较早个设有单身宿舍个公寓。室内装饰用料标准比较高，走廊铺了湖绿颜色个马赛克地坪，室内是钢窗打蜡地板，水晶铜把手、雕花线条花篮梁以及胡桃木小地板、雕花个木门咾啥，样样啥啥侪显得档次邪气高。入口门厅内凹，门两边有得壁柱，柱顶浪向有得简洁个几何图案，顶部有得繁体个“德义大楼”几个字。老底子电梯是伊种带仔铁栅栏个，人立勒电梯里向可以看到外头个楼层，现在已经改成功封闭式个了。德义大楼个顶层是宽敞个平台，还有两只小房子，小房子个外墙搭大楼个外墙一样，侪是用耐火砖砌筑个，猜想应该是摆设备个伐，平台浪向还摆勒眼花花草草。立勒平台浪，南京西路搭仔周围个风景一览无余，看得清清爽爽。 德义大楼是程谨轩投资建造个，实际继承人是程谨轩个次子程霖生。必过是由程霖生个阿嫂搭仔侄子程贻泽来管理业务，主要是收收租金。程贻泽年轻好胜，乐善好施，有辰光兴头来了，用起钞票来邪气大方，可以叫做挥金如土伐。伊邪气欢喜体育，可惜技术一般，伊姆妈守寡，拿球场看作是战场一样，坚决不允许伊出去练球，呒没办法，球友们让伊当领队，伊就捐赠球衣、球裤咾啥，负担球队个一切费用，平常辰光还会得热情款待球友。伊曾经组建了一只足球队，取名为三育队，并且勒搿歇个南京西路常德路东头、自家产业个土地浪向，修建了上海第一只私人足球场。为了增加球队个实力，伊还邀请了当时辰光足球名将饶惠生、哈元贞、朱璆、“铁门”何春辉、香港名将“铁头”黄瑞华、左边锋“飞毛腿”曹桂成，一道参加球队。程贻泽慷慨解囊，足球队个吃用开销、住宿、工资津贴以及其他一切费用侪由伊承担。伊勒泰兴路个住宅，除脱要保持豪华个居住条件之外，还配有舞池、篮球房、弹子房、练球场搭仔游泳池咾啥，像煞是只体育俱乐部。勒正宅东侧另外还有一幢附属个小洋房，楼下头做程贻泽经租账房，楼浪做球友宿舍。1924年，伊又资助上海中华全国体育协进会，拿到了老老大一片土地个使用权，迭片方形个大空地，位置勒勒上海法租界，就是现在个合肥路南端。协进会拿到土地之后，总算好勒上海棒球场里向，再附设篮球房，定名为中华篮球房；又扩建了400米个田径场搭仔办公楼，总称为中华棒球场。从此以后，上海个各项重大体育比赛侪勒此地举行。1927年第八届远东运动会也是勒此地举行个。 1926年11月7号，程贻泽组织个三育队搭上海营造商谭臣干之子谭敬组建个东华队勒上海第三届中华足球联赛决赛，搿两支球队，当时辰光是上海最强个球队，伊拉个比赛轰动了全上海，各家报纸体育版侪勒海大肆宣传，观众是人山人海。最终比分4比4，勿分伯仲。后首来程贻泽又拿球场移到泰兴路306号，就是伊自家屋里门前个一只小型足球场，又拿三育队改名为优游体育会，组织优游足球队搭仔强华篮球队，聘请著名教练舒鸿咾啥来担任教练，勒伊领队个足球球员中，曾经出现过足球名将李宁搭仔“铁腿”孙锦顺，一跃成为第一流水平个足球队，还拨邀请参加西人足球协会，迭个西人足球协会简称“西联会”，伊拉也是上海第一支参加西联会个足球队。1929年，伊出资率领优游足球队远征日本，战绩两负两胜。优游足球队勒上海取得盛名以后，作为领队个程贻泽，勒体育界一记头成为风云人物，伊时勿时个组织球队搭旅沪外侨、外国驻军个球队作友谊比赛，也邀请马来西亚、菲律宾个华侨球队到上海来比赛，勿单单热情招待，人家走个辰光还送礼品。为了炫耀自家个身份，取了只英文名字，叫丹尼斯程（Dennis Chen），还拿1930年建成功个德义大楼叫做“丹尼斯大楼”，伊慷慨好客，千金万金从来勿会舍勿得，告咾德义大楼也有一种“我丹尼斯程'讲道德、尚义气’”个意思。搿位痴情体育事业个阔少，梦想有朝一日能够亲自发起组织大规模个国际赛事，伊还专门为自家未来个国际比赛设计了“丹尼斯奖杯”，奖杯个造型是以德义大楼外立面个希腊女神石雕立像为原型，再配上底座。现在德义大楼外墙浪还保留勒若干几何图案拼接而成个石雕，据讲就是“丹尼斯程”当年为奖杯设计个底座造型，而高头个希腊女神石雕立像已经拨毁脱了。搿座旅馆式个公寓大楼，勒程贻泽个安排之下，常庄保留相当一部分空房，专门用以接待外省市应邀来沪作友谊赛个客队球员住用。 迭个程贻泽虽然搭伊个爷叔程霖生分宅而居，但是并呒没分割遗产。程贻泽只晓得用钞票，用起来像煞是用自来水样个，只要有得钞票用，伊从来勿问是勿是盈利。程霖生呢，伊自命风雅，欢喜结交三教九流，就算有得万贯家财，也经勿起搿能介个挥霍。1931年，程霖生因为做黄金投机买卖，亏空到呒没办法想个地步。由于程霖生掌握德义大楼产证，已经拨伊抵押拨了中国银行，根据当时辰光个有关规定，搿些产业统统用来抵偿欠债。除脱德义大楼，还包括程贻泽泰兴路个住宅也拨作价抵债了。 无可奈何花落去。程贻泽宏大个足球梦想随牢仔爷叔投资失败而终成泡影。德义大楼勒程家破产之后，最后归到中国银行个名下头，后首来成为银行职员个宿舍。作家程乃珊个阿爷是中国银行高管，原来住勒万航渡路中行别业，1940年之后，一家门搬迁到德义大楼5楼居住。搿歇住勒德义大楼里向个人，大多数侪是金融系统个职员搭仔伊拉个子女。 当年德义大楼底层商铺基本浪侪是奢侈品专卖店，其中有得一家绿屋夫人时装沙龙，最为有钞票太太青睐。迭只店个名字，听上去就有点隐晦个奢靡，是当时辰光上海最顶尖个高级女装店，老板是一个白俄女人，里向勿单单做高级定制洋装礼服，还供应各种精美配饰，由于价钿忒贵，样式又忒洋气，只有邪气少个人再消费得起。底楼还有一家南京理发店，里向个座椅侪是德国制造个皮椅子，可以调节高低，还可以360度自由转动。理发师侪戴仔黑领带，着仔浆得笔挺个白西装黑裤子；女理发师侪要化淡妆，身着浅蓝颜色个修身工作服，脚蹬平底白皮鞋。每位理发师胸前侪挂仔一块圆形个金属铜牌，高头写勒海伊拉个工号，伊拉基本浪侪可以讲个几句常用英语。伊个辰光风尘仆仆来往于京沪道浪个国民政府新贵，侪是南京理发店个常客。底层个“绿屋夫人”老早就随风而去，南京理发店倒是留了下来，还由程十发题写了店名。20世纪60年代拍个电影《女理发师》，女主角个扮演者王丹凤就是勒南京理发店实习个，部分内景也是勒此地拍个。现在南京理发店成了南京美发厅，旁边分别是上海照相馆搭仔真丝大王商厦。南京理发店个隔壁曾经开过一家上海最大个少年儿童书店，德义大楼3层搭4层交接个墙壁浪向，还挂仔宋庆龄于1959年亲笔题写个“少年儿童书店”白色招牌搭仔宋庆龄个签名。搿搭是我小辰光最欢喜去个地方，后首来少年儿童书店搬到了马路对过个南京西路新华书店楼浪，再后首来伊家新华书店也消失脱了。德义大楼楼浪原来有宋庆龄题词个招牌，搿歇也寻勿着了，唯有记忆还勒海，每趟我路过伊面，总归会得走进去，当然已经勿是少年儿童书店了，搿歇是一家面包店，勒店里向买一袋法式长棍，挨下来再到隔壁个全家超市兜一圈，想想当年勒此地买书个场景，权作一种纪念伐。 作者：惜珍，本名朱惜珍。上海作家。创作始于上世纪90年代初，早期以中短篇小说和抒情散文为主，2003年起，开始历史人文的非虚构写作）。 讲述者：刘时医 丁迪蒙 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。 来源：“海上梦叠”公众号 |
|
|
