【原】上海女人大气伐？

沪语朗读：曹凯

上海女人大气伐？

作者：张黎明

推荐：丁迪蒙

朗读：曹凯

       看到搿句闲话，交关人会得讲，上海女人勿要忒小气噢！样样啥侪要斤斤计较，一眼呒没啥个派头，而且，常庄拿上海男人管得来是服服帖帖，身边零用钿也拿勿出多少。搿些事实也确实勒拉阿拉身边发生个勿少。必过我认为搿个也只能代表一部分个市井工薪阶层个上海女人。

       而我更加觉着还是有勿少个上海女人勿仅大气，而且还十分贵气。旗袍穿勒上海女人身浪向，会得有独有个海派贵族气息，因而，海派旗袍勒拉民国时期就蜚声海外，虽然旗袍是由清朝宫廷后宫服装改良过来个，但是真正使伊走向世界个是上海女人。

       试想呒没像宋氏三姐妹穿着海派旗袍走向世界的历史舞台，呒没伊拉身浪向散发个中西方结合起来个海派贵族气质，能折服孔祥熙、孙中山、蒋介石搿眼大人物伐？

       从张爱玲留下个文学作品里向，有多少上海女人是邪气小气个？或者是勿识大体个？还是比较少个，伊拉常庄是命运多舛，但是活得十分出彩，绝对勿会轻易向命运低头。

       即便到了九十年代，大批上海女人面临下岗失业，但是，伊拉也会得千方百计寻找机会再就业，许多纺织女工做勿了空嫂，就去做商嫂、月嫂，有个经过多年个打拼也混得风生水起。伊拉比上海男人更加放得下面子，尽管生活艰难，但是，伊拉能吃苦，精打细算个过好每一天个同时，还是保持着一定个品味。伊拉常庄是自家裁衣做时装，编结各种漂亮个绒线衫来打扮自家及屋里人。只要看到报刊杂志浪向个或是日本电视剧里服装款式，伊拉侪会得研究并做出来，风靡整个上海滩，因而，上海女人可以讲是勿管处在啥个历史时期，侪是与国际时尚潮流最为接近个人。

       进入新世纪，勿会得再满足于生活浪个富足，更加在于精神文化上个追求，就像中国诗词大会主持人董卿，第二届冠军武亦姝那样个腹有诗书，气自华个才女美不胜数。

      就像曾蜚声海外个现代上海女作家张爱玲以及当代上海女作家严歌苓那样个才女，层出不穷，而今国内的王安忆、王小鹰、陈丹燕、程乃珊等更是非同寻常的存在。在上世纪二、三十年代，又有多少文学像萧红、丁玲、冰心等才女侪是从上海起步个文学巨匠。

       勿管啥个时代，上海女人不仅大气，而且，邪气是有腔调个，勿论从政界、商界还是文化艺术界，都是引领社会潮流个群体。

       有人讲大多数个上海女人忒嗲唻！而我认为大多数上海女人嗲得蛮优雅个，所以上海男人能服服贴贴；也有人讲上海女人忒会作了唻，尤其是上海丈母娘，弄得唻许多外地小伙子敬而远之。搿个似乎有眼妖魔化，夸大其词唻！

上海女人个作往往是有分寸个。看看当下出了多少上海女贪官搭男贪官个情妇，是勿是少得可怜伐？谈婚论嫁前，上海女人一般要求对方知根知底，弄弄清爽，如果讲勿相般配就勿要浪费大家个宝贵生命时间。搿个应该也呒没错伐？相反，上海女人个识相就是顾大体个表现，伊拉一般勿会得打肿面孔充胖子，有多少能力办多少事体，绝对勿会轻易个问人家借钞票唠啥。其实大多数个上海丈母娘要求并勿高，要求对方有一套比较靠近市中心个百把平方米个房子，有相对稳定个工作等，其实搿个侪是现在婚姻个基础呀！前一枪上海房价飞高，哪能可以讲是上海丈母娘炒起来个，伊拉北京、深圳房价涨得绝对勿输拨上海滩，就呒没啥人讲北京搭深圳个丈母娘拿房价炒起来个呢？

       搿个要怪现在个一眼影视作品，往往会得勒拉作品里向妖魔化上海女人，而且，靠老仔伊迅速走红个，大家看看搿眼基本浪向侪是一眼外地来个所谓个知名女作家、女编剧，对上海女人存在骨子里个羡慕嫉妒恨，其实，伊拉勿晓得上海勿少女人还是蛮崇拜伊拉个呐！所以，伊拉勒拉上海侪能混得风生水起，勒拉北京可能伐？侬讲搿个勿是大气个表现，是啥呢？

朗读者

       

方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。

在上海，爱上海，讲上海言话。

“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。

“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”

图：网络  /  编辑：渺渺