【原】挺进第三极——赴藏纪实（合集）

渺渺m69vnzsah9 2022-01-21

展开全文

崇岭伴侬去远方——

人生就是一次旅行，阿拉勿必太在乎终点，而要在乎沿途嗰风景，搭之欣赏风景嗰心情。

挺进第三极——赴藏纪实（前言）

本公众号推送的1至4章莫名被删，现补音频见上，文字见下。

挺进第三极——赴藏纪实

作者：李海荣

朗读：张贤春

（1）

2004年8月21日晴拉萨

怀着探秘世界第三极嗰激动心情，老清早我伲搭乘东航班机从成都双流机场起飞，向拉萨贡嘎机场飞去。勒拉机上时常抱辣忐忑勿安嗰心情遐想西藏搿神奇而陌生嗰地方。“西藏”，一看到搿两个字，脑子里就立刻会联想到白雪皑皑嗰雪峰，神奇壮观嗰冰川，湛蓝天空下飘拂嗰经幡，秃鹫盘旋嗰天葬台，虔诚地磕着长头嗰信徒，令人梦牵魂绕嗰布达拉宫，还有拉萨街头永勿停止嗰转经轮......。青藏高原，自古就是一个令人望而生畏嗰地方。“生命禁区”是伊嗰注释，“世界屋脊”是伊嗰标签。

公元7世纪，文成公主走过绵绵雪域、巍巍群山，从长安到拉萨一共用了整整3年嗰辰光。我伲搿趟去西藏还勿晓得能勿能安全返回，真有一眼提心吊胆。经过2个多钟头航行，飞机已经飞临拉萨贡嘎机场上空。由于高原供氧量只有平原地区嗰60%左右，身体负荷自然加重，即使我伲空手行走也相当于勒拉低海拔地区负荷20公斤。当飞机勒拉拉萨贡嘎停稳嗰辰光，旅行者侪纷纷行走勒拉廊桥浪向。突然，我看到前面一个身材魁梧嗰男青年可能由于严重缺氧，一个踉跄栽倒辣地浪向，面孔憋得通红，有眼透勿过气来嗰直喘。搿个辰光还发现随身带嗰包里真空包装嗰蛋糕侪一记头胀得像气球一样圆，有嗰女同事携带嗰洗面奶一拧开盖头，里向嗰液体侪自动飚了出来，显然是外面嗰气压大大低于里向嗰缘故吧。

勒拉机场前往宾馆嗰路浪向，大家侪新奇地欣赏着沿途别具一格嗰风景搭藏民居。当地导游搭我伲讲：“大家要注意拨身体减负，随身行李侪勿要带得太多；平常辰光饮食应该尽量选择高热量易消化嗰食物；勿要暴饮暴食，避免吃酒，也勿要吃香烟。㑚初到高原千万勿要急辣汏浴，防止感冒受寒，以免引起上呼吸道感染搭肺水肿等急性高原疾病。”还要我伲慢慢走路，小声讲言话。一到宾馆安顿好住宿，同事们就第一时间去购买抗高原反应嗰药物。我预先已经服用了半个号头“红景天口服液”，有嗰同事服用了“高原安”，我感觉高原反应有所减轻了。有嗰肺活量大嗰男同事伊拉高原反应邪气强烈，甚至感觉头痛欲裂。

拉萨古城令人神往。市区面积仅51平方公里，人口约15万。背靠念青唐古拉山，面向雅鲁藏布江，四周高山环绕，拉萨河从东北流经拉萨市转向南进雅鲁藏布江。拉萨海拔3658米，四周山地海拔侪勒拉5000米以上。拉萨属于高原温带半干旱季风气候，特点是辐射强，日照辰光长，年日照数勒拉3000个钟头以上，素有“日光城”嗰美誉。平均气温低，日夜温差蛮大，夏天呒没酷暑，是避暑胜地。干湿季明显，雨季降水集中，多数是日里晴朗夜里向落雨。空气稀薄，缺氧，呒没雾。

相传拉萨过去是沼泽地带，文成公主进藏初建大昭寺嗰辰光，曾用山羊驮土填平而得名。随着吐蕃政治、经济、文化嗰发展搭宗教嗰兴盛，逐步兴建了布达拉宫、大昭寺、罗布林卡等标志性建筑，形成了以大昭寺为中心嗰旧城区雏形。从此以后嗰1300年辰光，经过勿断经营，终于形成了今朝以宫殿、佛堂、民居为主嗰独具特点嗰历史名城。

（2）

2004年8月22日晴大昭寺八廓街

到了拉萨旅行，大昭寺是必去嗰重要景点。大昭寺坐落勒拉拉萨市嗰中心，是藏传佛教徒心目中嗰圣殿，始建于公元7世纪中叶，是西藏最早嗰木结构建筑。当时是两层船形神庙，后经历代多次整修扩建，形成今朝占地25100平方米嗰大型建筑群。由正门进去后沿顺时针方向进入一个宽阔嗰露天庭院，四周嗰柱廊廊壁搭转经回廊廊壁浪向绘满千佛佛像，而被称为千佛廊。“觉康”佛殿是大昭寺嗰主体，楼高4层，中央是大经堂。正中心是释迦牟尼佛堂，搿是大昭寺嗰核心，是朝圣者最终嗰向往。搿个殿供奉嗰释迦像是文成公主从长安带来嗰释迦牟尼12岁辰光嗰等身镀金佛像，拉萨（意思是圣地、佛地）嗰名也是源于搿尊佛像。交关重大嗰政治、宗教活动，譬如金瓶制签、历代嗰达赖或者班禅嗰受戒仪式等侪勒拉搿搭进行。大昭寺成为了西藏大佛事活动嗰中心。大昭寺顶层4座巨大嗰金顶分别建于14世纪中叶搭17世纪，耸立于拉萨古城嗰中央，好像神鸟金翅奋展，勒拉高原灿烂嗰日光下熠熠生辉。

大昭寺前面嗰公主柳，相传是当年文成公主亲手种植嗰。公主柳旁嗰甥舅碑，是822年唐蕃会盟嗰辰光立嗰。大昭寺里向保存着各类佛像、唐卡、法器、咾啥宗教艺术品，刺绣“胜乐佛”唐卡是明永乐皇帝搿辰光所赐，是国内罕见嗰珍贵文物。此外，寺里向还收藏着相传是文成公主带来嗰形式古朴嗰乐器搭羊头壶等文物。

勒拉大昭寺嗰大门口拨虔诚佛教徒磨得滑溜溜嗰石板，从早到夜仍然有交关磕长头嗰朝拜者，伊拉磕嗰辰光双手合掌高举过头，从顶、到额、到胸，拱揖三次，再匍伏勒拉地浪向，双手直伸，平放辣地上，划地为号。然后，再起立辣像前面搿能重复再做。特别是勒拉大昭寺交关开裂嗰立柱上，看到镶嵌辣偕气多人嗰门牙，听了导游讲解后真令我伲肃然起敬。过去，有交交关虔诚嗰佛教徒从四川阿坝州、青海等地磕长头到拉萨朝佛，行程几千里，三步一拜，一磕几年，有嗰死勒拉路途中，活辣嗨嗰同伴就掰下逝者嗰一颗门牙，以后带到拉萨，镶嵌辣大昭寺立柱嗰缝隙中。伊拉心里也觉得尽心尽意，毫无怨言了。

八廓街又称八角街，伊是为了建筑大昭寺，并随着大昭寺嗰发展而建设搭发展起来嗰。伊正确译音是“帕廓”街，帕，意思是中；廓，意思是转。按西藏佛教徒嗰讲法，以大昭寺为中心，沿辣长方形嗰街道绕一圈称为“帕廓”，意思是“中转”，表示向供奉辣大昭寺里嗰释迦牟尼佛朝拜。八廓街勿但是宗教街、观光街，而且是旅游者第一选择嗰购物街。八廓街嗰店主侪通晓汉语，英语也会一眼，勒拉搿个地方买物事勿会有任何语言障碍。搿搭有真古董，也有极度逼真嗰仿制品，搿就需要侬有一双明辨真假嗰火眼金睛了。讨价还价勒拉搿搭既是一种乐趣，也是一种必须，大致可以先砍去一半嗰价钿再进行讨价还价。需要提醒侬一下嗰是：价钿一旦讲好，就最好将物事买下来，否则邪气有可能会造成勿必要嗰麻烦嗰哦。

（3）

2004年8月22日晴布达拉宫

今朝上半日参观完大昭寺，下半日我伲就前往神往已久嗰布达拉宫游览了。布达拉宫坐落辣拉萨市中心、古城西北约2公里嗰红山上，最高海拔3767米，是世界浪向海拔最高嗰古代宫殿，融宫殿、城堡搭寺院于一体，堪称西藏建筑中嗰经典之作。“布达拉”是普陀罗（普陀）嗰译音，意思是菩萨居住嗰宫殿，表示观音持航以普度众生嗰意思。

相传公元7世纪嗰辰光，吐蕃赞普松赞干布搭大唐联姻，为了迎娶文成公主而修建搿座宫殿，直到今朝还存在法王修法洞搭观音佛堂两处早期建筑。现有建筑群是17世纪中叶五世达赖喇嘛受清册封后开始兴建嗰，经历代达赖勿断扩建而成。1961年国务院将布达拉宫列为全国文物保护单位。上世纪90年代，布达拉宫被确认为世界文化遗产。

布达拉宫由红山南麓而起，依山而砌，几乎占据了整座红山。宫高117米，东西长360米，外观13层，实际是9层，面积约12万平方米。殿宇巍峨，金碧辉煌，共有佛堂、经堂、灵塔殿、习经室15000多间。整个建筑侪是石木结构，以方石垒砌。室内陈设有几十万个用金、银、铜、玉搭檀香木等雕铸嗰大小佛像，造型邪气生动逼真，高大宽敞嗰殿堂墙浪向还绘有色彩鲜艳嗰壁画，集中体现了藏族人民高度嗰建筑成就搭独特嗰艺术风格。布达拉宫分为红宫搭白宫两大部分，红宫是历代达赖嗰灵塔殿搭各类佛堂，位于整个建筑嗰中心搭顶点，象征搿须弥佛土搭宇宙中心。白宫环辣红宫外侧，是历代达赖嗰宫殿。

我伲气喘吁吁登上红山，俯瞰整个拉萨市景尽收眼底。刚刚走进布达拉宫，四川籍嗰导游就调侃地讲：“右面是世界上海拔最高嗰洗手间，大家走过、路过，千万勿要错过噢！”，有效地调节了旅行欢快嗰气氛。进入布达拉宫，人人侪像刘姥姥进了大观园一样，目勿暇接，叹为观止。

我左手抚摸着“全国文物保护单位”嗰铭牌，自家兴奋勿已地默默辣心里向念念有词：魂牵梦萦嗰布达拉宫我终于来了！今生到此，勿虚此生。

（4）

2004年8月23日晴纳木错

我伲以往8月份到新疆等地方旅行，沿途难板看到远处稍微出现几座雪山就会惊喜万分。而搿次到了西藏再看看连绵千里嗰雪山真是太平常勿过了。我伲看到远处嗰雪峰勒拉太阳嗰照耀下银光闪耀，激动嗰心情勿能自己。有嗰情勿自禁地吟诵起毛泽东嗰《沁园春.雪》：北国风光，千里冰封，万里雪飘。望长城内外，惟余莽莽。山舞银蛇，原驰蜡象，须晴日看红妆素裹，分外妖娆。江山如此多娇......，大家更兴奋了，一道勿约而同地齐声唱起了“红军不怕远征难”，还呒没唱几句就有眼上气勿接下气了。导游看到我伲兴奋过头了，连忙叫我伲快点停下来，搿是高原旅行嗰大忌。我远眺前方勒拉众多雪山簇拥中镶嵌辣一颗湛蓝嗰宝石，导游讲：“搿个就是天湖纳木错。”我平生头一次看到搿样天外嗰震撼心灵嗰美景，心里完全明白了成千上万虔诚嗰穆斯林每年迢迢千里前往麦加朝拜嗰心情。遥望着前方碧蓝嗰纳木错，我随即脱口而出：“我要顶礼膜拜啦”。纳木错越来越近了，我伲先到当雄县县歇歇脚。

当雄、藏语意思是“选择出来嗰好地方”，距离拉萨60公里，位于藏南搭藏北嗰交接地带，羌塘草原嗰腹地，境内平均海拔4300米，全县总人口4万人。当雄位处藏北黄金旅游线路独特嗰位置，到了西藏出现了一桩意想勿到嗰事体，就是随队吃香烟嗰同事从上海带来嗰打火机，到了拉萨就打勿着火了；勒拉拉萨买嗰打火机到了当雄又打勿着火了。只有勒拉当雄买嗰打火机，辣纳木错才能打着火。侬讲神奇勿神奇？估计是随着海拔嗰升高，含氧量逐步减少嗰缘故吧。后来我伲想晓得旅行大巴行经辣海拔到底是高还是低，只要用打火机试一记就晓得了。

我伲搿车子终于开到纳木错，大家侪被眼前搿景色惊呆了。“纳木错”藏语里嗰“纳木”意思是天，“错”意思是湖，纳木错全称意思是：伊是个慈善嗰龙女，庇佑苍生。是藏传佛教嗰著名圣地，信徒尊伊是四大威猛湖之一，搭羊卓雍错、玛旁雍错一道被称为西藏三大圣湖。

纳木错位于拉萨市以北当雄、班戈两县个之间，湖嗰南面是雄伟壮丽嗰念青唐古拉山，北侧搭西侧是起伏和缓嗰藏北高原。湖形狭长，东西长70公里，南北宽30公里，面积是1940平方公里。湖面海拔4718米，是世界上海拔最高、面积仅次于青海湖嗰第二大咸水湖。

纳木错距拉萨仅2—3个钟头嗰车程，是西藏最容易到达嗰圣湖，也是赴藏旅行必去嗰地方。纳木错湛蓝澄净，搭同样湛蓝的天空相映成趣。面对纳木错嗰一刹那，搿碧蓝晶莹嗰色彩，仿佛勿应该是人间嗰物事，特别震撼心魄嗰是从伊身上散发而来嗰一种纯粹自然嗰浩淼无边搭无与伦比嗰静谧，能使人身嗰浮躁顿时退去，剩下一个单纯嗰自我。伊嗰美丽纵是用尽一切赞美嗰词来形容，侪是苍白无力嗰，搿是西藏最震撼我心灵嗰圣地。勒拉海拔4718米碧蓝嗰天湖边，骑辣洁白圣洁嗰牦牛背上，凝视着湖畔山上披满佛教徒奉献嗰千万条洁白嗰哈达，我心潮澎湃真正被圣湖嗰一切深深地陶醉了，似乎感觉来到了自家梦寐以求嗰人间天堂。