 沪语朗读：李国琪
朗读者 来源：新民晚报2020-02-24 作者：江海洋 上海话改写：郭莉 朗读：李国琪 “两月初二剃龙头”。五十年前，我勒勒农场里向当理发师辰光，呒没收过一个徒弟，想勿到五十年以后，勒勒今年迭个瘟疫流行个非常时期，老婆偏生做了我个徒弟。 搿段日脚，我人是静静较蹲勒屋里，不过头发是一歇勿停日生夜长。我是习惯短头发个，头发长了就觉着难过，但是出去剃头又违背了要求居民“宅勒屋里”个原则，真是进退两难，心里实在纠结。眼看就是“两月初二”了，我突发奇想：为啥勿去教老婆，让伊来搭我剃头呢？ 老婆一听，倒是邪气爽快个答应了，不过后头又补了一句：“侬走勿出门，覅来怪我哦！”我个老婆从来呒没拿过剃头刀，有句言话叫做“六十岁学吹打”，比喻到了一定个年龄，学手艺就会得有难度了，更何况阿拉老婆今年已经七十朝外了呢。不过亏得我屋里有把“傻瓜”型剃头刀，我蛮有信心教她试一试。 我先拿自家“全副武装”好，再开始教伊勒勒我头浪向试刀。她拿好仔剃头刀，勒我头浪向比划来比划去，就是勿敢下手。问我，从啥地方开始剃呀？我想起五十年前，我自家勒勒理发店当学徒辰光师傅告诉我个言话：第一刀要从鬓脚开始剃起，搿能就可以避免拿两边鬓脚剃得一高一低。不过现在用个是“傻瓜”剃头刀，我已经设定好6毫米长度，所以随便伊勒我头浪哪能剃，留下来个头发侪定规是6毫米长个，勿会产生鬓脚剃得一高一低个结果，也勿会拿头剃得坑坑洼洼、高低勿平。乃末我告诉老婆讲，侬放心，随便侬直剃横剃侪呒没关系，不过侬一定要一刀一刀挨下来剃，搿能就有了次序，勿会漏脱一块。老婆当然言听计从，完全按照我个要求，一边学一边做。伊是一歇歇蹲下来剃我头颈后面个头发，一歇歇又踮脚来，帮我剃头顶浪向个头发。搿能一歇蹲一歇踮，几化吃力呢！所以我就教伊：剃头颈后面个头发辰光，可以拿我头揿下去；剃头顶头发辰光么，就让我头抬起来，搿能，侬勿是就用勿着一歇蹲一歇立介吃力了么。 又过脱一歇，老婆人立勒我右侧，手勒勒剃我左边个头发。我有眼觉着好笑，赶快告诉伊：剃右边头发，侬要立勒右边，剃左边头发，当然就要立勒左边，搿能既能看得清，也能剃得好。要勿然，侬自家也觉着别扭啊…… 就搿能一边教一边实践，总算“大功告成”。我马上照照镜子，要看看老婆个成绩。结果发觉老婆尽管戴了老花眼镜，还是勒我头浪留下了一小撮一小撮个长头发，特别是耳朵背后，长头发更多了一眼。乃末我只好自己拿仔剃头刀，对牢镜子“打扫战场”。当然，看得见个打扫脱了，还有交关看勿见个，就算是“留作纪念”了。 想想阿拉老婆“七十多岁再学吹打”，实在是邪气勿容易个。还好五十年前我学剃头辰光，讲究啥个螺丝头、一边倒、三七开咾啥搿眼发型，现在侪老早过时了，倒是从前大家认为是剃坏脱个发型，啥个崇明蟹头、痰盂罐盖头、阴阳头咾啥，现在反倒变成了个性咯、时髦咯。哈哈，老婆啊，侬尽管大胆勒我头浪向尝试，说勿定阿里一日，侬搭我剃了只怪发型，结果拨人家当成时髦发型流行起来，阿拉倒是还可以申请一只专利了呢。 阿拉两夫妻今年侪已经年逾古稀，想当年我勒勒农场介许多年数，倒呒没带过一个徒弟，今后当然也勿会再有带徒弟个机会。啥人晓得搿辈子，老婆既是我个开门徒弟，也成了我个关门弟子！ 非常时期，我更加深切个感到，老婆，侬，是我个唯一！ 
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 | 编辑：渺渺
|
|
|
来自： 渺渺m69vnzsah9 > 《待分类》
