 大姨：轧拉迭个（香米）蛮粗个 父亲：应该要轧来细眼，个么烧起来快呀，粗个烧起慢 （我：风干拉个是伐） 大姨：哦哟，我看电视剧么好笑个，两个美国人…… 外公：要摆一道烧大概 姨父：香米呀，小香米呀，就是米呀 外公：烧粥烧饭吃噶？ 大姨：侬看看看噶，小香米是啥啦？白个呢红个啦？ 表姐：黄个伐 外公：看弗懂 母亲：哎，就迭个沙发 我：还可以吧 母亲：伊就是拿脱迭个一只（沙发构件） 大姨：我看弗出（包装上个小字）侬看得出个咯伐？ 母亲：迭个三只（沙发构件）忒长嘚对伐，伲屋里没介大，乃末拿脱一只，变两只，再加只迭个，你觉着可以伐啦？颜色么就迭恁介个 我：可以呀 外公：眼睛侪不来事嘞，小个（字看弗出） 父亲：手机拍照，拍好仔放大呀伐 大姨：黄个呀，迭个弗是烧饭个，小米，就是小米 （我：戴拉迭个腔调倒蛮好个） 外公：也烧粥个啊？弗是当米吃个？ 大姨：弗是烧饭个。黄个，小米。 母亲：小米呀，就是侬烧粗粮咾啥 大姨：喏，脱簪簪米摆拉一道 外公：烧杂粮粥对伐啦？ 母亲：哎，杂粮粥厾眼许，厾眼许就好啊嘚 外公：侬讲杂粮粥我有数啊嘚 父亲：杂粮粥喏，侬烧个辰光，搿眼碎簪簪米侪好摆拉许 姨父：烧拉薄眼，覅厚来兮 母亲：烧拉薄点，平常啥，平常实际人家饭里厢咾啥也厾眼许个 姨妈：（女儿名），侬哀个（蛋糕）覅买叨 外公：乃天瀴时杂粮粥烧两碗 姨妈：什么“粑粑坊”？ 母亲：糯米粑粑坊，上趟介绍我去买过个喔 表姐：伲同事昨日子还拉买嘞 姨妈：乃覅买叨，三无产品，无证无照 表姐：三无产品多了去了 母亲：三无产品多了去了，真是，多来 表姐：就是讲呀 姨妈：弗卫生个 我：哎，个么哀个鸡头米㑚吃过伐 表姐：有证也弗一定卫生 母亲：鸡头米啊，鸡头米么芡实呀 我：我上趟听到讲苏州人吃拉蛮多个 母亲：哎，鸡头米蛮好个呀，补血、补气、补肾个 我：侬吃个伐啦，鸡头米啊 母亲：没吃过呀，哦，弗大吃个伲。迭个是，哀个，实际也蛮好个呀。苏州弗是极多个喔。伲哀趟子到哀个西山去，旁边头卖个侪是迭个呀伐，一包一包是。老百姓自家，渠拉自家种个大概啊？ 姨妈：十几块一两嘞 外婆：弟弟喏，只凳拉开来坐喏，只凳， （外公：今朝眼垃圾结棍伐？） 外婆：乃只猫弗坐啊嘚 我：今朝侪是海鲜个壳 （外婆：两地桶，大丰收 外公：拍满一桶 姨父：侬一日天个海鲜清理过啊末？ 母亲：中塱厢个倒脱啊末？ 外公：弄脱啊嘚侪，摆拉弗灵个 外婆：哀只猫占拉只位置，哦只狗也占拉只位置 母亲：只狗板要上来个呀 我：弗是上趟我哀个四川个室友，伊讲伊没吃过芋艿，毛芋艿，伊讲弗晓得啥叫毛芋艿 （大姨：侬拿两只拨伊吃吃） 我：绍兴个（室友）肯定吃过个，但是四川个弗晓得 （父亲：侬叫大大奶奶蒸好仔拿两只拨伊吃吃） 母亲：哦，伊没吃过啊，渠拉大概四川没得种物事个喔 大姨：弗一样个，学出来物事弗一样个 母亲：侬慢点喏，拿两只拨伊尝尝味道，香来，侬脱伊讲 （感谢 @长天照影 浦东新区三林镇 供稿） |
|
|
