|
麻雀儿叉麻将——吴语儿化音
▲纽子糖 摄于奉贤西渡  《麻雀儿叉麻将》，大家看见昰只名头，作兴一呆：“啥啊？麻雀儿竟然会叉麻将？”嘿嘿，昰个当然是话笑啧。不过，有心个人肯定也发现啧，麻雀儿昰种小鸟忑麻将牌蜪倒也是搭得连縴个——因为【亻渠】【土耷】垃伲昰上啊，读音是一样个——树头上有只麻雀儿，今夜头去叉麻将。 个么麻雀儿昰种鸟忑麻将牌蜪，到底有啥关系嗫？大家肯定晓得，垃我伲汉语里乡，有一种现象，叫儿化。可能有个人要话啧，嚎，儿化！晓得！普通话不就有儿化个咾！舌头一卷，忑前头个字倂垃一蜪么就是儿化呀！像“一个人儿、一朵花儿、一个字儿……”再熟悉不过个啧！不过昰个忑麻雀儿、麻将蜪有啥关系嗫？昰两样物事搭不连縴个咾！覅急，覅急，笃笃定定听我讲下去好啧。 现代汉语共同语——普通话，使用个是北京语音，为著便于理解，佷可以拿【亻渠】还原成“北京闲话”来看。北京闲话里“儿”读er，个么儿化昰只现象塱北京闲话里就是er昰只音忑前头个字蜪倂成功一只音节。我伲吴语里r昰只读书音也是受北方闲话影响形成个，譬如“儿童公园、小儿科”嘞啥。 若然话“儿”个读书音大家不大熟悉或者觉着话得不大顺，个么“儿”个口语读音相信大家再熟悉不过个啧！所有个男个，侪是爷娘个儿子，昰个上，nyi2就是昰个字个口语读音，或者称为白读，昰个是本地土层个读音，相对来讲越加接近古汉语。“猫儿”个“儿”也就是“儿子”个“儿”。姓氏“倪”忑“霓虹灯”个“霓”侪是形声字，【亻渠】【土耷】个声旁（“边旁”，嘉定清化）就是“儿子”个“儿”，昰两个字从现代北京闲话个读音来看，忑【亻渠】【土耷】个声旁“儿”蜪大推扳垃许，已经看不出是形声字啧。但从当代吴语本土个白读音来看，原旧有能看出来昰两个字塱几千年前头造字时代个读音是差不多个。 乃么昰个“儿”嗫，垃塱吴语里乡常庄变成功一个独立个鼻音ng，譬如“囡儿”；有个地方还有“小娘儿”昰个词。还有听说讲有排户荡“儿子”就是话成功“ng子”个，忑鱼肚皮里个“鱼籽”蜪发音一样。“连娘带ng”里个ng也应该就是“儿子”个“儿”、“囡儿”个“儿”。 乃么“儿”个读音变成功著ng嗫，就容易忑前头个字蜪倂成功一只音节，寔恁就形成著“儿化”现象，只是，吴语里个儿化是啈前头个字听上去有鼻音，而北京闲话个儿化是啈前头个字带著卷舌头个动作。因为“儿”昰个字垃塱汉语不同个分支里乡读音不同，个嘞不同地区个儿化，垃语音上个表现形式也不一样。为便于理解，下文当中个“儿化”不用受北方闲话影响而形成个读书音r，而用吴语口语里乡个读音ng，读“ng化”。 吴语里个儿化词，作为嘉定人来讲比较熟悉个有： 开头话着个“麻雀儿”，就是“麻雀”个儿化音。据说，叉麻将就忑打麻雀儿蜪有密切个联系，而“麻将”“麻雀儿”读音一样，昰个可能是麻将牌起源于吴语区个有力证据。需要说明个是，“雀”塱中古汉语个音韵地位是精母字，按照规则读音，声母应该是不送气个ts，现在塱“孔雀”“雀子斑”嘞铤词里读成功送气个tsh声母，作兴是受北方闲话个影响形成个。“麻雀儿”昰种鸟个吴语读音就反映著“雀”本来读ts声母个汉语规则读音。 “丫头儿”，就是“丫头”个儿化音，“丫 头 儿”连读就是“丫den”。 “猫 儿”，也可以话成功“man2”，man2就是“猫”个儿化。个嘞不管是话mau nyi还是man2，本字侪是“猫 儿”。令人喜爱个物事或者小物事容易儿化，或者变成功阴平调，有个场许mau2就从阳平调变成功著阴平调mau1，儿化就是man1。 “骨髓儿”，就是“骨髓”个儿化音。“髓”塱中古汉语个音韵地位是心母字，规则读音声母是清音s，“骨髓儿”就还保留著“髓”个规则读音seu3。“骨 髓 儿”合音就是kueh sen。“髓”还有一个口语读音是si3，譬如“脊髓”。现在交关人拿“髓”读成功浊音zeu2，作兴是受邪母字“随便”个“随”影响误读成著z声母。 还有听说讲有排户荡有“阿叔”个儿化“阿叔儿”，“老头伯”个儿化“老头伯儿”，“气味”个儿化“气味儿”嘞啥。 不过，吴语里有排字个儿化已经呒不鼻音啧。譬如有排场许“下夏丫桠哑”嘞铤 假摄开口两等麻韵见系字 读o韵母，但相同音韵地位个“虾”倒读oe韵母，忑“干看汉汗安”嘞些儿 山摄开口一等字 个韵母一样啧，蛮可能就是“虾”个古音ha1儿化变成功han1,乃么忑 山摄开口一等字 一蜪变成功著hoe1。 与之相似，“囡”，有排学者就认为是“女儿”个合音。“女”除脱著有遇摄三等个读法nyiu4，塱吴语区交关户荡还有 假摄开口两等马韵 个读法，乃么马韵二等 个早期读音na4儿化之后变成功nan4，然后忑“干看汉汗安”嘞些儿 山摄开口一等字 一蜪变成功今朝个noe2。 当然，为此著笔者所在个地区“下夏丫桠哑”嘞铤 假摄开口二等麻韵字忑“干看汉汗安”嘞些儿 山摄开口一等字 韵母本来就一样，侪是oe（后oe），大家蛮难有直观个认识，但塱有排地方，昰两组字个韵母是不一样个，一边是o：“下夏丫桠哑”；一边是oe（前oe）：“干看汉汗安”。大家不相读读看，试一试，寔恁就晓得昰类字个儿化是哪恁桩事体啧。 当然，现代吴语个儿尾词、儿化词作兴不算多，但据说，从明朝冯梦龙编个苏州一带个民歌集《山歌》《桂枝儿》嘞排作品来看，古代吴语个儿尾词应该讲是相当丰富个。 总数，汉语个儿化现象，不是只有北京个卷舌头昰一种表现形式，南方个吴语同样有昰种现象，只是吴语里个“儿”通常是以口语读音ng来参与其中个。希望吴语区个人侪有能对自家个母语——吴语多一眼认识。 疁·浏河长江 2014-5-26 礼拜一 甲午年 四月廿八 朗读：疁·浏河长江 |
|
|
