【原】愚园路上有一座消失了的“愚园”？

渺渺m69vnzsah9 2022-03-30

展开全文

沪语朗读：沉默是金

朗读者

愚园路上有一座消失了的“愚园”？

原创：薛理勇

来源：档案春秋2019年9月3日

上海话改写：郭莉

朗读者：沉默是金

推荐：丁迪蒙

曾经有人提了搿能一个问题：上海个西区个愚园路，总应该有一只叫做“愚园”个花园，再会有搿条路名咾？葛末，迭个花园勒啥地方？为啥体现在寻勿着了？是勿是留下来啥个遗址、遗迹呢？还是请大家听我从头讲起伐。

的确，叫愚园路，是因为有一只叫做“愚园”个花园。搿只花园，勒勒愚园路靠近常德路个地方，最早是一只马棚。马棚呢，又跟附近个静安寺有关。

静安寺是上海为数勿多个千年古刹、名胜古迹，距离当时个上海县城大约概有十几里路。当年呒没从县城通到静安寺个路，县城里向人要到静安寺进香礼佛，或者要踏青郊游，有两种选择：一种是摇船走水路到静安寺；一种是穿过田间小路到静安寺。进香礼佛个侪是“小脚老太婆”，伊拉步履蹒跚，当天往返是邪气困难个。

1860年，上海英商跑马总会修了一条从跑马场通到静安寺个马路，想勿到就是迭个一年，碰着了太平军造反，马路还呒没使用就损坏了，跑马总会勿愿意再出铜钿修马路，乃末租界工部局接管，搿条路就变成了“市政道路”。伊个名字叫“静安寺路”，也就是现在个南京西路。

静安寺路开通，方便了大家出行，上海县城里个人可以步行到泥城桥，再沿牢静安寺路到静安寺。不过，从泥城桥到静安寺大约概有得7里路，男人大概要走一个半钟头，小脚女人就可能需要三个钟头了。乃末就有一种公共个“交通马车”应运而生。坐马车到静安寺个人越来越多，马车需要停车场，马匹需要休息、喂草料。所以，19世纪70年代，静安寺东头出现了一家“公一马房”，后来，马车行老板发现，经营马车搭仔停车场个收入，远远勿及直接经营旅游生意收入高，索介就拿停车场改建成了营业性个花园，花园取名叫做“申园”。

申园是以中国传统园林布局为主个，同时里向也有交关建筑物是西洋风格个。搿是一座综合性游乐园，到此地来个，有“五陵少年”、“碧眼洋人”、“大腹贾胡”，自然也少勿了一批专门“采蜂扑蝶”个朋友。不过，勿晓得啥个原因，，也勿晓得是啥个辰光，迭个申园停业了。后来有人勒申园原来个位置浪向，修建了“愚园”。

有一段文字搿能记载：愚园原来位置是静安寺东北半里路左右，光绪十六年，宁波人姓张个创建，后来买进卖出好几趟。民国六年以后花园就废脱了。愚园路就是因为迭个花园得名个。

1909年上海环球社出版个《图画日报》讲得更加清爽眼：迭个花园是宁波镇海姓叶个，后来个常州人姓刘个用十一万两银子买下来了。进园子白相，要一角门票，门票铜钿主要用来作为平常修理费个补充。

勒迭个过程里向，张、叶、刘侪吃勿准是啥人了，但是有一点可以肯定，愚园勒勒开始辰光，是富豪人家屋里向个私家花园，大概到了常州姓刘个手里，开始收门票，不过收来个钞票，只是用来补贴修理费用而已。又过了几年，愚园就成了邪气有名个营业性花园。1910年《上海指南》就搿能介绍：

愚园，勒勒静安寺路西面，赫德路八号。进门，过小桥，有一幢楼，楼前有乔木、紫藤。楼后有池塘，池塘上面有小亭子。再过去还有假山，福建人辜鸿铭写个外文诗歌刻勒石头浪。背后还有一幢小楼。楼西是球场、弹子房，弹子房东面还有鹿柴虎栅。门票每人一角，吃茶一碗两角，小吃零食一盆一角，还有各种点心。

顶顶闹猛个辰光，愚园面积大概有50亩，差勿多是后来“庙弄”，也就是南京西路1634弄以东，整个南京西路、常德路、愚园路所包围个地方，大门开勒勒常德路浪。

进入民国以后，情况发生了变化。市中心 “新世界”、“大世界”、“小世界”、“神仙世界”咾啥综合性游乐场大量出现，迭眼地方设施更加先进、更完备、更加时髦、更加好白相，加搿就拿大量游客侪吸引过去了。乃末愚园经营连年亏损。1908年，静安寺到虹口公园个1路电车通车，带动了沪西房地产业发展。无力支撑下去个愚园，就被拨静安寺房地产公司收购了。

洋房、公寓在勒此地拔地而起，乃末愚园迭座花园，勒勒房地产商个操作之下，拆分建成了一眼住宅项目：吉美邨，也就是后来个南京西路1610弄、康泰公寓，也就是后来个愚园路11号、爱丁登公寓，也就是后来个常德路195号，还有周边几幢花园洋房。

现在，庙弄、吉美邨、康泰公寓侪已经拆脱了，愚园路口个几幢洋房，只有81号刘长胜故居经过整幢朝东平移之后，还保留为“中共上海地下组织斗争史陈列馆”。而常德路195号总算硕果仅存，现在伊叫“常德公寓”，因为著名作家张爱玲曾经住勒里向，乃末公寓底层就开了一家咖啡馆，店里陈放了交关跟张爱玲相关个书籍或者其他啥个物事，侬走过伊面，倒也勿妨进去看一看。