|
荻港古村介歇(现在)个名气，是蛮蛮大唻。 其实老底子(以前)辰光(时候)，荻港也是个江南小镇，镇上有两条像模像样个靠港古街，江南多雨，街路上，都有庑廊连接，走街路上，衣裳就弗会得拨雨打湿(衣服不会被雨打湿)。 商业社会个今朝(今天)，荻港还是保留得原汁原味，呒不(没有)像其它江南古镇一样商业化。
勒(在)荻港，尔(你)会得(能)看到世世代代住特镇上个人，勒(在)庑廊下底(下面)个石板街上，慢慢叫(慢慢地)个跑路(走路)，碰着了，讲讲家长里短；尔(你)会得(能)看到老年人勒(在)街边靠港个美人靠上，坐勒(在)边吃茶，边嚼嚼白调(聊天)；会得(能)看到老底子(以前)孔乙己时代个尺字柜台；还会得(能)看到剃头店梁上挂着个拉风条，(老早呒不电风扇，剃头店梁上会挂着长条个帆布，拉动起风，头发弗会粘了面孔上，一般都是等客为上客拉风)。
镇上个一切情致，都蛮古风。 到荻港去白相(玩)，顺便还可以去吃个荻港炒鱼，荻港炒鱼，勒菱湖、湖州附近、勒南太湖一带，名气大煞。 老早(以前)菱湖弗(不)通汽车个辰光(时候)，到荻港去要乘轮船，一角洋钱船票，轮船“呯呯呯“，要开半个钟头，也有交关(很多)菱湖人，会约约伴，聚个五六个、七八个朋友，专门到荻港去吃盆炒鱼。 我约朋友们也去赶过箇个时髦。 为啥荻港炒鱼介好吃呢？ 听人家讲，荻港有个老厨师，外号叫“鸡骨头庆生”，真名我弄弗清爽(明白)。老早 ，伊(他)勒国府四大家族之一个陈家做厨师，陈家是湖州人，陈果夫的夫人又是荻港大户人家出身的小姐，要用老家厨师，做出来个菜，才对胃口啊！鸡骨头庆生烧菜个技术特别精通，水乡出去个人，做鱼菜，特别是炒鱼，越发(更加)是拿手好戏了。
49箇(这)一年，陈家要跨海过去，邀伊(他)一道，伊(他)弗(不)高兴，用啥理由不去，弄弗清爽(明白)。伊(他)就留勒(在)老家荻港，勒(在)镇上一爿饭店里做生活(工作)。附近菱湖、湖州的吃客，都晓得荻港有这位名厨，做的菜，尤其是炒鱼，是当地一绝，经常会慕名赶过去品尝。 那个辰光(时候)，东西便宜煞，记得烧一小盆炒鱼，只要两角洋钿(钱)，一大盆，三角八分洋钱，中盆几钿，记弗(不)牢了。 伢(我们)去吃个趟，听别人家讲“鸡骨头庆生”已年纪大唻，自家勒(在)边上看看，放手拨(给)徒弟烧唻，但那个炒鱼担(端)上桌来，确实味道是大弗(不)一样。浓油赤酱，滋味正足，是弗(不)用讲唻，那个炒鱼块一上口，彻骨粉嫩，感觉不到丝丝缕缕鱼肉个纤维，倒有点像西湖醋鱼，入口即化，但西湖醋鱼是清蒸出来特，鱼身上浇了调料汁，所以鱼肉弗入味，要蘸了汤汁才好吃，而荻港炒鱼，是用大火翻炒出来特，所以滋味正足，鲜嫩无比。 听人讲过做炒鱼个要点，是要掌握好火候个大小，翻炒个时间，还有各种调料恰当个配比、加调料个时间得(和)前后顺序，只有箇(这)几项都做到恰到好处的结合，炒出来个鱼，才会达到完美的境界。 讲讲容易，其实蛮难，“鸡骨头庆生”可能已经做到唻。 后来吾(我)交关(很多)年数呒不(没有)去过荻港唻。
十多年前，荻港开了家渔庄，是吃、住、白相，还带有会议中心那种度假村形式，还好像是三星级唻。 吾(我)参加市里个会议，去住过几次，会议餐上少弗脱(少不了)有荻港炒鱼担(端)上桌来，吃上去，那个味道和口感，已大不如前了，也是的啊，一个大锅子，一次要叫伊(他)炒出十盆、靠廿盆鱼来，就是请“鸡骨头庆生”出来烧，也炒弗(不)出啥好滋味了啊！ 荻港到菱湖只有七公里路，一直是菱湖下属的一个乡镇，风俗基本一样，菱湖饭店也有炒鱼卖，味道稍微推板(差)一点点，大体上还是差弗(不)多。 以前骑车个辰光(时候)，经常骑到荻港、菱湖去吃中饭，车友们也是特别喜欢吃菱湖菜，而箇(这)道炒鱼，是每次必须要点的。 箇(这)句闲话讲起来，也是前几年个事体唻，介歇(现在)社会变化太快，弗晓得荻港街上，有弗有变化了啊！
作者：清远山人
|
|
|
