|
苏白学堂，做最优秀的苏州话教学与传承平台。 本栏目由灬醉里吴音灬授权转发  孙悟空的朋友最近遭遇了感情危机，具体是怎么一回事呢？让我们一起听他来讲。  「昏说乱话开始哉」  嗯，各位手机前头个听众朋友大家好，欢迎收听今朝一期个昏说乱话。我是唔笃个老朋友孙悟空。乃么，嗯，之前呢停更仔两期，发现少脱仔三四个粉丝，应该讲，哀仗坚持弗下来个人呢，倷下来也覅来关注我，倷也覅来听，倷也覅点开来听。嗯，阿是啦，有啥意思呢，关注则么就认认真真。 哦，估计因为我上一埭讲仔搿本电视剧抄袭勒，估计几个电视剧个忠实粉丝拿我弗关注哉，也正常，我也理解。应该讲各人有各人，当然咯，我也讲得蛮客观个，我也朆就讲看哀个电视剧个人弗好，阿是啦。 嗯，乃么，今朝呢要讲真个是身边投稿，弗是投稿咯，我反正有种人唔笃也弗认得啊，可以讲讲，有种事体。就是我一个朋友，唔倷呢轧仔个女朋友。两家头蛮好，一直蛮好，一直帮我讲，哦出去孛相啊，哪哼哪哼，嗯有，因为搿个，我朋友有个工作原因呢，唔倷跟女朋友碰头个次数弗多。  唔倷有空个辰光首先弗多，乃么有辰光唔倷有空呢，小姑娘亦无不空。乃么歌小姑娘，乃么我问则，搿么，搿小姑娘啥体呢？嗯，因为我也认得，我觉着是唔倷应该有空。我讲倷啥体无不空，唔倷讲，哦，唔倷讲唔倷要陪俚个爷娘，有辰光么要陪俚个媪婆，唔倷讲一径要登勒媪婆搭个。 讲媪婆呢作得弗得了，讲作得唻要乱买物事，乃么，嗯，俚笃娘也弗帮俚买，乃么唔倷帮俚买，铜钿侪用光。啊，乃么呢，铜钿用光过后呢，见仔也会得，嗯，搿么俚弗舍得哉，乃么拨俚铜钿，唔倷缺铜钿，唔倷拨俚铜钿。啊，现在搿淘宝浪买弗是有个蚂蚁花，蚂蚁花呗，我也读弗连牵啊，搿个物事，乃么帮俚还，帮俚还信用卡，乃么出去孛相么拨俚铜钿，帮俚买仔只苹果手机。 唔倷还讲，哦，我女朋友真个省俚铜钿个，我讲啥体，唔倷讲俚买个手机啊是叫官换机，我也弗懂，是啥个意思，反正就是，而且要买个是iphone6，就是小个啦，覅plus7，唔倷讲真个省俚铜钿个。  我，嗯，因为嗯，当局者迷嘛，局外者清，我是一径觉着，有问题，乃么过后呢，也听着点风声，讲搿个女小倌其实有另外个男朋友个，是个警察。乃么搿个警察呢，就有辰光，搿么我哦哟，我想弗对，估计俚有辰光一径讲唔倷勒媪婆搭勒啥个搭估计侪是跟搿个警察勒约会，嗯，也蛮正常呀，乃么唔倷呢，就赛过就是只皮夹子需要俚个辰光呢出来孛相一埭，为仔弗断个铜钿过来，阿对，乃么我想弗对。 乃么过后，唔倷帮我讲哉，讲弗对，我想啥物事弗对佳，因为之前我帮俚讲过，我讲搿个小娘儿呢有个警察是男朋友。唔倷马上来一句，哦，我晓得搿个警察个。我想倷哪哼晓得，唔倷讲，哦，警察是唔倷个朋友，弗是男朋友，我相信俚，放心好唻，无不事体。搿么讲，哦，搿么我也无啥多讲头，倷想多讲唔倷要恨倷个。 既然相信小娘儿，搿么我也是最好相信搿小娘儿是个好人，可以跟俚蛮好个登勒一淘。乃么过后，再过仔一段辰光，唔倷亦帮我讲哉，唔倷侪晓得哉。我想侪晓得啥物事佳？ 唔倷讲搿个小娘儿呢，嗯，住学堂嘛，住学堂，宿舍里向个同学呢，也晓得，侪晓得唔倷有两个男朋友，过后实在看弗下去哉，唔倷一径赛过骗我哀个朋友咯，嗯，只拿铜钿，哪哼哪哼，乃么拿我搿个朋友个微信（vi sin）寻着，加俚，赛过，三个人加俚一个，四个人开只群，拿所有个事体，所有个真相全部告诉俚则。  搿么我讲，乃么我听见哀个消息么我讲，哀种女人么喊俚还铜钿哇。倷拨仔俚几化铜钿，唔倷，乃么唔倷报拨我听，嗯，哀个、搿个算下来加起来要六千，六千五百多块洋钿，我讲六千多块，倷真个舍得个。平常辰光出去吃饭，啊，喊倷请我吃廿块洋钿一份个饭，倷还要帮我算，阿是啦，想想哎，真个心里气弗过，真个是好人闲话弗听，倷讲哀种人自家吃苦头，也，我觉着也是拨俚长长记性。 人生当中哀种，碰着哀种事体，应该讲碰弗着最好，碰着，也穷正常个，人一世，说长弗长呢，说短也弗短，当中要碰着乱七八糟个人呢也蛮多，有种么欢喜显显自家个，也有个，譬如讲啊，譬如讲我讲，哦，我最近勒嗨孛相一个游戏，啊，我觉着蛮有劲，孛相得还好唻，搿个人马上“chua”发一张图片过来，赛过嗯，看看是，研究研究，是估计，哦，唔倷是想表达唔倷狠，结棍。乃么唔倷也弗讲，发只图片出来，啊，就一句闲话也弗响哉。乃么结束哉。 乃么，所以说奇奇怪怪个人呢也非常个多。乃么，嗯，应该，应该讲哀桩事体呢，现在结果呢还弗晓得唻，嗯，我也会继续关注，嗯，用我朋友个闲话讲呢，唔倷讲还要去寻俚谈判唻，嗯，唔倷还要寻俚谈判，搿个女个，寻俚谈判，我觉着谈判，一拍两散，结束，铜钿拿出来，拿弗出来么总归身边认得个人也蛮多，需要帮忙大家帮，嗯，覅唔笃帮啊，我帮俚出出主意，最好阿是啦。  乃么搿个女人呢，倷亦弗好去，哀种事体倷亦弗好去报警唻，亦弗好去敲俚唻，侪弗好做个呀。只好想想办法则啘。通过啥人，哀个屋里向啊，最好再通知着也是可以个。 乃么接下来我会继续关注个啊，乃么今朝节目么就到该搭，压末点送只歌，啥歌呢，送一只我觉着，嗯，希望我个朋友一切顺利罢，铜钿要转来，结束，今朝就到哀搭，再会。 《你的眼睛背叛了你的心》 【版权归作者所有，文字稿由苏白学堂整理推送】  词汇说明： 1. 轧gaeq8：结交。~朋友：谈恋爱 2. 登ten1：（呆）在某处 3. 作tsoq7：自找麻烦或者给别人找麻烦 4. 弗连牵feq lie chie：不成或不像样 5. 省铜钿san don die：省钱 6. 女小倌gniu siau koe：小姑娘，女孩 7. 吃苦头chiq khou deu：得到教训 8. 学堂ghoq daon：学校 9. 显显shie shie：「记音」炫耀，显摆 10. 狠hen3：本领高强 11. 结棍ciq kuen：厉害 12. 敲khau：不很用力地打 听写 | 叶嘉剑 排版 | 予安 |
|
|
