|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 弹硌路浪个伊盏路灯 来源：新民晚报 作者：丁旭光 沪语改写：边秦翌 讲述：王幼兰 审核推荐：丁迪蒙 编辑：王乙其 有种人，天生就勿是做学问个料，譬如我。 当我爱勿释手读小说个辰光，尽管对小说个某些精彩个细节津津乐道，但是呒没过多少辰光，小说个作者或者标题，已经离我远行，我统统侪忘记脱了。 当我对一只精彩个象棋开局又一趟叹为观止个辰光，我居然记勿起来搿只棋谱是出自何方神圣之手。
一只青蛙连绵勿绝个鸣叫声，声音虽然单调、但是极其传神个天籁，让我想起了福格纳，想起了已经无法真实复现个陈年往事，也让我想起了“有约勿来过夜半，闲敲棋子落灯花”个悠闲。 古人闲敲棋子个搿种悠闲，已经成为了今人个梦里依稀。伊种声声个蛙鸣，让我想起了竹篱笆、弹硌路搭仔白墙小瓦，想起了勒勒伊盏昏黄个路灯下头对牢棋盘物我两忘个窦国柱先生。 我随便哪能也没想到，从小个爱好，影响了我几十年。 窦国柱先生是象棋名手，上海文史馆馆员，中国象棋史浪赫赫有名个“扬州三剑客”之一。窦先生住个地方就是搿歇个正阳路，白墙小瓦，墙壁浪向，竹篱笆紧紧个贴勒海。窦先生屋里个对过，是条弹硌路。弹硌路个两旁边，是同样个十几间白墙小瓦个“本地人”房子。房子个两侧呢，是一大片个农田。夏令时节，有得蛙声一片。
大概勒勒我八九岁个辰光，每日天夜到，我像只小猫一样，蹿到窦先生门口头伊盏昏黄个路灯下头，看伊着棋，听伊津津乐道：“象棋寄寓勒红黑、阴阳、动静、刚柔相克个大道，必须专心再可以有所得。” 呒没想到，平常辰光勒勒街头巷尾司空见惯个“楚河汉界”，到了窦先生此里，变成功了古往今来个智慧白帆。一记头，我是如痴如醉呀。因为耳濡目染了车马纵横个妙趣，久而久之，我是浸淫楚汉而勿能自拔了。 多少年数之后，我又勒勒新落成个小区里听到了青蛙个叫声。新小区搭当年窦先生住个地方只是一墙之遥。一声声蛙鸣，来自小区里个人造池塘。人造池塘虽然缺乏野趣，但是却引来了天籁。一声声个蛙鸣，因为一张网个介入，再也听勿到了。消失个蛙鸣，让我想起了一生“只写邮票大小个故乡”个福格纳。我想，福格纳个故乡肯定是蛙声勿断，否则，伊哪能会得一生一世只写邮票样大小个故乡呢。 我个故乡，也是邮票一样大小个，搭两条已经消逝个河流相邻：一条是肇嘉浜，另外一条是日晖港。六十年以来，我四易其居，总归是勒勒迭只“邮票”一样大小个方寸之地里兜兜转转。迭只方寸之地，是我灵魂个居所，精神个家园：伊只竹篱笆围成功个大院，伊栋北方四合院个建筑，伊条长长个弹硌路，伊个“三年勿开张，开张吃三年”个古董商人，侪一趟趟个出现勒我个小说里向。而窦先生门前个伊盏昏黄个路灯，白墙小瓦搭仔弹硌路等意象，一直浮现勒我个小说里向，至今还呒没退隐个迹象。
我是个作家，也是个棋手，研棋打谱，成为了我生活当中一个重要个组成部分。尽管，社会已经发展到了多元化时代，就算是多元化带来个种种诱惑，也无法让我远离象棋。勒勒我六易其稿个长篇小说《烟雨秦淮》里向，象棋元素一直蔓延其中。 当我面对棋盘打坐个辰光，一声声蛙鸣又来造访了。迭一声声个蛙鸣，让我又一趟想起了弹硌路浪向个伊盏路灯。我固执个认为，伊只青蛙，是从古诗里向游出来，隔手，从肇嘉浜游到了窦国柱先生个门前，再挨下来，又游到阿拉小区个池塘。 勒勒一声声个蛙鸣里向，我凝思尺半方寸个棋盘之后，又开始了神游八荒六合。
作者：丁旭光
讲述：王幼兰 丁迪蒙 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： |
|
|
