|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情
弄堂小插曲 作者：胡宝谈 推荐：丁迪蒙 编辑：王乙其 前文回读 第二集 3、西瓜讲述：张黎明 弄堂里，人人晓得，王伯伯闲话顶多。 49年打仗辰光，王伯伯等8路有轨电车，横等竖等，勿来呀，只嘴巴淘气：“戳㑚！8路哪能还勿来！”
隔手，便衣拿伊捉脱了。还算好，伊额角头高噢，第二日天，阿拉上海解放了呀。 66年辰光，有一枪，日日造反，司机精神头勿灵光，开起来，一歇勿停，翘辫子。 明明叫，看见部电车就隔条马路了，红绿灯翻仔七八趟了，断命还辣一条马路外头。 “戳㑚！土8路是搞勿好！”王伯伯骂句山门。 老早改成28路了，侬还要叫句子叫8路啊，还土8路唻，含沙射影，恶攻是伐！两个红袖章跑上来了呀，预备揿牢伊，请伊勿出钞票乘车子，乘到白茅岭疗养去呀。
又是额角头噢，王伯伯刚刚亲眷屋里转来，手里拎了只平湖西瓜，一看苗头勿对，马上西瓜敲开，请客，总算逃转来了。
讲述：张黎明 4、毛栗子讲述：胡运皎 老早仔，奶油五香豆是蛮吃香个。毛豆子屋里发个年货券，我看见过个，上头炒货一档里，特为写清爽：可以买五香豆。
我小辰光是，只欢喜吃一半。 一粒豆，嘴巴里含好，吃上头层“奶油”（人家讲，其实是盐霜），吃脱了，挺下来我就覅吃了，嚼发嚼发，好像吃皮鞋了呀。每趟，我侪要吐伊出来，请人家吃。 阿拉爷面孔一板，关照我，吃下去，勿听言话阿是，毛栗子敲上来了噢。呒没办法呀，只好请客阿拉娘了。
每趟，伊侪要讲脱我两句：“勿欢喜吃，葛侬覅吃了呀。” “我欢喜吃个呀。我小人，忒硬了呀。”末脚，粒豆吐出来，香嘴巴能介，又吐到伊嘴巴里去了。 勿是一粒噢。前头旧个一粒，刚刚吐辣伊嘴巴里，后头新个一粒，我又含好了呀。 笃！阿拉爷请我吃毛栗子了。 我肚皮里辣想：凶煞脱唻，只会得打打我，有本事武松打老虎去，侬电灯泡拉得出几只啦！
讲述：胡运皎 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： |
|
|
