|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情 到兰心大戏院看“宝兴里” 是啥感觉？ 作者：马尚龙 沪语改编、诵读：朱友好 审阅、推荐：丁迪蒙 编辑：王乙其 《宝兴里》勒兰心大戏院演出，是拿上海个市井气搭上海个典雅之气融合了一道。既有典雅也有市井个上海，才是更加生动、更加鲜活、更加完整个上海。
看剧，我有一个习惯，先到剧院门口看看，是闹猛还是冷清，还有，啥人来看。还呒没走到兰心大戏院，已经看到了剧院门口有交关人，走近一看，年纪轻个人勿少。30岁上下，大约有三成，因为兰心售票窗口预约拿票排队个侪是年纪轻个人。滑稽戏《宝兴里》有年轻观众。迭个是第一印象。 坐好以后，看看有阿里一眼演员，有王汝刚、钱程等名家，大多数侪熟悉个，也有年青个演员，有一个演员叫“豆豆”，男个。我勿熟悉，就问座了我旁边个年青人，年青人有眼看勿懂我个样子，伊是“笑果”个，演脱口秀个呀。年纪青个观众大多数为豆豆来个。
我稍微晓得一眼，现在个脱口秀受年青人追捧个程度。去年，大世界请我去看看伊拉个周末演出市场，大世界已经是脱口秀个大世界，相声搭独角戏已经邪气少了。开场辰光，豆豆单挑观众，用脱口秀个方法讲了一段，像煞是主持，后首来就是演出当中一只角色，演出快结束了，伊又讲了一段搭宝兴里呒没关系个闲话，像开场一样个收场。 有段辰光，勒我个印象当中，有交关滑稽戏剧目，是为了宣传好人好事搭社会新风尚，有眼像活报喜剧。《宝兴里》讲个是二级旧里个动迁，看戏前头，勿晓得会有啥新个故事，但是开场以后，就看出了伊是要走票房路线个。伊是要讲一只故事，讲一只真实背景、真实事体当中虚构个故事。故事讲了精彩还是勿精彩，直接搭票房有关系。
两个多钟头个演出，笑声明显是蛮多个，也听得出年轻人个笑声。豆豆勒戏当中个角色并呒没啥好笑，也就是讲，笑声是拨《宝兴里》迭部滑稽戏个。王汝刚出场，还得到了邪气长个掌声。 脱口秀摆了滑稽戏里，带来了脱口秀个人气搭年轻。当然，“笑果”也是得利个一方，伊摆了《宝兴里》，让自己搭海派文化、上海迭座城市有了实实在在个关联。就迭能，“笑果”勒兰心个演出，有了加分个口碑意义。而《宝兴里》勒兰心演出，就是一个美妙个结合？
宝兴里因为勒1950年诞生了中国第一只居委会而与众勿同。宝兴里距离外滩、东方明珠个物理距离邪气短，但是搭外滩东方明珠明显勿勒勒同一个生活频率上头。伊是老里八早个石库门建筑，倒马桶，几代同堂 ，是宝兴里居民勒2019年动迁之前一生一世个常态。宝兴里浓缩了上海个市井之气。 兰心大戏院个身世截然勿同。近百年来，上海交关高大上个文艺事件发生勒兰心。后来活跃勒英国皇家芭蕾舞团个著名舞者玛戈特·芳婷，1931年勒兰心大戏院登台了，到现在，兰心还保留了伊个画像；1959年，小提琴协奏曲《梁祝》个第一趟演出，也是勒兰心。兰心象征了上海个典雅之气。 《宝兴里》勒兰心演出，是拿上海个市井之气搭上海个典雅之气融合勒一道。既有典雅也有市井个上海，再是更加生动、更加鲜活、更加完整个上海。
上海也叫作“大上海”，迭个是从近百年前交关个“远东第一”以后，一直延续到现在个美称，上海所有个典雅，侪可以从“大上海”当中寻到脉络。但是大上海是上海个A面，至于B面，我认为是“小上海”。小上海勿是大上海个反面，而是另一个切面，就是市井世俗个上海。现在宝兴里个市井生活，搬到了兰心大戏院舞台浪，典雅对接市井，共同呈现个是上海个A面搭B面。对《宝兴里》个动迁本身讲了勿多。主要讲了以石库门为代表个上海市井生活。石库门里向发生个故事，就是上海人个故事，上海个故事。 剧中有一段戏，支援三线建设几十年以后退休回上海个阿姐，怀疑要搭弟弟、侄子抢房子，虽然情节走向从逻辑浪来讲有眼生硬，但是伊引起了观众个共鸣。迭个是上海人记忆深刻个历史，还会联想到更加普遍个上山下乡，后来几十年一连串个家庭财产连锁反应。
还有一段讲到了以前弄堂里每个人都有绰号。一记头就拿弄堂个特性弹出来了。绰号侪有眼开玩笑个样子，勒社会一个点浪有被刺痛感，正好又显示了年代特征，也是小上海个烟火气。 前前后后几十年个上海故事，勒《宝兴里》好像有又好像呒没；轻松就过去，并勿是呒没留下痕迹。散场以后，勒茂名南路浪走，我后头正好有两个女青年勒讲刚刚看好个戏。听声音，是上海口音，我也就保持相同个距离，“偷听”伊拉讲看戏以后个感受。 她们倒是呒没讲是为了豆豆来，讲个是《宝兴里》本身。 一个人讲，蛮好看蛮好笑个。 另外一个人讲，是个呀是个呀，也蛮有意思个哦；几个名家表演邪气有功底。 一个人讲，介许多个各地方言也蛮好听个。 另外一个人讲，不过我勿是特别习惯介许多个方言。像阿拉爷娘伊拉，搭剧中老吴差勿多年纪，侪是讲上海闲话个，老早就呒没家乡口音了。要是侪用上海闲话来表演，就更加真实更加亲切？ 假使是勒座谈会浪，我会搭伊拉一道讨论个。各地方言是滑稽戏个重要标识，老少有其他地方戏曲会得像滑稽戏一样，一出戏有多种方言，甚至还常庄拿各地方个戏曲唱腔引进来。
各地方言本身是上海一个时代个烟火气。上海开埠以后大量移民形成个各地方言混居，拨滑稽戏巧妙利用，生动体现了七十二家房客个语言交汇。不过也勿得勿讲，现在个上海，各地方言已经勿再是市井语言个主角了。 我放慢脚步，让两个女青年过去。伊拉有伊拉年轻人个想法。 伊拉勿晓得，各地方言个运用，是滑稽戏个独家本事，甚至可以讲是滑稽戏个“镇馆之宝”。假使呒没各地方言，滑稽戏还是滑稽戏伐？滑稽戏个传统观众会得接受吗？我想勿出答案。
作者：马尚龙
诵读：朱友好 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“海上梦叠”公众号 我知道你在看哟~ |
|
|
