【原】马路——露天单位

上海言话讲述：渺渺

       

马路——露天单位

作者：白米

前   言

有道是，每个人个历史侪带有时代个烙印，千千万万个人个历史再是构成了一个国家一个民族个历史。我，四五年生现今望八之人，虽则只不过是芸芸众生之一员，也有带有时代烙印个个人历史，回头看看，呒啥意义好讲，但还是有眼意思个。趁脑子还清爽辰光，记下来，否则侪[乙丢]脱了，可惜。

葛末，就用母语上海言话记记自家“十年运动”前夕到中期个个人经历搭之见闻伐！

声明，文中所讲事体侪是真实非虚构，不过其中人物用名侪是化名，看官倘使有熟悉人搭事个，请勿对号入座。

下头就开讲了。

                         露天单位

小世搿记呆脱了。

六五年二月头里，春节刚刚过脱。

杨树浦路松潘路口头，

搿日天连带小世共总七个应届高中毕业生集合勒此地。

区劳动局事先通知了，到辰光有得单位个同志会领[亻那]去上班地方报到。

有个三十多点扎头巾个妇女，顶风低头朝伊拉走来，伊眼睛光像啥勿大灵。

同班同学小齐讲了句，咦，伊勿是小菜场个伐！小世啊呀一声，坏了。

上一年，高中毕业，高考删下来了，蹲拉屋里半年。区里来通知了，三只学堂个十四个同学到劳动局开会。科长自我介绍姓Den，伊讲准备分配[亻那]去商业部门，坐办公室，三十四元工资，回转去自家考虑考虑。

散会，十四个人勒走廊里讨论开了。商业单位，有啥好啦？能派啥用场哩？搿末蹲屋里啥辰光再有分配呢？七嘴八舌勿统一。到了真要报到搿日，十四个人变七个了，另外七个勿高兴。

女同志讲我姓程，小菜场人事。领伊拉进了室内，简简单单几句，先做营业杂务，工钿廿四块，半只号头休一日，一年以后转正。喔唷姆妈，读了十二年书，结果脱勿识字个阿姨阿婆一样啊！

来了就算上班了，有得四人分勒室内松潘菜场，小世小齐大强到隔马路个露天菜场。程同志讲，两只菜场属于同一支部领导个，不过是独立核算个，侪勒一只街道里。

小世也只好硬硬头皮了。读书好有啥用，屋里勿灵光大学是挨勿着侬个。七个同学恰恰侪是差勿多情况，认命伐！不过想想Den科长讲个勿是迭恁个呀，上当了。三十四块变廿四了，足足少脱一个人生活费，办公室，更勿谈了。有眼气人。

气归气，班还是要上个。钞票是少，比学徒工多，也好减轻爷娘负担。再讲赖勒屋里，到辰光请侬去支疆，乃末真个要吃苦头了。

马路菜场北头是平凉路，南面到杭州路。一条路浪北面一段是营业摊头，一只只铁架子加芦席棚，南面一段叫各个大组，荤个素个，还有仓库、财会室、办公室，侪是靠勒东西两边劳工医院空军医院外墙搭出来个矮棚棚。热天式叫晒煞，冷天式叫冻煞。

小世个人生路开始了，慢慢叫熬伐！

       

方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。

在上海，爱上海，讲上海言话。

“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。

“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”

图片：原文 | 编辑：渺渺