 沪语朗读：周恋云  作者：徐锦江 沪语改写、朗读：周恋云 真正个老上海，侪晓得穿弄堂走路。上海个弄堂，有交关是贯通两条马路个。 譬如颜文梁、赵丹曾经住过个新康花园,张元济租住过个尚方新村,侪可以贯通复兴中路和淮海中路,搿头进,伊头出,晓得个人,勿光可以借迭个机会边走边欣赏弄堂里个洋楼建筑,还可以少绕交关圈子。虽然现在为安全起见,弄堂两头一般侪装了大铁门,但还是再开了一扇小门,晓得个人照旧可以自由进出。 自小姆妈屋里住勒愚园路,就读个安化二中勒安化路浪，可谓养勒深闺。为抄近路,且赏心悦目,我常庄从小辰光叫作峨嵋月路个“枪篱笆”小马路浪穿进去,搿条马路,我小辰光是只知其音,勿知其字,随牢大人伊拉用上海闲话含含糊糊个叫,还以为是“话梅路”,要晓得，伊个辰光呒没物事吃,话梅是难得个零食,一路走勒海,也想勒一路,，嘴巴里生津液,脚下头长力道。直到几十年后个今朝,研究了勿少老上海个资料,再晓得，搿条路个正确写法是“峨嵋月路”(就是现在个愚园路1027弄,1203弄),充满了诗情画意,怪勿得像路非路,两边高树遮明,小别墅迓勒“墙篱笆”后头，勿能通车，却又常庄看见小轿车慢悠悠个开到里向去。原来弄堂底有一片叫作西福司花园(原来误以为法斯花园)个别墅区,闲人勿得入内。当年东方海外个董事长宣轩,后首来上海市副市长张承宗侪曾经居住过搿垯。张老健在个辰光,我拜访伊还曾经走进过搿幢北欧式个小别墅。 我伲个中学就毗邻埃片别墅群,有辰光操场浪个篮球打过高墙,会得有隔壁头警口员送过来。但自家攀墙过去是绝对勿来三个,有几只捣蛋鬼出于神秘感，偷偷叫爬墙过去,结果拨卫兵捉牢“吃生活”。从峨嵋月路进去,还要转几只弯.再从一扇弄堂小门进去,穿过又一条套勒里向个弄堂,再可以到达就读个中学。从中学个地方出发,还可北抵武夷路,南到安西路，东至江苏路。 小辰光,到江苏路浪个市两女中去看露天电影,穿个是愚园路浪宏业花园个弄堂；到万航渡路个外婆屋里去,穿个是长宁路浪个兆丰别墅。假使勿是当地人,是决计设计勿出迭种最佳捷径个,有辰光为了计算阿里条路近,我伲甚至会得分头比勒海走,拿走路也变成功一种乐趣。工作以后，曾经暂时住勒虹口个海宁路一带,发现伊面个弄堂,大多数是连牢后头个武进路个。 更加有劲个是,前两天朋友杨君带我去伊小辰光住过个重庆南路万宜坊,我伲从思南路浪周公馆所在个别墅弄堂进去，因为伊记得小辰光是经常从搿搭个一条小弄堂穿回到屋里去个，弄堂里向勒进行别墅成片保养改造,有得保安挡驾,讲是已经砌了墙勿通了,我伲还是硬劲走进去,结果还是从废墟旁边个一扇小铁门走到了重庆南路浪,穿过马路,就是万宜坊,里向有韬奋纪念馆,就勒杨君屋里个隔壁，李安拍个《色·戒》当中女主角个原型郑苹茹,曾经也住勒搿搭。,杨君带我走到弄堂底,居然从一幢建筑背后个一条只好容两个人走过个夹弄里向穿到了另外一只大弄堂,我笑称伊一线天,伊个隐蔽,勿要讲外头人勿晓得，即使走到门前头,假使没人讲,也绝对呒没办法发现迭个背后头居然还有一线天。妙个是公用电话就设勒两条弄堂个一线天当中，搿能介两头叫电话便当。走过一线天,进入个是花园公寓,邪气有名气。据杨君讲，之所以叫作花园公寓，就是因为当初搿搭个花园绿地邪气大,可惜个是，勒“文革”当中花园之间又造起两幢特别难看个新工房,使得仅存个一片绿地变得邪气逼仄,一边个公寓也加了三层，形成了勿和谐个两截生。 讲到一线天,我还想起愚园路浪同仁医院急诊室个弄堂深处,隐藏勒海几幢大汉奸周佛海、李士群、吴四宝住过个房子，之所以选择勒迭搭安生,是因为汉奸怕拨暗杀,曲巷通幽便于藏生,一旦有暗杀行为发生,就可以从两头通个马路另一头快速逃生,啥人也勿晓得平时关闭个小铁门逢急个辰光还有迭个用场。熟门熟路个贼骨头蛮难捉牢,人生地勿熟个却往往是死路一条。前一抢有人偷金店首饰，大摇大摆从后弄溜脱,凭个也是熟门熟路。 “内环线讲外国闲话,中环线讲普通闲话,外环线讲上海闲话”。真个像民谣所唱，上海人已经边缘化到了外环线，内环线里向个弄堂也随牢仔大建设拆脱了勿少。 穿弄堂，既是一种怀旧,也是上海人残存个一点底气，勿走大马路，勿走直角线，而是穿弄堂走路，曲里拐弯走路,成了上海人老资格个一份证明。 啥辰光再可以穿穿弄堂，抄抄近路，一定是其乐无穷个呀。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 / 编辑：渺渺 |
|
|
来自： 渺渺m69vnzsah9 > 《待分类》
