【沪语悦读】朱家湾中山路平民村镇坪路秋月枫舍

新用户43526984 2023-02-24 发布于上海

展开全文

上海老底子每天呈送精彩文章一组

打开尘封的记忆，寻觅往昔的岁月

叙上海老底子事 忆上海老底子人

诉上海老底子情

朱家湾中山路平民村

镇坪路秋月枫舍

来源：魔都白领群

作者：薛理勇

改写：丁曙立

讲述：朱枫

审阅、推荐：丁迪蒙

编辑：王乙其

老底子我屋里勒虹口，2001年搬到普陀区镇坪路一个叫“秋月枫舍”个住宅小区，眼睛一眨已经过脱廿多年了，真有种时光如梭个感觉。

镇坪路是条新马路，1987年开通个，搿一带老底子属于朱家湾地区，而我住个“秋月枫舍小区”，以前是个叫作“平民新村”个住宅区。今朝就来讲讲朱家湾搭平民新村个故事。

历史浪个上海是江南水乡，水乡河浜、湖泊多，因此，水乡个地名往往搭河浜关系密切。水乡个河浜弯弯曲曲，上海人拿急转弯个地方，河岸凹进去个一面叫“湾”，凸出来个一面，形状像动物个嘴巴或者角，就分别称为“嘴”搭仔“角”，邪气有名个“陆家嘴”，就是黄浦江流经此地有只急转弯，勒外滩对岸形成功凸出来个“半岛”，搿搭曾经是陆氏家族集聚个地方，所以拨叫作“陆家嘴”。

吴淞江是太湖流域最大个河浜，经过上海市区个搿段俗称“苏州河”，苏州河弯弯曲曲，形成功无数个“湾”、“嘴”、“角”，有个地名仍旧勒海用，有个已经拨堙没了，最有名气个，大概就是拨合称为“三湾一弄”个朱家湾、谭子湾、潘家湾搭仔药水弄了。

不过，“三湾一弄”之所以有名气，并勿是自然风光，而是因为搿搭曾经是有名个棚户区、贫民窟。

朱家湾原来是虬江北岸个一湾，早期个地图浪可以看到，虬江曲折多弯，形成功交关“湾”搭仔“嘴”，勒现在光新路虬江搿段有只明显个湾，叫“朱家湾”，望文生义，应该是有朱氏宗族勒搿搭集聚而得名个。

进入20世纪之后，苏州河南岸、公共租界个西界扩张到了“小沙渡”，也就是现在个西康路苏州河旁边，交关外商搭中国民族资本勒“小沙渡”个苏州河两岸造工厂，苏州河南岸是租界，管理比较严格，北岸是中国地界，管理松懈，于是么，来上海谋生个交关外乡人勒朱家湾一带乱搭乱造，形成了居民集中个棚户区、贫民窟，勒朱家湾附近形成功一只市镇，叫“朱家湾镇”，简称“朱家湾”，穿过朱家湾镇个一条小路就叫“朱家湾街”。

1927年，南京国民政府成立，同年7月1号，上海特别市建立，刚建立没多少辰光，通过了一项改善工人住房条件个法案，1928年成立“筹建平民住所委员会”，由政府出资购买或者租赁土地，来建设一批低档个平民住宅，平价或者低价出租拨勒平民居住，搿种住宅大多数叫“平民村”，后首来有部分改称为“市民新村”，譬如打浦桥平民村、大木桥平民村、其美路，就是四平路平民村、后来又改称幸福村、普善路平民村咾啥，朱家湾造个平民村因为靠近中山路而拨叫做“中山路平民村”。

中山路平民村1935年9月奠基，市长吴铁城勒奠基石浪题书，规划占地面积3.5万平方米，范围相当于现在个光新路西侧，中山北路北侧。搿搭有条叫“赵浦”虬江个支流，部分拨填平之后作为“平民村”个用地。

1936年完成第一期，一共造了57排，330个单元。住宅侪是砖木结构，前头朝南个是一层平房，后头是低矮个二层楼阁。但是，工程还呒没完全结束，1937年八一三淞沪战争爆发，还呒没完工个中山路平民村拨日军强占，成为了日本兵个兵营搭仔马棚，新造个房子损毁严重。

1945年抗日战争胜利之后，中山路平民村名义浪由市政府收回，不过，兵荒马乱，政府还呒没采取行动，邻近个工人搭仔流民老早就抢先一步强占平民村，政府没办法，听之任之，平民村真正成为了杂乱无章个贫民窟。

1953年，上海市政府为了改善工人阶级个住房条件搭仔居住环境，勒朱家湾一带建设了交关当年拨称之为“两万户”工人住宅搭仔工人新村，搿些“两万户”住宅个样式搭平民村差勿多。拿原来个朱家湾街改造成为马路，命名为“光新路”，伊个北面是光复西路，南面是甘泉新村。“朱家湾”成为历史地名，不过，当地人仍旧习惯拿此地叫作“朱家湾”。

20世纪80年代初，普陀区政府开始有计划个对中山路平民村以及周边地区进行旧区改造，1987年，拿原来平民村个81个单元住宅拆脱、改造为马路，取名“镇平路”，顾名思义是要消灭平民村，消灭贫穷，但是，“镇平”也容易拨人误解为“镇压平民（村）”，呒没多少辰光，根据上海地名相应规则，普陀区道路名称原则浪用陕西省地名命名，就正式拿陕西省西南边缘个镇坪县命名为“镇坪路”。

20世纪90年代，“沙田物业”拿到了“平民村”土地个建设权，分两期建设“秋月枫舍”住宅小区，勒光新路搭中山北路口有只有名个“乐购超市”，沿中山北路为商铺，形成功成熟个住宅区搭仔商业区。搿搭交通方便，中山北路搭光新路有好几条公交线路经过，轨道交通3、4、7号线有“镇坪路站”，还勒苏州河浪造了“镇坪路桥”，镇坪路，已经成为上海有一定知名度个地名了。