 吾是一个土生土长个上海人，出生勒拉20世纪70年代个末期，畀大家叫做“70后”，就勒拉吾个少年时期，还勒拉吾读小学个辰光里向，个人顶顶喜欢喫个小菜之一，迭个就是－－要算西红柿炒鸡蛋，就勒拉吾所在个城市上海市，上海人还邪气欢喜畀“西红柿”叫做“番茄”，而且辰光走到今朝仔，迭种习惯依旧呒得去改变过。  吾对于西红柿是有得邪气深厚个感情，就算到今朝仔依然能够清楚个记得，勒拉吾儿童时期搭少年时期，吾伲国家还处勒拉计划经济时期，去购买任何一样么事，侪要凭各种票证供应。比方讲：有“糖票”“香烟票”“油票”……因为爷娘侪是属于工薪阶层个缘故，因此讲，收入是属于邪气有限、覅大多个，而且勒拉掰搿辰光里向，每家人家个收入水平，同样是相差无几个，外再加上水果个价钿是邪气贵个，能够喫到水果个品种搭机会，也一样是交关少个，只有极少数家庭条件交关好个人家僎能够喫得起水果哦。相比之下唻讲伐，西红柿个价钿就要比水果个价钿唻得便宜的交关多，也是属于交关经济实惠个，勒拉掰搿辰光、勒拉吾伲屋里向，西红柿既要担当蔬菜迭个主角，勒拉更加多个辰光里向，伊还要附带并承担水果迭个配角！  还有个就是，勒拉掰搿辰光，覅是侬想去喫西红柿，就能去喫到西红柿哦，眼扳数要等到炎炎个夏日季节到唻嘞以后，侪有可能去喫到西红柿。每当步入到炎炎个夏日季节里向，姆妈就得去买西红柿畀吾伲哥俩当水果喫，【注解：哥哥搭吾】基本浪向是一天喫一只。  另外，勒拉吾所在个城市，有关于西红柿个喫法覅是邪气多个，无外乎就有得迭个四种喫法，除忒吾上面提到个西红柿炒鸡蛋之外，还有三种喫法就是－－西红柿洋山芋蛋汤、糖拌西红柿搭做西餐沙拉个辰光放一眼西红柿。【备注：勒拉上海马铃薯畀叫做洋山芋。】 拌过糖个西红柿，假使能够去冰镇一下，噶末伊个味道就会得更加好、喫起来变得更加美味哦！屋里向有得井水个人家，放到井水里向，有得冰箱个人家，可以放到冰箱里向冰镇一下，如果呒井水搭冰箱个人家，可以去购买一眼冰块，用冰块唻冰镇一下也覅错个。  西红柿个营养是交关丰富个，伊含丰富有维生素A、番茄红素、叶黄素、矿物质、黄酮、膳食纤维搭胡萝卜素等营养成分，迭些营养成分是人体所需要个，所以有得交关多个家庭侪欢喜喫西红柿个。  勒拉全国各地，几乎每家每户侪会得做西红柿炒鸡蛋，但畀过，要想做好迭道小菜也覅是邪气便当个，到底是先去放西红柿，还是先去炒鸡蛋，迭个里向还是有学问个。勒拉吾小辰光，除忒欢喜喫西红柿炒鸡蛋以外，还欢喜畀西红柿用清水冲洗一下，直接拿过唻当水果喫。只畀过，等到自家年龄稍长一眼眼个辰光，听别人家勒拉讲，现在个生西红柿，勒拉外（表）面有毒（有农药），就覅大欢喜去生喫西红柿嘞，还有得交关长个一段辰光里向，生西红柿一碰也覅碰！  勒拉十年前头，曾经忒忒惠惠搭爷娘一道去浦东新区孙桥农业开发区参观浏览，农业区里向所有个西红柿侪都是采用无土唻培育个，培育出唻个各种西红柿品种，都像鹌鹑蛋一样大小，而且是覅去添加任何化肥搭农药个，西红柿全靠各种营养液慢慢较成长起唻个。据说迭种方式方法，就是从外国引进唻个先进农业科学技术，各类新闻媒体，还包括央视新闻媒体在内，做过相关个报道，还有某些外国国家个农业科技人员搭农业方面个科学家，也曾纷纷慕名纷至沓唻，到孙桥农业开发区唻参观、学习、交流，并且还一道去搞合作开发。  勒拉老底子，只有步入到炎炎个夏日季节里向，吾伲侪能去喫到西红柿，可以迭能唻讲，到嘞啥个季节喫啥个小菜，比方讲：冬喫萝卜春喫笋、青菜要等到冬天打过霜侪好喫……今朝仔陪伴着科学技术覅断个进步发展，吾伲一年四季侪能喫到反季节个蔬菜搭水果。  今朝仔，生活条件变得越唻越好，喫个各类么事要比老底子丰富的交关多，仔细回过头唻想一想，还是有眼缺陷个，就是总觉着反季节个蔬菜搭水果，远远覅如当季个蔬菜搭水果要唻得好喫得多。  科技个力量是呒得穷尽个，西红柿只畀过是众多科学技术进步中个一个缩影。今朝仔因为科学技术个进步搭发展，使得吾伲个生活方式变得越来越美好，所以吾伲要去感谢科学技术个进步搭发展！  |
|
|
