|
阿拉老底子每天呈送精彩文章一组 打开尘封的记忆，寻觅往昔的岁月
叙老底子事 忆老底子人 诉老底子情
来源：魔都白领群 作者：薛理勇 改写：丁曙立 讲述：洪瑛 文字、语音审核：丁迪蒙 编辑：王乙其 康定东路邪气短，伊东起石门二路，西接康定路，全长只有242米。不过，搿条路历史悠久，是原来个“麦根路”个一部分。
康定东路85号（泰兴路口）南面是石门二路街道社区文化活动中心，是一幢历史建筑，据说是张爱玲个曾外祖父李鸿章个产业，也是张爱玲小辰光生活过个地方，伊个对面、康定东路28号，是一幢假三层老洋房，连续拱圈支撑个内廊，清水红砖外墙，四坡顶浪老虎窗，还有西式尖屋顶，侪透露出悠久个历史信息，现在，搿搭是静安区少年儿童图书馆所在地。交关人想晓得，搿搭曾经是啥人家个豪宅，啥人勒勒此地蹲过，曾经发生过啥个故事。
先来介绍麦根搭麦根路。 1853年，太平军沿长江一路下来攻占南京，建立太平天国王朝，清军围困太平天国；上海租界当局无法判断清政府搭太平天国啥人好取得最后胜利，就提出“武装中立”、“勿选边”，观察事态个发展。1860年，太平天国派李秀成突围东进，李秀成突围之后力克镇江、常州、无锡、苏州、昆山、松江、杭州、宁波等地，直逼上海。租界当局勒迭个辰光放弃“武装中立”，同意协助清政府镇压太平军。 当时，上海租界个西界勒勒泥城浜搭周泾，相当于现在个西藏中路搭西藏南路，为方便军队行动，经李鸿章批准，同意租界当局勒勒租界以外个地方修建马路，“以利军行”，旧上海拿租界当局勒租界以外个地方建设个马路称之为“越界筑路”。 当时，租界当局“越界筑路”个有：静安寺路（南京西路）、新闸路、极斯菲尔路（万航渡路）、徐家汇路，徐家汇路有两条，法租界个相当于现在个徐家汇路搭肇嘉浜路，英租界个徐家汇路相当于现在个华山路，还有麦根路等等。 麦根路是以英国人麦根个名字得名个。有关麦根个生平纪录勿多，伊是个英国外交官，19世纪50年代到上海，太平军东进辰光，是英国驻上海副领事。负责租界个防卫，后来有段辰光担任英国驻上海代理领事。 最初个“麦根路”东起新闸路，沿东芦浦朝北，到苏州河边头转弯朝西，再沿牢仔苏州河到伊个“叉袋角”个地方，再转弯朝西到现在个江宁路附近。迭眼“越界筑路”侪是临时性个军路搭仔便道，造价邪气低，质量老差个，战争结束之后，交关所谓个马路实际浪侪荒废脱了，当然，伊还是拨当地人个出行带来了方便。
麦根路邪气长，弯弯曲曲绕了好几只弯，20世纪30年代，经过几趟调整搭仔改名，原来个麦根路相当于现在个石门二路、康定东路、泰兴路个北段、西苏州路搭仔淮安路。 恒丰路桥老底子叫作“麦根路桥”，俗称“舢板厂桥”。舢板以前指黄浦江浪个一种小个工作、交通船，上海人也拿外国人个赛艇叫作“舢板”，所谓“舢板厂”，就是停舢板个船屋，邪气明显，舢板厂桥就是勒勒附近个船屋而得名个。 国外有一个“亚洲赛艇”个网站勒2020年1月23日登了篇由蒂姆柯克写的，黄跃斌翻译个文章《追忆上海赛艇俱乐部》，文章迭能翻译：西方个赛艇活动是随牢仔上海开埠进入上海个，第一次赛艇赛可以追溯到1849年，但是，见于报道个赛艇赛则是1852年10月29日勒勒黄浦江进行个比赛。
大约摸勒1859年，赛艇爱好者成立俱乐部，1963年重修改组，就是后首来个“划船俱乐部”。赛艇是比赛用个船，训练搭仔比赛个辰光下水，平常日脚就摆勒“船屋”里。作者讲： 哈里斯呒没记录上海划船俱乐部建造第一栋船屋个辰光，尽管伊确实讲过“就勒现在个船屋旁边”，就是勒苏州河南岸，靠近黄浦江个地方。就是后来拨称之为“下船屋”（多数是勒非周末个辰光使用），1875年，勒河浜上游个位置建造“上船屋”（多数勒周末个辰光使用）。1902年，河道拥堵加剧，使得'上船屋’移到更加上游，并于1906年拨出售。
搿段文字描述含糊勿清，无法确定“船屋”个位置，还好作者提供了几张历史照片，作者讲： 搿张大约勒1875年到1880年拍个照片出自布里斯托大学在线版个中国历史照片集，勒勒“创作共享许可”下转载。标题是：“搿座建筑是苏州河旁马克咸路个上船屋。伊建于1875-76年，草坪浪可以打槌球、网球、掷环圈”。
上海呒没“马克咸路”，不过，伊个发声倒搭“麦根路”邪气接近，现在个恒丰路桥以前就叫“麦根路桥”，显然，搿个“苏州河旁马克咸路个上船屋”就勒麦根路桥个附近。 1899年之前，上海公共租界个西界勒勒西藏路以东，现在好寻到1900年之前西藏路以西个地图邪气少，我寻到了张1880年代《上海英租界、法租界、美租界道路地图》，竟然就勒麦根路苏州河边头，也就是勒现在个康定东路静安区儿童图书馆个位置寻到了船屋，毫无疑问，现在个静安区儿童图书馆，就是以前划船总会个建筑。
20世纪初，工部局同意拿勒勒外白渡桥搭乍浦路桥之间，苏州河南岸个“备用地”提供拨了划船俱乐部，作为会所搭仔船屋，1906年，划船总会就拿麦根路船屋作价卖给了工部局。
勒一张1864-1866年个上海英租界地图浪可以看到，上海开埠以后呒没多少辰光，工部局就勒沿外白渡桥搭四川路桥之间个苏州河南岸滨江筑了条“苏州路”，就是现在个南苏州路。搿段苏州河容易淤积，呒没多少辰光，就形成了面积勿小个涨滩，后来，西侧乍浦路桥到四川路桥个涨滩拨填平以后，造了只“华人公园”，就是现在个河滨公园，根据英租界相关个规定，勿好勒黄浦江、苏州河滨江造房子，搿能，东侧外白渡桥到乍浦路桥个滩地填平以后，只好作为“备用地”。 1899年，公共租界扩张成功，伊个东界伸到了杨树浦底，西界伸到了静安寺，总面积扩大了老多倍，租界有得交关马路需要建设，大量个建筑材料要通过苏州河运到上海，必须勒苏州河造建筑材料码头搭仔堆栈，葛么，工部局搭划船总会协商，同意划出外白渡桥搭乍浦路桥转角个一块“备用地”，提供拨了划船总会建造“船屋”，也就是所谓个“下船屋”，划船总会则让出麦根路个“上船屋”，作为工部局个建筑材料码头搭仔堆栈。1906年，工部局支付了最后一笔2000两银子个补偿款，划船总会就全部迁出了麦根路个“上船屋”，搿搭就成了工部局工务处麦根路堆栈。
迭搭靠近苏州河，地方相对偏远，交通困难，作为工部局工务处个办公地勿大适合，原来划船总会留下来个洋房收益率比较低。1924年初，常熟人冯镇欧勒勒新闸路创办大中华影片公司，迭个公司只出品过《人心》搭仔《战功》两部影片，卖座率勿高，1925年伊搭百合影片公司合并，改组为大中华百合影片公司，租用个就是麦根路工部局工务处个老洋房，并勒勒此地开业。大中华百合影片公司经营仍旧惨淡，1929年停业整顿，1930年并入联华影业公司。搿搭又成了“上海人力车夫互助会”个会所。 上海个人力车也叫黄包车，是1873年从日本引进个，到1930年代，上海有黄包车几万部，从业人员大约摸有5万人，是重要个公共交通搭仔代步工具。黄包车夫处于社会底层，收入微薄，生活艰辛，同样，黄包车个正常运行，黄包车夫个生活安定也搭社会秩序安稳息息相关。 1913年，曾经担任公共租界巡捕房总巡个苏格兰人玛达生退休之后，创建了“上海人力车夫福音会”，开始辰光，勒勒开封路租借民宅办业余学堂，教车夫读书识字，还请神父来布道讲经，伊还利用自家个关系，邀请工部局董事、洋行经理、社会名流，搭仔中国绅士组成了董事会。
不过，“福音会”带有宗教气息，玛达生并勿是传教士，后来改组为“上海人力车夫互助会”，有了社会名流个支持，工作进展邪气顺利，也筹集到勿少个资金，其中，上海巨商，德和洋行老板捐老大一笔钞票资助、支持“互助会”，“互助会”有足够个资金补助有困难个车夫；同时，“互助会”还参与对车夫个法律援助，调解车夫之间个矛盾，调解车夫搭交通管理机构个矛盾，对租界当局来讲，有利于维护社会秩序，所以呢，“互助会”也得到租界当局个支持。对车夫来讲，“互助会”是伊拉个依靠搭后盾，大部分车夫侪加入了“互助会”。
“互助会”设勒虹口嘉兴路小菜场楼浪，全市划地段设立分会，大中华百合影片公司退出麦根路老洋房之后，迭搭就是“互助会”个西区分会了，后首来成为了总会会所。再后来，“互助会”两侧成为了煤炭堆栈，刘鸿生个“义泰兴煤栈”开勒“互助会”西侧，1949年之后，义泰兴煤栈改为“上海第二煤球厂”。 煤栈、煤球厂灰尘邪气大，每日天有大量装运煤炭、煤球个车辆进进出出，环境变得恶劣，老洋房也拨弄得“灰头土面”，破败不堪。 改革开放以后，煤球厂变更为义泰兴实业发展有限公司，老洋房通过土地置换归拨静安区政府，20世纪初，区政府对老洋房进行大修，当时辰光，还呒没对“历史建筑”修缮、改造个规定，不过，政府还是参照了老洋房个基本样式大修，使得老洋房“风韵犹存”，重新体现出昔日个光彩，现在是静安区少年儿童图书馆。
作者：薛理勇
讲述：洪瑛 丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
来源：“海上梦叠”公众号 |
|
|
来自： 常熟老李jlr5mr > 《★上海老底子》
