 来源：新民晚报 作者：马尚龙 改写：丁曙立 讲述：丁曙立 文字、语音审核：丁迪蒙 编辑：王乙其 仍旧留勒淮海东路个宁波路老建筑 淮海东路个前身，是宁波路。 淮海东路个东头正好是浙江南路个终端，假使横穿浙江南路，继续往东走，淮海东路已经是尽头，路却勿是尽头，稍微带眼弧度，就勿再是淮海东路，而是人民路了。人民路按照弧线朝南。淮海东路搭浙江南路，侪勒人民路个一点点弧线外头到头了。 直到现在，交关人会勒搿搭迷路。沿牢仔人民路开车，要去淮海中路个，就勒人民路一点点个弧线个地方，稍勿注意，开到老西门去了；也有要去南市个车子，从人民路几乎笔直个开到了淮海路西藏路。 搿段淮海东路个人行道浪，只有我一个人。上海市中心个马路浪，下半日三点钟横里，人行道浪竟然呒没人。一眼也勿奇怪，搿是淮海东路。由淮海东路、浙江南路、永寿路三条路组成个居民区，侪已经贴上了动迁后个封条。
房子里呒没了人，路也就冷落得呒没了人气。看马路对面个淮海东路，有了新造起来个大楼房子，门前头也是邪气冷落。 我特别留意“东淮海国际大厦”，有22层高，是2007年完工个，伊个门牌号头是淮海东路45号－49号，二楼是美食城，一楼是各类小吃店。 啥人晓得搿个门前冷落个地方，一百多年前，曾经邪气有名、邪气闹猛，并且还有一个四明公所，公所个门楼后来平移了23米，就从淮海东路落户到了人民路了。 有人以为，平移了23米，是从黄浦区动迁到了南市区，搿个理解是错个。勒南市区并入黄浦区之前，北面个淮海东路是黄浦区，南面个淮海东路是南市区，淮海东路是两区个分界线。
只有朝西过了云南南路，淮海东路再有了活力。淮海东路搭云南南路连接个地方，有一民居，桃源新村，是1959年造起来个工人新村，门牌号头是淮海东路89号，不过原来个门面房有勿少拨拆脱了，二三十年前造起来个大楼，拿桃源新村遮脱了。 最重要个活力是勒马路北面。光明中学鹤立鸡群恁个立勒搿搭，一看就有重点中学个腔调，像格致中学一样，四周是黑颜色铁栏杆加上绿化个遮挡，端庄中有神秘。光明中学最初只是初级中学，并勿是重点中学。伊个高冷气场，完全是由伊个历史培养出来个。 因为已经放假，光明中学是安静个，对面个商家，也老少有人经过。正因为搿能，我对淮海东路也就多了散淡联想个兴趣。我勒极力回忆，淮海东路拨过我个印记。 即使是一个初到上海个游客，到了淮海东路，看到了光明中学，也会感到伊个气度不凡，感受到伊勒淮海东路是一个孤傲个存在。
淮海东路历史丰富，完全勿亚于淮海中路，淮海东路对于淮海中路个建造开通有着历史性个意义，但是对于普通市民来讲，除非是住勒附近，对淮海东路个勿了解几乎是必然个。 庆幸个是，有光明中学可以作为淮海东路回顾宁波路历史个导航“定位”，因为光明中学是勒淮海东路浪宁波路老老多个建筑中唯一个幸存者。 光明中学个学子很光明 光明中学现在确切个地址是淮海东路70号。最早建校个辰光，校门是开勒公馆马路也就是现在个金陵东路63号，校名“法文书馆”；1911年改名为“中法学堂”。 1886年，法租界公董局租房开了一所以教华人法语为主个法文书馆；当年招收了100名男生，专门教法语；夜到附设补习科一个班，专门教法租界执勤个巡捕初级法语。
因为法租界里个华籍巡捕普遍勿懂法语，所以法租界公董局董事萨坡赛提议开办一所专门教法语个义务学堂，要造新个校舍。 1913年，新校舍勒敏体尼荫路也就是现在个西藏南路落成，正式改名为“中法学堂”（又译中法学校）。 老快个，校舍跟勿上教学了。1923年，勒现在个地址造了教学楼，占地6000平方米，也就是今朝个“山”字形内廊式平面布局。
学堂设施中最具特色个是用勒总务室个法国母钟控制每只教室个子钟，勒当时堪称一绝。建筑外墙为清水黄砖墙，白石灰勾缝。立面以直向线条为主，分层装饰白颜色腰线，庄重简洁。建筑风格为新艺术派搭罗马风格混合个折衷主义式样。目前是上海市优秀历史建筑。 中法学堂实行法国学制，分高中班、初中班、高小班、初小班四级。课程设置包括法语、国文、数学、地理、物理、化学、生物、绘画、哲学、会计搭仔历史咾啥。 抗日战争胜利后，中法师生反对帝国主义个爱国情绪勿断高涨，集体到法国领事馆搭市政当局请愿，法国修士被迫离职。1946年2月，学堂师生推荐中国修士马云祥担任校长，校名改为“私立中法中学”。 1951年，上海市教育局委派复旦大学教授赵书文担任校长，教育局副局长杭苇勒庆祝大会浪宣布拿“中法中学”改名为“私立光明中学”，并为学堂书写了校牌。之后，教学大楼正面上方个校名拨改为“光明中学”。 1953年，光明中学由私立改为公立。2000年起学堂成为高级中学。 1986年，光明中学恢复法语教学作为选修课。1990年，上海市教委同意光明中学拿法语作为高中第二外语。2017年，光明中学成为中国第一所由法国政府授予个“法国教育标志”认证学校。
光明中学历时长久，人才辈出。已故国际奥委会会员何振梁曾经勒1939年到1946年就读于光明中学。何振梁自家回忆讲：伊9岁个辰光跟牢仔父母搬到上海法租界，就读于中法学堂。勒中法学堂读了7年书，除了国语之外所有个课，侪是直接用法语授课个。 还有中科院院士杨雄里、周秀骥，复旦大学教授俞吾金、钱文忠，也侪曾就读光明中学。 1923年后，中法学堂就勒当时个宁波路浪邪气耀眼，直到现在，光明中学依旧是淮海东路唯一个地标。光明中学也是淮海东路浪同时代唯一个幸存者——自从造好之后，光明中学，一直就是学堂，从来呒没派过其他用场，并且也一直像钉子一样扎根勒此地。 光明中学个表弟：“鲜得来” 之所以拿伊拉称为表兄弟，因为两者勿同宗，但是又勒地理浪常年相依，而且双方也互相有靠。一表三千里也讲得过去。 50年前，交关上海人就认得光明中学，准确个讲，是拿光明中学当作“鲜得来”个地标参照物。“鲜得来”名气响，但是店家小，慕名而来个食客老难有方位感。交关人只是听朋友“导航”——光明中学隔壁弄堂里呀。
印象中光明中学是勒淮海东路，于是到淮海东路光明中学旁边寻“鲜得来”排骨年糕，迷失方向了。犯搿能错误个人老多个，我就是其中之一。 “鲜得来”确实是勒光明中学校门隔壁弄堂里，不过光明中学有两只校门，正门勒淮海东路，侧门勒西藏南路。“鲜得来”是勒西藏南路校门隔壁个弄堂里。 1921年，“鲜得来”排骨年糕创始人何世德举家三口勒蓝维蔼路志德行弄堂口就是现在个西藏南路177弄口头摆摊，一开始只卖眼牛奶、面包、吐司，吃客多数是近邻中法学堂师生，生意一般。后来，何世德改卖五香排骨年糕搭烘鱿鱼，生意越来越好，名气也一眼眼响起来了。
“鲜得来”三个字朗朗上口，充满了市井气息，虽然后来也曾经有过其他个名字，但上海人只叫伊“鲜得来”。1978年，再次恢复真名“鲜得来”。 1976年，光明中学开挖人防工程，“鲜得来”勿晓得是否搬离过。1978年人防工程结束，“鲜得来”再起蓬头，还勒光明中学地下室开出了地下餐厅，生意好得唻，门口要排一个钟头，进去还要排一个钟头。 1994年6月，“鲜得来”正式搬到云南南路。我也曾经到“鲜得来”吃过，排过队，也曾经拿了镬子去买过外卖，一年到头湿嗒嗒、黏嗒嗒、滑哒哒个弄堂店。
勒我看来，“鲜得来”排骨年糕有两点经典意义，勿在于排骨而在于年糕。第一次吃到了“袜底酥”样子个长条年糕，而勿是一片片个年糕，或者一根根个生年糕。搿个年糕式样，是鲜得来首创个。排骨年糕还有一个意义是，年糕一开始个身份是主食，从排骨年糕开始，年糕也是点心了，进一步“华丽转身”，年糕还可以是讨人欢喜个食材，现在个毛蟹年糕、鱿鱼年糕、八宝辣酱年糕、火锅年糕……我以为，追根寻源，侪是来自“鲜得来”个年糕式样个革命。 前段辰光我回到光明中学，看到一段1995年拍个纪录片，一家“白莉商行”邪气时尚潮流，有好几开间门面，镜头里还划过了店家个门牌号：淮海东路70号。勿就是光明中学嘛！当时上海个中小学，包括机关，侪流行破墙开店。直到后来，光明中学又造起了铁栏杆，栏杆靠里向一面还种了冬青树，从马路浪看校园，主楼上头“光明中学”四个字，已经是朦朦胧胧个了。
作者：马尚龙 丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
来源：“海上梦叠”公众号 |
|
|
